Hönär saylau – kiläçägeñne saylau digän süz ← kire kaytirga

X Xalıkara «Cälät» yaşlär uku-ukıtu forumınıñ berençe smenası kiläçäk hönärlärenä bagışlangan. Spikerlar balalarnı zamança yunäleşlär belän tanıştıra. Küplär öçen forum kiläçäktä hönär saylau öçen etärgeç birä. 

«Kiläçäktä kem bulaçagımnı, kaysı ölkädä eşlärgä telägänemne ozak wakıt añlıy almıy yördem. Monnan berniçä el elek «Sälät» forumında radio buença master-klasska eläktem. Andagı moxit, spikernıñ söylägännäre küñelemne şulkadär yaulap aldı ki, smena tämamlanganda inde min jurnalistika fakultetına keräçägemne häm kiläçäktä radioda eşlärgä telägänemne añladım» – dip söyli Ilüzä Kasıymowa. Şunısı kızık, bu forumga ul «Sälät» radiosınıñ alıp baruçısı bularak kilgän. 

Bıel Junior Skills Biler Forum-nıñ belem birü programmasında robototexnika, modelläşterü häm dizayn yunäleşläre aerım urın alıp tora.

Rossiya dizaynerlar berlege Witse-prezidentı, Rossiyaneñ atkazangan mädäniyat xezmätkäre, Olimpiya obektları awtorlarınıñ berse Yuriy Mençits balalarga dizayn nigezläre häm Soçidagı Olimpiya şähärçege niçek tözelüe xakında söyläde. 

«Yugarı uku yortında ukıtkaç, monda, balalar yanında, lektsiyalär niçek ütär ikän dip borçılgan idem. Ämma «Sälät»täge yaşlärneñ yugarı intellekt däräcäsen bilgeläp ütäsem kilä. Mine mondagı moxit, sälkeşlärneñ aralaşuı şakkattırdı: küreşkändä isänläşüläre, master-klasslardan soñ kilep aerım räxmät äytüläre bik söenderde», – dip xis-kiçereşläre belän urtaklaştı Yuriy Mençits. 

Kazan däülät arxitektura-tözeleş uniwersitetınıñ ölkän ukıtuçısı, arxitektorlar berlege ägzası Marina Däülätgäräewa belän berlektä balalar interer dizaynına kagılışlı kollajlar yasadı, ör-yaña park proektın äzerläde. 

«Hönär saylau – kiläçägeñne saylau digän süz bit ul. Kızıksındırgan eşeñ turında mömkin kadär kübräk belem tuplarga kiräk. Şunıñ öçen dä üz hönäreneñ çın ostaları belän aralaşu möhim. Spikerlar bit däres kenä ukıtıp kalmıy, üseş tarixları belän dä urtaklaşa. Balalarga ciñü genä tügel, ciñelülär xakında da söylärgä, awır çaklarnı niçek döres ütkärep cibärergä ikänen dä añlatırga kiräk» – di Marina Däülätgäräewa. 

«Letayuşçaya robotexnika» laboratoriyase mödire Pawel Şişkin Bilär cirenä programmalaştırıla torgan kwadrokopter konstruktorı belän kilgän. Ul katnaşuçılarga apparatnıñ awtonom oçışların niçek başkaruı, nindi ölkälärdä kullanıluı turında söyläde.

«Üzebez belän pilotsız oça torgan apparatlar da alıp kildek. Barlık kurkınıçsızlık çaraların kürep, balalar alarnı çatır eçendä oçırtıp ta karadı. Därestä bez Tatarstanda kwadrokopterlar kaıysı ölkälärdä kullanılırga mömkin buluı turında fiker alıştık», – dip bilgeläp ütte Mäskäüdän kilgän kunak. 

Mäskäü politexnik uniwersitetınıñ proekt eşçänlege üzäge assistentı Mixail Gluşkow ukuçılarga fizik häm ximik täcribälärdän torgan fänni şou kürsätte. 
«Fänne populyarlaştıru öçen şundıy şoular yasıym. Ämma däres küñel açuga gına korılmagan, töp maksatım – balalarga belem birü. Kızganıç, küp kenä mäktäplärdä fizika da, ximiya dä nindider ber standart buença gına ukıtıla. Ä min fänneñ kızıklı, ämma şul uk wakıtta citdi äyber ikänen añlatırga telim» – di Mixail Gluşkow.

Belem birü programması kısalarında A.N.Tupolew isemendäge Kazan milli tikşerenü texnik uniwersitetı – KAI wäkilläre balalar belän awiamodelläşterü buença däreslär ütkärdelär, 3D-modelläşterü häm 3D-printerda eşlärgä öyrändelär.