TURI EFIRDA – ICAT! ARTS BILER FORUM SMENASI BAŞLANDI ← kire kaytirga

Bilär muzey-tıyulıgında X Xalıkara «Cälät» yaşlär uku-ukıtu forumınıñ ikençe smenası start aldı. ARTS BILER FORUM räsmi räweştä açık!

Bilär cirlegenä kilügä balalar Sälät dönyası häm forum programması belän tanışa aldı. Kiçen Tatarstan rayonnarı belän berrättän kürşe ölkälärdän kilgän icat kollektiwları häm aerım başkaruçılar sälkeşlär säxnä yanında bergä cıeldı.

Räsmi açılış tantanası çaranı oeştıruçılar komandası belän tanışudan başlandı. Säxnä türenä muzıka, teatr, biyu yunäleşläre citäkçeläre çakırıldı:

«The Cheeklaweek» muzıkal proektı awtorı häm citäkçese, Räsäyküläm häm xalıkara wokal konkursları häm festiwalläre laureatı, «Yummy music» bäysez muzıkal leyblı artistı – Zärinä Wildanowa muzıka yunäleşe öçen cawap birä. Biyu yunäleşe citäkçese – xoreograf-kuyuçı, biyuçe, yugarı kategoriyale pedagog, «Ploşçad swobodı» zamança xoreografiya festiwale art-direktorı Wenera Galimowa. Kazannıñ yaş tamaşaçı teatrı häm «Jiwoy gorod» zamança sängatne üsterü Fondı proektları akterı häm rejisserı Liliya Nurel teatr yunäleşe öçen cawaplı.  

«Bezneñ ARTS BILER FORUM-da el saen katnaşa torgan laureatlarıbız bar. Alarnı küzätep barabız. Balalar tagın da yugarırak däräcädä çıgış yasıy. Alarga sıyfatlı material birergä tırışabız, şuña kürä eldan-el köçleräk spikerlar kilä, – di Zärinä Wildanowa. – Uzgan el belän çagıştırganda, bıel forum 2 köngä ozagrak däwam itä. Bu isä wakıt, spikerlar sanı, mömkinleklär kübräk digän süz!»

Muzıka, biyu häm teatr yunäleşlärendä 9 icadi laboratoriya bulaçak. Bu – forumnıñ töp yañalıgı. Smena däwamında balalar TR häm RF ekspertları belän berlektä ör-yaña proekt äzerläyaçäk. Sälätle yaşlärneñ häm ostazlarnıñ icat cimeşen 30 iyundä Gala-kontsertta kürä alaçakbız.

ARTS BILER FORUM başlanu belän «SeletLive» proektına da start birelde. Xäzer forum moxitenä öydän çıkmıyça da kuşılıp bula. Translyatsiyalär forumnıñ räsmi akkauntlarında: Instagram, WKontakte häm YouTube wideoxostingında alıp barıla.

«SeletLive» – ul kır şartlarında eşli torgan berdänber studiya, unikal proekt. Monda zur komanda eşli: wideooperatorlar, alıp baruçılar, administratorlar, kreatiw öçen cawap birüçe keşelär. Bıel çıgarılışlar berençe tapkır ARTS BILER FORUM-ga turı kilde. Kızıklı material äzerläü öçen potentsial bik küp, çönki, kaya karama, böten cirdä icat keşese! Häm bezneñ töp burıç – alarnıñ bar säläten «SeletLive» aşa dönyaga kürsätü – di «SeletLive» proektı administratorı, Sälät Klubınıñ XII prezidentı Timerxan Şäyxetdinow.