Bilärdä «Sälät» forumınıñ öçençe smenası – SELET BILER FORUM başlandı ← kire kaytirga

4 iyundä X Xalıkara «Sälät» yaşlär uku-ukıtu forumınıñ öçençe smenası – SELET BILER FORUM-nıñ açılu tantanası uzdı. Bilär muzey-tıyulıgına «Cälät»neñ cäyge profille alannarına saylap alıngan sälätle balalar häm talantlı yaşlär cıeldı. 5 kön däwamında alar belem tuplayaçak, törle sport häm mädäni çaralarda köç sınaşaçak, yarışlarda katnaşaçak.

Oeştıruçılar süzlärenä karaganda, SELET BILER FORUM – forumnıñ iñ töp smenası. Elegräk festiwal formatında uzdırılgan çara zur masştablı «Sälät» Forumına äwerelä.

«Balalar inde üz alannarında atna-un kön yaşädelär, yal ittelär, üzara tanıştılar häm Bilärgä sälätlären kürsätergä kildelär. Älege forumnı bez traditsion dip atıybız, çönki anıñ tarixı monnan 25 el elek başlangan. Xis-kiçereşlär, moxit yagınnan älege forum bötenläy başka. Monda hawanı totıp karap bula dilär, ul şundıy kızu. Iñ cılı, iñ atmosferalı, iñ köçle tawışlı forum bu!» – di «Sälät» yaşlär üzäge direktorı urınbasarı, cäyge alannar koordinatorı Igor Smirnow.

Forumga «Sälät – Rauşan» (Laeş rayonı «Yoldızlı» bazası), «Sälät – Ruxiyat» (Kama Tamagı rayonı, «Argamak» IPÜÜ), «Sälät – Bilär kalası (Bilär, «Fänsar» FMÜ), «Sälät – Batır» (Krutuşka bistäse, «Baytik» BSA), «Sälät – Aznakay» (Aznakay şähäre, «Solnışko» BSÜ), «Sälät – Tulpar» (Başkortstan Respublikası, Tuymazı rayonı, «Babay utarı» kompleksı), «Sälät – Yar Çallı» (Yar Çallı şähäre, «Bumajnik» SSÜ), «Sälät – Saba» (Saba rayonı, Ikşermä awılı, «Ikşermä kadet mäktäp-internatı») alannarı katnaşa.

Kiçen säxnä karşında smenanıñ räsmi açılış tantanası häm «Xorlar yarışı» ütte. Här alan üzeneñ icadi nomerın – xor belän başkarılgan cırın täkdim itte. Kontserttan soñ YUMMY MUSIC BAND törkeme katnaşında open-air uzdı.

Bıel smena soft skills ölkäsendäge aldıngı täcribälärne öyränügä yunälderelä, yagni uñışka ireşüdä möhim bulgan, hönäri üseşne näticäle itä torgan sotsial künekmälärgä bagışlana.

Smena barışında Bilär muzey-tıyulıgın tagın da yaxşırtu mexanizmnarı turında fiker alışu karalgan. Şulay uk Tatarstan häm Rossiyaneñ äydäp baruçı belgeçläre, galim häm sängat eşlekleläre, biznes-trenerları katnaşında ostaxanälär uzaçak.

Uku-ukıtu programması treninglar formatında tübändäge temalar buença ütä: kritik fiker yörtü, añlılık (osoznannost), stresska tüzemlelek, emotsional intellekt, yaraklaşu, üz-üzeñä ışanıç h.b.

Şulay uk smena barışında «Tel häm tarix», «Ekologiya» häm «Totrıklı üseş maksatları»na bagışlangan mäydançıklar eşläyaçäk.