Timur Söläymanow: «Biregä kilep, bez tarixıbıznı däwam itäbez!» kire kaytirga

Timur Söläymanow: «Biregä kilep, bez tarixıbıznı däwam itäbez!»
Kiçä Biektau rayonınıñ «Iske Kazan däülät tarixi-mädäni häm tabigıy muzey-tıyulıgı» territoriyasendä «Sälät – Şäxes», «Sälät – Kama», «Sälät – Ak Büre» alannarı, tanılgan tarixçılar, galimnär, şulay uk mädäniyat häm sängat eşlekleläre cıeldı. Biregä kilgän 350 sälkeş häm kunaklar Sälät moxitenä çumdı, «Iske Kazan» tarixı belän tanıştı. «Iske Kazan» cıenınıñ maksatı – goref-gadätlärne saklau häm tugan yak tarixın öyränü, yaş buınnıñ tatar xalkınıñ tugan telenä häm mädäniyatenä igtibarın arttıru häm tugan cir tabigatenä, tarixına häm mädäniyatenä, duslıkka, mädäniyatara häm etnikara aralaşuga karata ixtiramın arttıru häm mäxäbbät ruxın tärbiyaläü. Çarada Tatarstan Respublikası Yaşlär eşläre ministrı Timur Söläymanow ta katnaştı. «2009 eldan başlap, bez şuşı tarixi urında «Iske Kazan» cıenın ütkäräbez. Bu cirneñ ähämiyate bik zur. Biregä kilep, bez tarixıbıznı däwam itäbez. «Iske Kazan» cıenı Sälätneñ töp maksatı – tatar telen üsterüdä bik zur rol uynıy. Monda yaşlärneñ tarixıbızga, mädäniyatebezgä, telebezgä karata kızıksınuı arta», - dip bilgeläp ütte TR Yaşlär eşläre ministrı Timur Söläymanow. Şulay uk açılış tantanasında sälamläü süze belän Kazan federal uniwersitetınıñ Xalıkara mönäsäbätlär institutınıñ tarix fännäre häm bötendönya mädäni miras yugarı mäktäbe, tarix häm cämgıyat beleme kafedrası professorı Rail Fäxretdinow çıgış yasadı. Ul «Iske Kazan» cıenın çın bäyrämgä tiñläde. «Sälkeşlärneñ biredä tugan yagıbıznıñ tarixı belän tanışa aluı, aña karata kızıksınuları artuı bik söenderä. Şuşı cirdä buluıgız belän sez bötenegez dä - bik bäxetle balalar», - dip belderde Rail Fäxretdinow. Şulay uk «Iske Kazan» territoriyasendä alıp barılgan ezlänülär, muzey tözelü tarixı xakında söyläp ütte. «Iske Kazan» cıenı kısalarında «Hönärlär yarminkäse» oeştırıldı. Katnaşuçılar tanılgan tarixçılar, galimnär belän oçraştı, şulay uk törle kızıklı ostaxanälärdä buldı: çülmäkçelek ostalıgına, kün, agaç häm törle tukımalar belän eşläü serlärenä töşende, milli bizäklär belän tanıştı. Kön däwamında biredä traditsion «Sabantuy» bäyräme bulıp uzdı. Balalar milli bäyrämdä bik teläp katnaştı, anıñ tarixı belän tanıştı, törle uennarda köçlären sınap karadı. «Iske Kazan» cıenı «Aulak öy» dip atalgan zur icadi kontsert belän tögällände. Anda sälkeşlär çıgış yasadılar, üz sälätlären kürsättelär. «Iske Kazan» cıenı «Sälät» Tatarstan Respublikası yaşlär ictimagıy fondı, «Sälät» yaşlär üzäge, Tatarstan Respublikası Yaşlär eşläre ministrlıgı häm Mädäniyat ministrlıgı belän berlektä, şulay uk Tatarstan Respublikası Prezidentı karşındagı tatar telen häm Tatarstan Respublikasında yaşäüçe xalıklarnıñ tugan tellären saklau, üsterü mäsäläläre komissiyase yardämendä oeştırıldı.