Sälät aktiwı mäktäbendä 11 yaña proekt täkdim itelde ← kire kaytirga
8-11-nçe oktyabrdä «Fänsar» fän häm mägarif üzägendä Sälät aktiwı mäktäbe uzdı.
Anda 34 student häm mäktäp ukuçısı katnaştı. Katnaşuçılarnıñ 80 protsentı – studentlar, 20 protsentı – mäktäp ukuçıları. Mäktäp ukuçıları «AkBüre» häm başka alannardan üzläre tözegän proektlar nigezendä saylap alındı. Studentlar törle şähärlärdän kilgän ide: Kazan, Tübän Kama, Älmät, Bögelmä, Yar Çallı, Yaşel Üzän.
Katnaşuçılarga menä kemnär belem birde:
- PROFI.RU attestatsiyalängän ukıtuçısı, Xalıkara «Cälät» yaşlär uku-ukıtu forumınıñ intellektual turnirı citäkçese, Sälät mäktäbe ukıtuçısı Anna Şarafeewa;
- M.I. Mäxmütow isemendäge «Fänsar» mäktäbe citäkçese, KFUnıñ MTIS yugarı mäktäbe ölkän ukıtuçısı Elina Nasibullina;
- «Rossiya-Islam illäre xezmättäşlege» xalıkara proekt ofisı citäkçese, Sälät aktiwistı Tahir Nasibullin;
- Tatarstan Respublikası Studentlar ligası proektlar ofisı citäkçese, Tatarstan Respublikası Däülät Sowetı deputatı yardämçese Adel Näcipow;
- Formal bulmagan belem birü trenerı, grantrayter, uku-ukıtu produktları dizaynerı, jurnalist, Sälät aktiwistı Gölşat Gabdraxmanowa;
- Sälät berläşmäseneñ icadi proektları koordinatorı, «Sälät» yaşlär üzäge metodistı Aygöl Wäliullina.
Barlıgı 11 proekt täkdim itelde. Mäsälän, berse – «Sälät Çeltär» dip atalgan media mäktäbe. Bu – Sälät kısalarında SMM, foto, wideo, media-prodakşn ölkäsendä belgeçlär äzerläü buença mäktäp. Näticäse bularak, şunda ukıp çıkkan keşelärgä törle Sälät proektlarında, alannarında praktik yaktan täcribä tuplau mömkinlege birü küzdä totıla. Tagın ber proekt – Sälätneñ turistik klubı. Asılı – tabigatkä çıgıp, bilgele ber mädäni programma nigezendä wakıt uzdıru, yal itü. Aeruça tarixi häykällärebez buença turistik säfärlär oeştıru niyatlänä.
– Xäzer här proektnıñ wäkile belän Sälät Yortında oçraşular başlanaçak, plannar töziyaçäkbez. Ädip Älmir üzeneñ xuplawın belderde. Sälät aktiwı mäktäbendä täkdim itelgän proektlar ideya genä bulıp kalmayaçak. Alarnı tormışka aşıru yunäleşendä eş alıp barılaçak. Ä iñ şäp dip tabılgan proekt fewral aenda «El proektı» premiyase belän büläklänäçäk, – dip söyläde Sälät Klubı prezidentı Timerxan Şäyxetdinow.