«Änwär Xäyri ukuları» uzdı ← kire kaytirga

30-nçı noyabr – 1-nçe dekabrdä «Fänsar» fän häm mägarif üzägendä IV Respublikaküläm «Änwär Xäyri ukuları» fänni-gamäli konferentsiyase uzdı.

Sälätneñ älege traditsion çarasına el saen üz tugan yagın häm Bilär tarixın tiränten öyränüçe yaşlär cıela. Bıel Kazan, Yaşel Üzän, Alekseewsk, Aksubay, Norlat, Bolgar, Aznakay häm başka rayonnardan katnaşuçılar bar ide.

Konferentsiya ike kön däwam itte. Berençe könne çaranıñ räsmi açılışı uzdı. Plenar utırışnı Sälät ostazı, tarixçı-arxeolog Fayaz abıy Xucin başlap cibärde. Şunısı kuanıçlı: konferentsiyadä fänni eş äzerläp kilgän ukuçılar häm alarnıñ ukıtuçıları gına tügel, Änwär Xäyrineñ tugannarı, fikerdäşläre, xezmättäşläre häm ostazları da katnaştı.

Konferentsiya fänni eşlär belän tanışudan gına tormadı, katnaşuçıları öçen milli bizäkle kul eşlänmälären yasau buença ostaxanälär häm tarixi-mädäni tematikaga intellektual uen da oeştırıldı. Ä çaranıñ ikençe könendä katnaşuçılar üzläreneñ fänni-ezlänü eşlären täkdim itte. Eşlär berniçä nominatsiya buença kabul itelde:

1️. «Bilär kalası: tarix, bügen häm kiläçäk».

 2️. «Änwär Xäyri mirası».

 3️. «Min yaratam sine, tugan cirem» (misal öçen, mäktäbeñ tarixı, awılıñ tarixı, yaşägän uramıñ tarixı h.b.ş.).

4️. «Gailäm tarixı» (misal öçen, minem şäcäräm, gailäm belän bäyle bulgan istäleklär).