Bilärdä «Sälät» forumınıñ iñ icadi smenasınıñ açılış tantanası uzdı ← kire kaytirga

Bilär tarixi-arxeologik muzey tıyulıgı territoriyasendä XI Xalıkara «Sälät» yaşlär uku-ukıtu forumınıñ ikençe smenası - ICAT BILÄR FORUMnıñ (Tworçestwo/Arts) açılış tantanası uzdı.

Açılış tantanasında sälamläü süze belän Tatarstan Respublikası Ministrlar Kabinetı Apparatı mädäniyat häm Tatarstan Respublikası xalıkları tellären üsterü idaräse başlıgı Läysän Nizamowa çıgış yasadı.

«Min sezne bıel Bilär forumda sälamläwemä ikelätä şatmın. RF Prezidentı ukazı buença, bu el Rossiya xalıklarınıñ xalık sängate häm matdi bulmagan mädäni mirası elı dip iglan itelde. «Sälät» forumın oeştıruçılarga monda çın tatar moxiten tudırgannarı öçen zur räxmätemne belderäm», - dip bilgeläp ütte Nizamowa.

Tatarstan Respublikası Prezidentı Röstäm Miñnexanow yardäme belän ICAT BILÄR FORUM (Tworçestwo/Arts) smenası forum kısalarında inde 5 el rättän uzdırıla. Ul bıel da uzgan eldagı şikelle biyu, muzıka, teatr yunäleşläre buença laboratoriyalär formatında uza. Katnaşuçılar, icadi törkemnärgä berläşep, ostazlar belän kollaboratsiyadä yaña icadi proektlar äzerläyaçäk häm smena yabılışında alarnı täkdim itäçäk.

Muzıkal yunäleşne cırçı, aktrisa, wokal buença ukıtuçı Zärinä Wildanowa citäkli, teatr yunäleşe G.Kariew isemendäge Tatar däülät yaş tamaşaçı teatrı akterı häm rejisserı Liliya Nurel citäkçelegendä uzaçak. Biyu yunäleşe citäkçese - xoreograf, biyuçe häm ukıtuçı Wenera Galimowa.

Icadi laboratoriyalär kuratorları: Ayrat Nurkaew, Nikita Sawelew häm Marat Fäyzullin (muzıka), Marsel häm Mariya Nuriewlar, Ewgeniy Yuşkow häm Ewgeniya Turuşkina (biyu), Bulat Minkin, Ruslan Abrarow, Ilnur Garifullin (teatr).

Bu el yañalıklarınıñ berse - kollektiw citäkçeläre öçen maxsus «Ostaz» uku-ukıtu programması buldıru. Proekt kısalarında balanı şäxes bularak tärbiyaläü, dustanä mönäsäbätle kollektiw buldıru, anı üsterü temalarına bagışlangan sessiyalär häm ostaxanälär uzaçak.

«Mondıy proekt buldıru ideyase berençe smenadan soñ uk barlıkka kilde. Bez balalarga intensiw programma äzerlädek, ä alarnıñ citäkçeläre öçen berni dä bulmadı. Alarga da yaña belemnär tuplau mömkinlege biräse, şulay uk citäkçelär üzara aralaşa häm täcribäläre belän urtaklaşa alırday mäydançıklar buldırası kilde», - dip söyläde «Ostaz» proektı citäkçese Dilärä Yakubowa.

Spikerlar arasında Tatarstan häm Rossiyaneñ aldıngı mädäniyat häm sängat eşlekleläre: Andrey Rudenko, Elwina Babaewa, Alyona Wdowiçenko, Luiza Skipina häm Gölnaz Säfärowa. Uku näticäläre buença tügäräk östäl uzaçak, anda katnaşuçılar täesirläre häm täcribäläre belän urtaklaşa alaçak.

Ostaxanälärne häm katnaşuçılar öçen icadi oçraşularnı Tatarstannıñ atkazangan artistı Elmira Kälimullina, xoreograf, «Altın bitlek» milli teatr premiyase iyase Nurbäk Batulla, kinokompozitor häm saundprodyuser Nikita Sawelew, pianist häm kompozitor, Tatarstan Respublikasınıñ atkazangan sängat eşleklese Elmir Nizamow, Tatarstannıñ atkazangan artistı Marina Yaselskaya, Tatarstannıñ atkazangan artistı Rişat Äxmädullin, «El Deseo» studiyasenä nigez saluçı, anıñ citäkçese Gölsinä Galimullina häm başkalar ütkäräçäk.

«Canlı Sälät» (SeletLive) turıdan-turı efirlar studiyase üz eşen däwam itäçäk. Translyatsiyalär forumnıñ WKontakte häm YouTube räsmi akkauntlarında alıp barılaçak.