«Sälät WikiMäktäbe»n xäzer Ispaniyadä dä belälär! ← kire kaytirga

5-7-nçe aprel könnärendä Ispaniyaneñ Donostia - San-Sebastyan şähärendä Wikimedia+education 2019 Conference («Wikimedia+mägarif 2019» konferentsiyase) uzdı.

Wikimedia+education Conference – mägarif ölkäsen üsterüdä wiki-proektlarnıñ burıçın bilgelär öçen, irekle belemnärne taratuçı bötendönya wolonterları cıelgan mäydançık.

Konferentsiyadä 50 ildän 130 wikimediaçı katnaştı. Sälät aktiwistı, «Sälät WikiMäktäbe» proekt citäkçese Timerxan Şäyxetdinow – Rossiyadän berdänber katnaşuçı ide. Ispaniyadän kaytkaç, ul üzeneñ täesirläre belän urtaklaştı.

«Konferentsiyaneñ berençe könendä, açılış tantanası belän başlanıp, Mägarifne üsterü üzägeneñ (Education Development Center) ölkän belgeç-texnologı Meri Byorns ostaxanäse ütkärelde. Ul uku-ukıtuda kullanırlık yaña metodikanı täkdim itte: deep learning. Ikençe köndä isä programmanıñ ähämiyatle öleşe törle tel cämgıyatlärendä mägariftä wiki-proektların kullanu täcribäsen ezlänügä bagışlandı. Aeruça katnaşuçılar kızıksınuın balalar auditoriyasenä yunälgän wikipediya wersiyaläre cälep itte. Şulay uk çaralar tärtibendä katnaşuçılar äzerlägän improwizatsion wakıygalar öçen dä urın birelgän ide.

Min üzem tugan tel öyränüdä wiki-proektlar kontentın üsterü role temasına bagışlangan panel diskussiyagä spiker bularak äzerländem. Şul uñaydan «Sälät WikiMäktäbe» proektın xalıkara auditoriyagä berençe märtäbä täkdim ittem. Şul uk könneñ kiçendä, çara aldınnan äzerlängän posternı kullanıp, min proektnı kiñ auditoriya karşında yakladım.

Bu säyaxätem minem öçen bik möhim: berençedän, min täüge tapkır xalıkara wiki-çarada katnaştım; ä ikençedän... şuşı säfärem çit ilgä berençe tapkır baruım buldı. Törle il wäkilläre belän tanışunı min kiläçäktä «WikiMäktäp» çaralarında kullanırga isäplim. Häm proekt üseşe öçen konferentsiyadä tuplangan täcribä bik möhim», – dip söyläde Timerxan.