Töp trend – belem birü ← kire kaytirga
«Dürtençe sänägat rewolyutsiyase öndämäläre». Sälät yortında I Xalıkara «Sälät – Uniwersitet Talantow» biennalesı kısalarında, şuşı temaga ekspertlar sessiyase ütte.
Çara barışında «dürtençe sänägat rewolyutsiyase» töşençäsenä añlatma birelde, anıñ töp trendları, tendentsiyaläre häm öndämäläre turında fiker alışındı.
Sessiyadän añlaşılgança, bez texnik rewolyutsiya aldında torabız. Ul bezneñ tormış räweşebezne, yaşäeşebezne, eş häm kommunikatsiyabezne üzgärtergä sälätle. Inde bügen yasalma intellekt belän härdaim oçraşıp torabız bit: awtonom maşinalar, wirtual assistentlar, tärcemäçe-programmalar, kiñäşçelär, hb. Isäpläü egärlege, mäglümatlarnıñ bik tiz artuı, kübäyue soñgı berniçä elda bezgä yañadan-yaña texnologiyalär uylap tabarga yardäm itte, yasalma intellekt ölkäsendä küzgä kürenerlek alga kitärgä etäreş birde.
Ekspertlar dürtençe sänägat rewolyutsiyasen niçek küzallauları turında da urtaklaştılar: anıñ maksat, burıçları häm töp missiyase xakında fikerlären belderdelär.
Misalga, Färidä Tansık kızı Näcmetdinowa – Kazan däülät agrar uniwersitetı Iktisad institutınıñ fälsäfä häm xokuk kafedrası citäkçese – «rewolyutsiya 4.0.» häm «keşe 4.0.» tigez dip belderde. Bu här keşe wakıt belän bergä atlarga tieş digän süz. Tik şunısın da onıtmaska kiräk: rewolyutsiyaneñ töp adresatı – keşe. Yaña texnologiyalärneñ barlık östenleklärenä dä karamastan, eşçe keşene alar barıber tulısınça almaştıra almıy. Ä keşelär belän aralaşuga korılgan hönärlärgä bötenläy dä kurkınıç yanamıy ikän.
Niyaz Gafiyatullin – Kazan şähäre Duması deputatı, «Mejdunarodnaya şkola Kazani» oeşması direktorı – rewolyutsiya barışında başkarırga kiräk bulgan burıçlar xakında söyläde. Anıñ fikerençä, bügenge globallek häm texnologiyalär üseş algan çorda äydäp baruçı illär belän xezmättäşlek itärgä kiräk. Çönki bu täcribä urtaklaşu da, östämä belem dä.
«Yugarı texnologiyalär ölkäse texnoparkı «IT-park» direktorı Anton Graçew dürtençe sänägat rewolyutsiyasendä töp 3 tendentsiyane atap uzdı: fizik, tsirflı häm biologik üzgäreşlär. Şulay uk Anton Olegowiç ildäge infrastuktura döres bulunıñ möhimlegen dä iskärtte. Bu yaña texnologiyalär uylap tabuga mömkinleklär tudırılırga tieş digän süz.
«Kazanskiy otkrıtıy uniwersitet talantow 2.0» oeşmasınıñ başkarma direktorı Aydar Akmalow, «Sälät» Fondınıñ başkarma direktorı Timur Söläymanow barlık katnaşuçılarga häm oeştıruçılarga räxmätlären belderep uzdılar.
Sessiyagä näticälärne Tatarstan Respublikası Fännär Akademiyase akademigı Indus Tahirow yasadı, töp tezislarnı berläşterde. Anıñ süzläre buença, dürtençe sänägat rewolyutsiyase öndämäläre yaş buınga yullangan. Häm aña cawapnı näk menä yaşlär birergä tieş tä.
Sessiyaneñ axırında barlık ekspertlar da urtak fikergä kilde. Bügenge köndä cämgıyatebez tagın da köçleräk innowatsiyalärgä susagan, törle ölkälärdä eşläüçe belgeçlärgä hönäri üseş kiräk häm zamana tälap itkänçä eş urınnarı buldıru da zarur. Ä töp trend bularak belem birü kala, ul berkayçan da üzeneñ aktuallegen cuymayaçak.
Sälät media-mäktäbe ukuçısı Elwina Girfanowa