Wasıyl Garifullin: «Sälät berläşmäse yaşläre bar eşne dä buldıra!» ← kire kaytirga

Sälät media-mäktäbe ukuçıları «Bezneñ fiker» tatar telendäge debatlar ligasında katnaştılar. KFUnıñ tatar jurnalistikası kafedrası mödire, galim Wasıyl Zahit ulı Garifullin belän berlektä Sälät aktiwistları fikerlären tögäl häm kamil itep citkerergä öyrändelär, bügenge cämgıyattäge jurnalistikaga kagılışlı aktual mäsälälär xakında fiker alıştılar, kunagıbızga üzlären kızıksındırgan sorauların birdelär. Häm, älbättä, ukuçılar jurnalistika fakultetında uku turında da soraştırdılar.

«Sälät media-mäktäbe bik kızıklı uza ikän. Anıñ ukuçıları, gomumän, Sälät aktiwistları belän aralaşıp Sälät berläşmäse yaşläre bar eşne dä buldırganına tagın ber kat inandım. Bügenge därestä bez debatlar gına uynap kalmadık, räxätlänep basma häm elektron jurnalistika turında söyläştek. Yaş buınnıñ fikeren tıñlıysı üzemä dä kızık buldı. Çakırganıgız öçen räxmät!» – dip belderde Wasıyl Zahitowiç.

Media-mäktäpneñ programması Tatarstan Respublikası sälätle yaşlären media-moxit belän tanıştıruga, alarda jurnalistikaga karata mäxäbbät tärbiyaläü, icadi sälätlären açuga yunälderelgän.

Sälät media-üzäge häm HAVA Projects media-kompaniyase  xezmätkärläre belän berlektä ukuçılar, çın mägnäsendä, jurnalistika dönyasında yözälär: yazuçılık sälätlären üsterälär, foto-, wideosängat, prodyuserlık ostalıgı belän kızıksınalar. Inde kübeseneñ portfoliosın bezneñ saytta elengän, şähär häm respublikabız massaküläm mäglümat çaralarında basılgan materiallar bizi. Kursnıñ iñ kızu çagı citep kilä. 27-30-nçı aprel aralıgında «Fänsar» fän häm mägarif üzägendä berençe «Sälät Media mäktäbe» smena-bäygese uzaçak. Anıñ näticäläre buença VI  Xalıkara yaşlär uku-ukıtu forumı media-üzägeneñ komandası oeşaçak.