Kanikullar ütte, ä «Sanak-lab» tudırgan xis-kiçereşlär kaldı! ← kire kaytirga

Kışkı kanikullar ütep tä kitte, ä Bilär cirlege «Fänsar» fän häm mägarif üzägendä uzgan «Sanak-lab» uku-ukıtu laboratoriyase smenasınnan algan xis-kiçereşlär, küñeldä onıtılmaslık täesirlärlär kaldırdı. Älege smenada IT yunäleş belän bik yakın tanış bulgan altmışka yakın aktiw, maksatçan, produktiw yaşlär katnaştı.

Küp kenä katnaşuçılar düşämbedän şimbägä kadär Sälät yortında oeştırılgan däreslärgä yörep, saytlar, prilojeniyalär yardämendä çınbarlıknı tözü, S++ programmalaştıru nigezläre, gamäli matematika häm sistemalı administratsiyaläüne öyrändelär. Balalarnıñ küpçelege üzläre öçen perspektiwalı tarmak açtılar, informatika fäne buença BDI äzerländelär.

Ukıtu programması balalarga ütemle häm mawıktırgıç tel belän añlatıldı. Könneñ berençe yartısında ukuçı üzeneñ saytın yasasa, töşke aştan soñ ul SMM däreslärenä yörergä, saytta mäglümatnı döres tapşırırga, etärergä öyrände.

Citdi belem birü programması mädäni-küñel açu häm sport çaraları belän ürelep bardı. Berençe tapkır «Fänsarniya» uennarı oeştırıldı,

Bilär taularınnan şuu, säxnädä çıgış yasaular buldı. Äydamannar programmanı bik kızıklı, üzençälekle, onıtılmaslık itep yasadılar! Balalar üzläre arasında törle rekordlar kuyıp küñel açtılar.

Oeştıruçılar da, katnaşuçılar da älege smenadan bik kanägat kaldılar.

Lyaysan Sabitowa, smena direktorı:

- Älege smena bik cılı, küñelle uzdı. Älege kanikullar serle Santalardan büläklär alu, koçaklaşular, äkiyati bal, Sälät proektları citäkçese Ädip Älmir belän skayp-oçraşu mizgelläre belän tämamlandı. Balalarnıñ samimi elmayuları, cılı koçaklaşular, kitkändä yaşlär belän tulı küzlär – minem öçen bu iñ yaxşı yaña el kanikulları. Barısın da yaratırga ölgerdem. Äydamannarga, balalardan torgan şäp komandaga bik zur räxmätemne belderäm. Sessiya axırında balalar laboratoriyadä ukunı däwam itergä teläk belderdelär häm bez, alar belän Sälät yortında ütüçe «Sanak-lab» uku-ukıtu laboratoriyasendä oçraşırga kileştek.

Liana Xidiyatowa, katnaşuçı:

- Älege sessiya – elnıñ iñ şäp başlangıçı buldı! Härwakıt monda kilgän saen, min yaña dönyaga elägäm. Bu urınnan kitäse kilmi, küz yaşläre belän öygä kaytıp keräseñ. 6 kön eçendä bez bik yakınaydık, zur ber gailä buldık. Yaña tanışular, million xis-kiçereşlär, şäp däreslär, ostaxanälär, küñelle çaralar, diskoteka, bal öçen – bik zur räxmät. Älege isemlekne çiksez däwam itep bula. 

Kamilya Gıyläcetdinowa, katnaşuçı:

- Bik zur räxmät siña, Sälät, şundıy şäp «Sanak-lab» kışkı sessiyase öçen! Bu könnär bik tiz uzdılar. Min alarnı härçak istä totaçakmın. Direktorım Läysän apa häm äydamannarım – iñ şäpläre. Monda min üzemä küp duslar taptım. Ä çaralar...bal üze genä ni tora! Äkiyati häm onıtılmaslık 2018-nçe elnıñ başlanuı öçen bik zur räxmät!