El direktorınnan kiñäşlär ← kire kaytirga

«Sämrux-2019» el premiyaseneñ çirattagı nominatsiyase – «El direktorı».

Älege nominatsiyadä barı tik 2019-nçı elda Sälätneñ cäyge profille alannarında ölkän äydaman bulgannar gına katnaşa ala. Bäya birü kriteriyları belän konkursnıñ nigezlämäsendä tanışırga mömkin (saytta SÄMRUX bülegendä).

Uzgan el bu nominatsiyadä Bulat Gaynetdinow ciñü yaulagan ide. Ul bıelgı katnaşuçılarga üzeneñ kiñäşlären birde:

– Berençedän, üz-üzeñä ışanırga kiräk. Iñ möhime – konkursta ciñü tügel, ä katnaşu! Minem öçen üzem kebek ük icadi keşelär belän yarışu bik zur gorurlık buldı. Bu şulay uk üz-üzeñä ışanıç östi, şulay uk täcribä dä birä.

Ikençedän, üzeñneñ portfolioñnı häm el däwamında nilär eşlägäneñne analizlarga kiräk. Siña ciñü kiterä ala torgan aspektlarnı tabarga häm şularga aktsent yasarga.

Öçençedän, çıgışıñnı berençe çiratta üzeñä oşıy torgan itep äzerlärgä. Barı tik şul oçrakta gına sin üz çıgışıñnan täm tabaçaksıñ, monı başkalar da sizmi kalmayaçak!

Ägär sin üzeñne elnıñ iñ yaxşı direktorı dip sanasañ häm monı başkalarga da kürsätergä teläsäñ, «Sämrux-2019» el premiyasendä katnaşu öçen gariza yulla!

Garizalar 25-nçe noyabrgä kadär kabul itelä. selet.biz saytında östä «Sämrux» digän kızıl töymägä yaisä maxsus bannerga bassañ, garizanıñ raslangan forması açılır. Ä portfolionı 2-nçe dekabrgä kadär oeştıru komitetına tapşırırga kiräk.

2-nçe etap – «Katnaşuçılarnı saylap alu. Çittän torıp katnaşu etabı». Bu etapta portfoliolar nigezendä saylap alu karalgan. Wakıtı – 2019 el, 3-nçe dekabr – 6-nçı dekabr.

3-nçe etap – «Katnaşuçılarnı äñgämä nigezendä saylap alu». Kandidatlar belän äñgämäne ekspertlar sowetı uzdıra häm bäya birä. Bu etapnıñ töp maksatı – katnaşuçınıñ eşçänlege turında tulırak mäglümat alu. Biremnärneñ formasın häm eçtälegen ekspertlar bilgeli. Konkurska 5 kön kala, uzdırılu urını, wakıtı häm konkursnıñ eçtälege xakında xäbär itelä. Wakıtı – 2019 elnıñ 11-nçe dekabrennän – 2020 elnıñ 23-nçe gıynwarına kadär.

4 etap – «Tantanalı räweştä premiyane tapşıru». Laureatlarnı häm premiyaneñ ciñüçelären büläkläü 2020-nçe elnıñ fewral aenda uzaçak. «El direktorı» nominatsiyasendä ciñüçegä «Sämrux» sını häm FundSelet platformasında tuplangan akçalata büläk tapşırılaçak.