Sälät iñ sälätlelären büläkläde ← kire kaytirga

16-nçı fewral könne «Ak Bars» Yaşlär üzägendä sälätle balalar häm yaşlärgä yardäm itüçe Respublikaküläm «Sämrux-2016» el premiyaseneñ büläkläü tantanası uzdı. Anıñ kısalarında Sälätneñ 2016-nçı eldagı eşçänlegenä yomgak yasaldı, iñ aktiw yaşlärne, iñ zur uñışka ireşkän proektlarnı bilgeläp ütelde, Sälät üseşenä üz öleşen kertkän möxtäräm mögalimnärebez, partnerlarıbızga räxmät süzläre citkerelde.

Premiya Tatarstan Respublikası «Sälät» ictimagıy yaşlär fondı häm Tatarstan Respublikası yaşlär eşläre häm sport ministrlıgı belän berlektä oeştırıla. 2016-nçı elda Sälät proektlarında 12 meñnän artık sälätle balalar häm yaşlär katnaştı. Alarnıñ iñ-iñnäre «Sämrux-2016» el premiyasendä üzen tagın ber kat kürsätä aldı.

Bıel Premiya 8 nominatsiya buença uzdırıldı. Citäkçe eşe – başkalar buldıra almagannı buldıra alu. «El direktorı» nominatsiyasendä Albina Kadirowa ciñüçe dip tanıldı. Anı «IT-park» yugarı texnologiyalär texnoparkı direktorı Anton Graçew; «Serwis stil» kompaniyalär törkeme general direktorı Leniza Rizwanowa täbrikläde.

«El ölkän äydamanı» isemenä Dilärä Xalitowa laeklı dip tabıldı. Anı Tatarstan Respublikası Ministrlar Kabinetı apparatınıñ sotsial üseş belän idarä itü bülege citäkçese urınbasarı Almaz Xäbibullin; Kazan şähäre Başkarma komitetınıñ Balalar häm yaşlär eşläre komitetı räise urınbasarı Marat Urazaew täbrikläde.

«El alanı» bularak «Sälät-Ruxiyat» tanıldı. Alanga büläkne Kazan şähäre başkarma komitetı citäkçeseneñ kiñäşçese, Sälät Popeçitellär sowetı ägzası Cälil Söläymanow tapşırdı.

«El sälkeşe» nominatsiyasendä ciñüçe itep Aygöl Şakirowanı Tatarstan Respublikası fän häm mägarif ministrlıgınıñ milli belem birü belän idarä itü bülege citäkçese Gölnaz Ismägıylewa iglan itte.

Sälät tarixına küz salsañ, Sälätneñ 500-dän artık cırı bar ikän. «Sälät cırlıy» nominatsiyasendä barıbıznıñ da küñellärenä Ence Äxmätcänowa kerep kaldı. Aña büläkne kompozitor, Musa Cälil premiyase laureatı Elmir Nizamow; «Rocket records» tawış yazdıru studiyase citäkçese Ayrat Ganiew tapşırdı.

«El pabligı» isemen «Sälät-Yugarı Tegermänlek» klubı pabligı yauladı. Anıñ wäkillären Tatarstan Respublikasınıñ yaşlär eşläre häm sport ministrı urınbasarı Marat Garifullin kotladı.

«El äydamanı» bularak «Sälät-Batır»dan Fännur Şäyxetdinow iglan itelde. «El klubı» iseme «Sälät-Samara»ga birelde.

Maxsus sınnar tapşırudan kala bıel Sälät stipendiyasen dä tapşırdık. Aña Çulpan Fatıyxowa, Läysän Sabitowa, Güzäl Gaynanowa laek dip tabıldı.
«El partnerı» nominatsiyasendä Respublikaküläm «Leto» balalar häm yaşüsmerlär sälamätlegen oeştıru oeşması direktorı Rail Muratşin ciñüçe bularak tanıldı. Bezneñ belän bulganıgızga räxmät! Bez ber yunäleştä eşlibez, alga taba bergä yañ ürlär yaularga yazsın!

«El ostazı» nominatsiyase isä bernindi yarışlarga da bireşmi. Rabit aga Batulla, Indus aga Tahirownı zal tulı Sälätlelär basıp karşı aldı! Räxmät Sezgä, ostazlarıbız, xörmät itäbez, gorurlanabız, ürnäk alabız!

Tantananı Tatarstannıñ atkazangan sängat eşleklese Gölnaz Säfärowa, cırçı Fänil wakkazow, sälätle egetebez Yosıf häm «Sälät» Fondınıñ başkarma direktorı Timur Söläymanow alıp bardı.

Maxsus kunaklarnıñ ostalıgı da tamaşaçılarnı tañ kaldırdı: «Miks stayl» biyu kollektiwın, «Allo» törkemen zal alkışlap ozattı. Tanılgan cırçı Alinä Şäripcanowa Sälät aktiwistları Ence Äxmätcanowa, Säidä Möxämmätcanowa belän berlektä bar säxnäne moñga kümde. Sälät weteranı Ilnaz Safiullinnan başka tantananı küz aldına da kiterep bulmas ide: ul da cır başkarıp uzdı.
Çara «Sämrux» premiyaseneñ gimnı belän tämamlandı.