Tatarstannıñ Biektau rayonında urnaşkan Iske Kazan muzey-tıyulıgında «Sälät-Iske Kazan» profille smenası ütä. Lager sälätle balalar häm yaşlärne tabu, tatar mädäniyaten, telen alga cibärü programması buença eşli. 

Alannıñ töp üzençälege – sälkeşlärgä hönär saylarga yardäm itü. Gamäli master-klasslarda ukuçılar eşçe professiyalär belän tanışalar, üzlären törle ölkälärdä sınap karıylar, maxsus kurslarda kul eşläre belän şögıllänälär. Misal öçen, agaçnı lazer belän kisep yasau, garäp kalligrafiyase, tire mozaikası, floristika, Hand made kebek ostaxanälär uza. 

Uku-ukıtu programmasında törle däräcädäge üz eşeneñ ostaları belem birä. Bügen, yagni 17-nçe awgust könne, mäsälän, cırçı, Sälät weteranı Ilnaz Safiullin biredä däres birä. 

Smena barışında katnaşuçılar tatar xalkınıñ kilep çıgışı, goref-gadätläre, traditsiyaläre häm mädäniyate belän tanışalar. 

Smenanıñ töp çarası bulıp «Iske Kazan cıenı» festiwale tora. Älege cıen inde traditsiyagä äwerelde, ul hönäri kürgäzmädän gıybarät. Biredä Tatarstannan, Räsäy töbäklärennän kilgän sälätle balalar häm yaşlär katnaşa. Şulay uk «Iske Kazan» katnaşuçıları yanına «Sälät-Şäxes», «Sälät-Imänkäy» alannarı sälkeşläre dä kilüe kötelä. Festiwaldä Sälät weterannarı, dusları, ukıtuçıları häm tarix belgeçläre dä katnaşaçak. 

Katnaşuçılar üzläre aktiw räweştä Cıenga äzerlänälär. Här alan üz yunäleşe buença ostaxanä ütkärergä cıena: «Sälät-Şäxes» sälkeşläre säxnädä çıgış yasau serlären çişäçäk, «Sälät-Imänkäy» intellektual uen uzdıraçak, «Iske Kazan» katnaşuçıları «Altın kullar» master-klassın ütkäräçäk. 

Festiwal kısalarında el saen tatar xalkınıñ milli bäyräme Sabantuy uza. Ul bıel da bulaçak. Teläüçelär çülmäk watu, kapçık kiep sikerü, arkan tartışu kebek uennarda üzen sınap karar. 

Yomgaklauçı çara bulıp zur kontsert toraçak. Biredä katnaşuçılarnıñ cır, biyulär, KWN mäzäkläre belän çıgışları kötelä. Barıgıznı da hönär, traditsiya häm tatar tele bäyrämenä çakırıp kalabız: ul 19-nçı awgust könne, 14:00-dä uzaçak. Katnaşu öçen garizalar biredä kabul itelä. 

Bulat Wäliullin, «Sälät-Iske Kazan 2017» smenası direktorı: 

- Smena şäp uza. Balalar bik sälätle. Küzläre ut yanıp tora, ä bu iñ möhime. Bez bu oçkınnardan uçak torgızırga tırışabız.
Smenanıñ direktorı buluımnıñ säbäbe ni disezme? Çönki tatar mädäniyate häm hönäri ostalıgı – küñelemdä aerım urın alıp tora. Balaçaktan uk xalkım tarixı, anıñ hönärläre belän kızıksınıp kildem. Bügen dä şuşı ölkä belän yanıp yaşim. 

Rüzäl Äxmädiew, Sälät-Iske Kazan 2017» smenasınıñ art-direktorı: 

- Sälätne, sälkeşlärne bik yaratam. Biredäge moxit ilhamlandıra, yaşärgä köç birä. Tormışımnı Sälättän başka küz aldına da kiterä almıym!