Cäyge smenalar uzaçak bazalar belän tanıştık ← kire kaytirga

Sälät aktiwistları Yar Çallı şähärendäge «Bumajnik» häm «Saulık» bazaları belän tanışıp kayttı.

Bilgele bulgança, bıel Laeş rayonındagı «Yoldızlı» bazasında kapital tözekländerü eşläre kötelä. Şunlıktan bu bazada ütä torgan kayber smenalar bıel Yar Çallıda uzaçak. Mäsälän, «Sälät-Tel» häm «Sälät-Rauşan» smenaları.

Berençe eş itep «Sälät-Ruxiyat» häm «Sälät-Yar Çallı» smenaları uzaçak «Bumajnik» bazasında buldık. Bu baza sälätlelärgä tanış inde. «Sälät-Yar Çallı» smenası da, «Sälät-Ruxiyat» tä şuşında ütkärelgäne bar. Ä kış köne «Sanak-lab» uku-ukıtu laboratoriyaseneñ küçmä sessiyase näk menä şuşında uzdırılgan ide.

«Bez monda inde dürtençe tapkır kiläbez. Baza şäp. Tabigat koçagında, narat urmanı eçendä urnaşkan. Monda saf hawa, bik çista-pöxtä. Häm bezne bik köçle komanda kötä. Balalar bu bazanı bik oşatıp kitälär, şuña kürä bez monda inde dürtençe tapkır kaytabız», – di «Sälät» yaşlär üzäge direktorı Aygöl Gabdraxmanowa.

Oşatmaslık ta tügel: «Bumajnik»ta böten şartlar da bar. Zur aktlar zalı, irken aşxanä, uramda kiçke çaralar uzdıru öçen mäydan häm zur säxnä. Yaşäü korpusları çista-pöxtä. Öç keşelek bülmälär, här bülmädä bädräf häm yuınu bülmäse bar. Balalar bik yarata torgan basseyn da, munça da bar bu bazada!

Oçraşuga «Bumajnik»ta uzaçak smenalarnıñ direktorları häm ölkän äydamannarı kilgän ide. Alar üzlären kızıksındırgan sorauların birde, korpuslarnı karap çıktılar.

Bez bargan ikençe kompleks – «Saulık». Şulay uk urman eçendä urnaşkan bu zur kompleksnıñ eçendä berniçä baza bar. Şularnıñ bersendä bıel «Sälät-Tel» häm «Sälät-Rauşan» smenaları uzaçak. Bu bazada da böten şartlar da bar. Başcitäklär kanägat kaldı, sälkeşlärgä dä oşar!