Wasil Şayxraziew: «Ukıgız, öyränegez, buldırıgız!» ← kire kaytirga

27-nçe iyul könne VI Xalıkara yaşlär uku-ukıtu Sälät forumında Tatarstan Respublikası Premer-ministrı urınbasarı Wasil Gabtelgayaz ulı Şäyxraziew katnaştı.

Berençe eş itep witse-premer eldan-el üsüçe «Fänsar» fän häm mägarif üzägendä kunak buldı. Şuşı üzäktä yal itüçe «Sälät-Sanak» kompyuter smenası katnaşuçıları  möxtäräm kunaknı Sälät sörännäre belän karşı aldı. Alar belän tanışıp, aralaşkannan soñ Wasil Gabtelgayazowiç bıel gına Tatarstan Respublikası Prezidentı Röstäm Miñnexanow tarafınnan açılgan «Ädip yortı»na yunälde. Biredä ul IT-texnologiyalär buença berniçä däresne tıñladı,  uku-ukıtu programmasınıñ näticälelege belän tanıştı, Sälät aktiwsitları belän aralaştı. Oçraşuda yaş buında intellektual häm ruxi potentsial tärbiyaläü xakında söyläştelär. Monıñ öçen berençe çiratta sälätle balalarnı saylap alu, bergä cıyu häm tuplau kiräk ikän.

Cäyge proektlar kuratorı Albina Kadirowa kunagıbızga Sälät xäräkäte katnaşuçılarınıñ respublikaküläm, bötenräsäy fän olimpiadaları ciñüçeläre, törle bäyge laureatları buluı xakında belderde. Berläşmäneñ proektlarında katnaşu öçen garizalar portfolio-selet.ru saytında kabul itelä, annarı biredä balalarnıñ kazanışları belän portfolio buldırıla. Sälätle balalar belän eşläü öçen «Äydamannar mäktäbe»n ütkän sälätle studentlar cıela.

«Bäläkäç» balalar klubı kuratorı Alsu Salawatowa Sälät berläşmäseneñ iñ keçkenä katnaşuçıları belän tanıştırdı. Kazandagı Sälät yortında, atnasına 2 tapkır Sälät gailäläre balaları öçen däreslär birelä. Ä Forumda sälkipuşlar tärbiyaçelär, törle ukıtuçılar belän ostaxanälärgä yöri.

Wasil Gabdelgayazowiç eşçänlek buença üzeneñ kiñäşlären birde. Şunnan soñ Forumnıñ töp eş mäydançıgı – palatkalı şähärçekkä yunälde. Sälät weteranı Ilnaz Safiullin başkaruındagı «Bez bäxetle» cırına sälkeşlär zur biyu fleşmobı äzerläp kuygannar ide. Kunagıbız şuşı küreneş belän dä soklana aldı.

«Xäerle kön, duslar! Ber sägat däwamında Forumnı küzätep yörim, söenep betä almıym. Sälät dönyasın öyränäm, aktiwistlarıgız belän tanışam. Forum üz aldına bik zur maksat häm burıçlar kuygan. Yaşlär belän bergä tarixıbıznı öyränäbez, kiläçäk turında uylanabız. Kiläçäk bezne kübräk kızıksındıra, tik ütkänne belmiçä anı tözep bulmasın añlarga kiräk. Bügenge köndä respublikabızda yaşlärneñ sälamätlegen häm yalın kaygırtuçı şaktıy oeşma eşläp kilä. Kübeseneñ aerım ber profile dä bar. Bezneñ ata-babalarıbız – tatarlar. Bez monıñ belän gorurlanırga, şunıñ nigezendä telebezne üsterergä tieşbez! Bügenge kebek yunäleşlär bik küp bulgan zamanda uñışlı kiläçäk öçen ni kirägen tögäl añlau kiräk. Bu – citäkçelek eşe. Xakimiyatebez häm şäxsän üz isememnän kaynar sälamlim sezne! Ukıgız, öyränegez, buldırıgız! Irtägä Tatarstan sezneñ kullarda bulaçak», - dip belderde Wasil Şäyxraziew.

Smena däwamında Forum territoriyasendä «Sälät-FM» radiosı yañgırıy. Ul bıel «Tatar radiosı» yardäme belän tormışka aşırıla. Anıñ alıp baruçısı Ramil Şäräfiew kunagıbızdan interwyu aldı.

RADIO ÄÑGÄMÄ

-         Wasil Gabdelgayazowiç, niçek Sezgä Forum?

-         Respublikabızda yaşlär öçen yal itü, belem alu, maxsuslaşu öçen oeşmalar şaktıy. Canıñ telägän yunäleşne dä saylap alıp bula. Cäyge lagerlär här munitsipal rayonda da bar diyarlek. Palatkalısı da, traditsion lagerlär dä baytak. Forumnar da yuk tügel. Ä Sälät Forumı – iñ masştablı häm ähämiyatlelärneñ berse. Urını da bezneñ öçen izge cirlärdän sanala. Ul Kazanda da ütä alır ide. Tik Bilär cirenä kaytıp balalar tarixıbıznı öyränä, ata-babalarıbız sukmagınnan yörilär. Häm, älbättä, tugan telebezgä, goref-gadätlärebezgä tugrı kalalar. Äle kır şartları katnaşuçılarda ixtiyar köçe dä tärbiyalärgä yardäm itä. Palatkada yaşäp sin tabigat belän berläşäseñ. Forumnıñ iñ möhim öleşe – anıñ programması. Biredä balalar tanılgan şäxeslär belän oçraşa, täcribä urtaklaşa.

-         Forumnıñ berençe smenası artta kaldı. Inde ikençe smena tämamlanırga da küp kalmadı. Bälki, 3 smena da kiräkter dip sanamıysızmı?

-         Berençedän, çaranı ütkärü öçen eldan-el byudjetnı arttırıp torabız. Ikençedän, forum üsä, kamilläşä. Ägär dä 2 smenadan soñ sıyfatlı häm kiräkle produkt kilep çıga ikän, nişläp äle 3-nçe smenanı da buldırmaska?

-         2-nçe smena katnaşuçılarınıñ 70% berençe tapkır Sälätkä kilep, Bilär cirenä ayak bastı. Alarga teläkläregez?

-         Forumnı kürgän balalar – bäxetlelär. Forumnıñ här mizgelennän täm tabıgız!

GOMUMI OÇRAŞU

Radio äñgämädän soñ kunagıbız Forumnıñ katnaşuçıları häm oeştıru komitetı belän turıdın-turı da aralaştı. Oçraşuda Forumnı kamilläşterü sorawı kütärelde, katnaşuçılar teläklären, kiñäşlären belderdelär.

«Forum şäxes üsterergä yardäm itä. Sineñ yanda üsärgä äzer buluçı keşelär toru – üzeñne dä üseşkä etärä. Biredä tanışıp, duslaşıp, öyläregezgä taralışkaç ta sotsial çeltärlär aşa aralaşıp torırga onıtmagız. Sez – bezneñ kiläçägebez. Irtägese kön – sezneñ öçen. Respublikabız citäkçelege sezne uñışlı häm çempionnar bularak kürergä teli. Sez – afärin!» - dip belderde Tatarstan Respublikasınıñ Premer-ministrı urınbasarı Wasil Şäyxraziew.

Afärin!