Bilärdä «Sälät» forumınıñ media smenası tämamlandı ← kire kaytirga

Bilärdä «Sälät» forumınıñ dürtençe smenası - Media Bilär Forum (Media /Media) tögällände.

Forumga Samara, Perm, Irımbur ölkälärennän, Mariy El, Mordowiya, Başkortostan häm Tatarstannıñ barlık rayonnarınnan 950 bala kilde.  Katnaşuçılar arasında - fän olimpiadaları, konferentsiyalär ciñüçeläre häm prizerları, töbäk Sälät klubları liderları häm Tatarstan Respublikası rayonnarı häm mäktäpläre aktiwistları.

Smena zamança mediaresurslarga bagışlandı. Uku-ukıtu programması wakıtında katnaşuçılar jurnalistika, foto häm wideo, podkastlar, bloging häm sotsial çeltärlär buença kontent buldıru üzençälekläre turında belä aldılar.

Alar öçen däreslärne, ostaxanälärne Tatarstan häm Rossiyaneñ äydäp baruçı belgeçläre: mediakouç, Sankt-Peterburg spikerları Assotsiatsiyase ägzası Olga Giwerskaya, SMM, marketing ölkäse belgeçe Alinä Gimaltdinowa, «Gorodskie intonatsii» mediaproektı citäkçese Mansur Äxmätşin, bloger Rusina Semenenko, kreatiw prodyuser, YuIM spikerı Warwara Kuzmina, Mäskäü Politexnik uniwersitetı ukıtuçısı Ekaterina Fedorowskaya häm başka bik küp belgeçlär uzdırdı.

Ostaxanälärdä häm icadi laboratoriyalärdä hönär saylau, media-tirälektä eşläü häm portfolio buldıru öçen möhim künekmälärne öyränü temaları kütärelde.

Här kön kızıklı däreslär häm uennar, sport yarışları häm mädäni kiçälär belän ürelep bardı. Traditsion «EkoSälät» festiwale, futbol, şaxmat buença çempionatlar häm djem-sessiyalär uzdı.

Forum territoriyasendä G. Kamal isemendäge TDATnıñ «Şärık klubı» tatar teatrı tarixınıñ interaktiw multimediya kompleksınnan fotozona häm uku-ukıtu programması belän interaktiw mäydançık oeştırıldı.

Icadi laboratoriyalärdä katnaşuçılar üz ostazları belän fotoga töşerergä, wideokontent häm podkastlar yazdırırga öyrändelär. Laboratoriyalärne BIM-radio alıp baruçısı Ruslan Baldin, Skyeng YouTube-kanalı rejisserı häm prodyuserı Ekaterina Germ-Uwarowa häm fotograflar: Insaf Äxmätşin, Anastasiya Iwanowa häm  Robert Şakirow citäkläde.

Şulay uk smenada Sälät klubları citäkçeläre öçen maxsus «Ostaz» uku-ukıtu proektı üz eşen däwam itte. Spikerlar bulıp, «Adımnar» mäktäplärendä «Sälät sıynıfı» proektı citäkçese Aynur Camaletdinow häm Rossiya yaşlär berlegeneñ trenerları assotsiatsiyase trenerı Polina Kuzmina çıgış yasadı.

«Bu smenada «Ostaz», berençe çiratta, Sälät klubları belän eşläde, çönki alar härwakıt iñ initsiatiwalı balalardan torgan här eşçänlekneñ üzägenä äwerelä. Bez şuşı balalar häm alarnıñ citäkçeläre öçen ostaxanälär häm uku-ukıtu sessiyaläre ütkärdek. Alarda aralaşu, komanda tözü temalarına basım yasadık. Monnan tış, forumda «Klublar yarminkäse» oeştırıldı, anda sälkeşlär üz kazanışları turında ber-bersenä genä tügel, barlık forum katnaşuçılarına da söyli aldılar», - dip urtaklaştı «Ostaz» programması koordinatorı Aygöl Wäliullina.

Sälättä ekologiya teması zur rol uynıy. Forumda eko-bakça üz eşen däwam itte häm eko-yunäleş buença törle aktiwlıklar: tabigatne saklau häm ekologik şartlarnı yaxşırtu mäsälälärenä bagışlangan ostaxanälär häm praktik däreslär ütte.

«Ekologiya — Sälättäge ütäli temalarnıñ berse, bu yunäleştä eş sigez el däwamında alıp barıla. Bu wakıt eçendä küp närsä üzgärde: eko-däreslärneñ berençe katnaşuçıları inde üzläre oeştıruçılar buldı, kayberäülär ekologiya buença yugarı belem aldı häm forumga spiker bulıp kilde — balalar bu tema belän mawıgalar», — dip büleşte eko-yunäleş citäkçese Diana Gazimowa.

Forumda «Canlı Sälät» turı efirlar studiyase şulay uk eşçänlegen däwam itte. Efirlarda «Sälät» media-üzäge citäkçese Alsu Ganeewa, eko-yunäleş citäkçese Diana Gazimowa, «Şärık klubı» xezmätkäre Göldaniya Zinnät, improwizatsiya akterı Ilya Şalaşow häm Black Star reliz-menedjerı Nastya Belıx katnaştı. Tapşırularnıñ yazmaların härkem forumınıñ räsmi WKontakte häm YouTube akkauntlarında karıy alaçak.

Şulay uk smena däwamında Sälät radiostantsiyase eşläde, ul forum katnaşuçılarına matur cırlar, kızıklı äñgämälär häm kütärenke käef büläk itte. Radiostantsiyadä kunakta smenanıñ art-direktorı Rezedä Abdullina, «Sälät» media-üzäge citäkçese Alsu Ganeewa, «Kodrak xan» alanı direktorı Diliyar Borhanow, forumnıñ KPP citäkçese Ilham Galiullin häm «Janlı Sälät» alıp baruçısı Rädif Äxmädiew buldı.

Yomgaklau kiçke çarasında «Mingazov» tatar kawer-törkeme katnaşında open-air uzdı.

Alda katnaşuçılarnı «Sälät» forumınıñ bişençe smenası — MÄGLÜMATI TEXNOLOGIYaLÄR BILÄR FORUM (Informatsionnıe texnologii / Information Technologies) kötä, ul mäglümati texnologiyalär keşe tormışınıñ böten ölkälärendä dä möhim rol uynawına ışanuçılarnı berläşteräçäk.

Anıñ kısalarında geymifikatsiya aşa forumnıñ töp yunäleşlären: IT häm mägarif, IT-trendlar, IT häm biznes, digital-hönärlär açuçı profille ostaxanälär häm uku-ukıtu mäydançıkları gamälgä aşırılaçak. Smenanıñ ütkärelü wakıtı: 28 iyul - 3 awgust.

Xalıkara «Sälät» yaşlär uku-ukıtu forumı Tatarstan Respublikası Xökümäte, TR Yaşlär eşläre ministrlıgı häm TR Mägarif häm fän ministrlıgı yardäme belän uzdırıla.