«Fänsar»da küñel bäyräme uzdı ← kire kaytirga

Inde traditsiyagä kergän «Sälät-Gailä» smenası «Fänsar» fän häm mägarif üzägendä kabat uzdı. Belgänegezçä, bu smenada Sälät berläşmäseneñ iñ keçkenä aktiwistları katnaşa.

Sälkipuşlar öçen dus-işläre belän samokatta, welosipedta yörü, Bilär hawasın sulau, bergäläşep kızıklı däreslärgä yörü zur bäxet ikän. Äle ul gına da tügel, alarnıñ äti-äniläre dä räxätlänep «Fänsar» koçagında yal itte. Çönki biredä berniçä buın duslıgı, räxät, küñelle moxit häm eçkersez aralaşu.

«Bäläkäç» – räxät kenä tügel, uñaylı moxit tä ul. Yugarı däräcäle ukıtuçılardan däreslär alalar, maxsus biremnär çişälär, yaña belemnär tuplıylar. Älege şäxeslärne bez dä beläbez, xörmät itäbez, çiksez räxmätlebez», - dip belderde 5 yaş-lek Yasminäneñ änise Aygöl Möxämmätcanowa.

«Bäläkäç» klubınıñ  här oçraşuı – küñel bäyräme ul. Şuña da anıñ mömkin kadär ozagrak däwam itüen telibez. Sälätneñ balalarnı tatar telenä tartuı aeruça şatlıklı. Olı ulım Murat – fän olimpiadaları katnaşuçısı, Sälätkä barır öçen härwakıt yugarı näticälärgä ireşergä tırışa. Anıñ laeklı ciñüçelär arasında tärbiyalänäse kilä», - di Ramilä Kärimowa. 

El äylänäse 1,5-8 yaş-lek balalar här atnanıñ şimbä könendä  Sälät yortında cıelalar. Biredä alar wokal, teatr sängate, dizayn yunäleşläre buença däreslär alalar. Bu eşçänlek näticälären smenanıñ axırgı  könendä kontsertta kürep buldı.

Sälkipuşlarnıñ iñ yaratıp başkargan cırları «Sälät – ul...» dip atala. «Palatka, uçak häm gitaranı» inde äti-änilärenä kuşılıp cırlıy başlagannar. Bu tagın ber kat buınnar almaşın assızıklıy. Dizayn däreslärendä balalar «äylänçek» yasarga öyrängännär.  Smenaga kilgäç anı cildä sınap ta karadılar.

«Monda bik räxät. Här irtä yögerergä çıktık, saf hawa belän läzzätländek, annarı tämle irtänge aş... Ping-pong buença turnir bik oşadı. Küñelle buldı!» - di 11 yaş-lek Murat Kärimow.

Sälät proektları citäkçese Ädip Älmir zamança texnologiyalär yardämendä balalar belän aralaştı. Barlık katnaşuçılarnı da sälamlägännän soñ, mondıy çaralarnıñ ähämiyatlelegen iskärtep uzdı, sälkipuşlarga üsä töşkäç tä ber-bersen yugaltmaska, aralaşıp yaşärgä  kuştı.

Däreslärdän tış balalarga «Sälät-Tuy» çarası oeştırıldı. Xalkıbıznıñ milli bäyräme – Sabantuynıñ analogı itep eşlängän älege çarada alar çülmäk wattılar, mendärlär belän köç sınaştılar, arkan tartıştılar, tabışmaklar çiştelär. Büläkkä alarga ballı prizlar tapşırıldı.

Yaş- sälätlelär öçen balalar bakçasınnan tış, başlangıç mäktäp yaisä maxsus Sälät sıynıfları buldıru planda bar ikän. Sälätle balalar öçen «Fänsar» bazasında litsey-internat açsak – bötenläy dä şäp bulır ide.

«Bez balabıznı bik teläp bu mäktäpkä yörter idek. Bu ideyaneñ tormışka aşuın tüzemsezlek belän kötäbez! Bu bezneñ gailä öçen bik möhim », - di Aygöl Möxämmätcanowa.

Bik tizdän Bilärdä VI Xalıkara yaş-lär uku-ukıtu forumı uzaçak. Biredä yaş- yoldızçıklar yañadan oçraşıp zur säxnägä üz sälätlären kürsätäçäklär! Uñışlar sezgä, sälkipuşlar!