Sälät Forumında katnaşuçılar alarnıñ kaygırtuçan kullarında! ← kire kaytirga

19-nçı mart könne «Baytik» BSÜ «Äydamannar mäktäbe»neñ ikençe smenası tämamlandı. Küçmä mäktäp Forumnıñ 6 smenasına da äydamannar komandasın tuplau isäbennän ütkärelde. Öç kön däwamında biredä kiläse yunäleşlär buença uku-ukıtu programması başkarıldı: Forum belän tanışu, äydaman portretı, balalarnıñ säläten üsterü, komanda tuplau, pedagogik situatsiyalärne çişü, şämçeklärne ütkärü ısulları. Älege küçmä smena turında bezgä anıñ citäkçeläre häm katnaşuçıları söyläde.

Albina Kadirowa, Sälät profille alannarına äzerläü üzägeneñ citäkçese:

- Bulgan barlık fikerlärebezne tormışka aşırdık. Sälättä berkayçanda bulmagan katnaşuçılarga üzebezneñ cılı moxitebezne kürsätä aldık. Alar bezneñ oeşmaga gaşıyk bulıp kalgannarına ışanabız. (Elmaya)

Kurs intensiw formatta uzdı. Başkaça bula da almadı. Kön külämle belem-birü programması, az küñel açu çaralarınnan tordı. Läkin, barlık däreslärne dä kızıklı häm mawıktırgıç itep oeştırırga tırıştık. Härber lektsiya törle interaktiwlarga, kuratorlar, komandalar belän eşläü uennarga bay ide. Bezneñçä, nindider mäglümatnı uen formatında üzläşterü küpkä ciñelräk.

Lektsiyalär köndezge 10.00 kiçke 22.00 kadär bardı. Barlık katnaşuçılarga sabırlık öçen zur räxmät! (Elmaya)

Planlaştırgan näticälärgä ireşä aldık dip sanıym. Tik, şuña da karamastan, eşlär yunäleş äle bar. Kiläse elnı uzaçak programma östendä tagın da citdieräk eşlärgä kiräk digän fikergä kildek.

Äydamannar belän eşçänlegebez daimi, berkayçanda tuktamıy. Bu yakşämbe, forumda katnaşır öçen äñgämälär uzaçak. Barlık äñgämälär dä tämamlangaç, komanda eçendä eşläü, barlık 6 forumga da äzerlänü başlanaçak.
  

Aygöl Gabdraxmanowa, «Sälät» Yaşlär Üzäge direktorı:

-          «Äydamannar mäktäbe»neñ ikençe smenası berençesennän, minemçä, ömetlär häm äzerlänü belän aerılıp tordı. Berençesendä katnaşuçılarnıñ 95% Sälätkä barganı bulsa, ikençe smenada katnaşuçılarnıñ 50% barı tik smenada gına bezneñ oeşma belän tanışaçagın añlıy idek.

Bu bik citdi häm möhim punkt. Çönki, näk menä äydamannar sälkeşlärgä Sälät dönyasın açıp birälär. Şuña kürä äzerlek eşläre dä tieşle räweştä alıp barıldı: biregä Sälätneñ profil smenaları belän yakınnan tanış bulgan aktiwistlar çakırıldı.

Äzerlänü üz näticäsen köttermäde: ike smena da ber dulkında, diapazonda ütte. Dörestän dä, oxşaş bulgannar ber-bersenä härwakıt tartıla. Älege äytem bezneñ oçraktta da bik urınlı dip sanıym. Biredä Sälät printsipların, missiyasen urtaklaşuçı, härwakıt xäräkättä buluçı keşelär cıelgan ide. Älege mäktäpne oeştıruçılarga, barlık katnaşuçılarga räxmätläremne äytäsem kilä. «Äydamannar mäktäbe» – eşçänlegebezneñ urtasında, härwakıt igtibar üzägendä buluçı proekt. 

Dinä Gabdraxmanowa, kurator:

   -          Bu tapkır küçmä mäktäpkä üzem öçen yaña roldä – kurator bularak bardım. Läkin, şuña da karamastan, biredä eşläü öçen bik uñay moxit tudırılgan ide.

Şäxsän minem öçen, iñ awırı ul – äydamannar öçen pedagogik situatsiyalärne çişep kürsätü, añlatu ide. Çönki, mondıy situatsiyalär baytak bula, häm alarnıñ barısınıñ da üz çıgu yulları bar.

Bulaçak äydamannarga balalarıgıznı üzegezgz gaşıyk itüegezne telär idem. Alar öçen iñ yaxşıları bulırga tırışıgız!

Regina Zalyaewa, «Äydamannar mäktäbe»neñ berençe häm ikençe smenası katnaşuçısı:

-          Här könne bezgä balalar belän eşläügä bagışlangan küp yaña mäglümat birdelär. Soñınnan, alarnı tulısınça üzläşterer öçen, praktik biremnärne dä ütädek. Ikençe smena berençesennän barı tik Forumga äzerlänü aktsentı belän aerıp tordı.

Ikençe smena bik tiz uzıp kitte. Çönki, biredä sin härwakıt ukıysıñ, aralaşasıñ, yaña mömkinleklär dönyasına çumasıñ!