Ädäbi konkursta katnaşırga çakırabız! ← kire kaytirga

Sälät oeştırgan Flüs Latıyfi isemendäge IX «Sälätkä nur bulgan yoldızlar» açık ädäbi konkursına gariza birü kampaniyase däwam itä! Bälki, älege konkurs turında belep betermäüçelär dä bardır dip, konkursnıñ koordinatorı Aygöl Wäliullina belän äñgämä kordık.

– Aygöl, «Sälätkä nur bulgan yoldızlar» konkursı närsä ul? Berniçä süz belän genä añlatıp bir äle!

– Min anı 5 süz belän añlata alam: «Sälätkä nur bulgan yoldızlar» ul – şigriyat, çäçmä äsär, dramaturgiya, balalar ädäbiyatı häm publitsistika. Konkurska näk menä şuşı nominatsiyalärdä äsärlär kabul itelä. Alarga Tatarstan Yazuçılar soyuzı ägzaları, tanılgan şagıyrlär, yazuçılar, jurnalistlar bäya biräçäk.

– Konkursta kemnär katnaşa ala?

– «Sälät»kä nur bulgan yoldızlar» konkursında 11 yaştän alıp, 22 yaşkäçä mäktäp ukuçıları häm studentları katnaşa. Eşlär yaş buença berniçä kategoriyagä bülenep bäyalänäçäk, yagni 12 yaşlek bala 22 yaşlek belän yarışmıy, härkemneñ üz törkeme bulaçak.

– Garizalar kayçanga kadär häm kayda kabul itelä?

– Garizalar 1-nçe iyungä selet.biz saytında kabul itelä. Saytta öske yakta «Sälätkä nur bulgan yoldızlar» digän töymä bar, şuña bassagız, gariza forması açılır. Şunı tutırıp cibärergä kiräk. Ä konkurska äsärlärne selet.nur@gmail.com poçtasına cibäräse.

– Konkursnıñ finalı niçek uza?

– Moñarçı finalistlarnı Sälät Yortına cıya idek. Başta alar öçen törle ostaxanälär, tügäräk öställär oeştırıla, jyuri ägzaları här katnaşuçınıñ äsärenä bäya birä, ä annarı büläkläü tantanası uzdırıla ide. Bıel «Sälätkä nur bulgan yoldızlar» proektı belän grant ottık! Şuña kürä konkursnı ör-yaña formatta ütkärü mömkinlege açıldı. «Sälätkä nur bulgan yoldızlar»nıñ finalı ARTS BILER FORUM kısalarında küçmä mäktäp formatında uzaçak! Ul 27-nçe iyun - 2-nçe iyul könnärendä Bilärdä bula. Anda barı tik 80 katnaşuçı çakırıla. Katnaşuçılarnı 3 könlek tıgız programma kötä: konkursnıñ jyuri ägzaları belän äñgämä, ekspertlar belän eşläü, spikerlar belän oçraşu häm başkalar. Häm küçmä mäktäpneñ näticäse bularak, «Sälätkä nur bulgan yoldızlar» konkursınıñ finalistların büläkläü tantanası uzaçak.

– Küçmä mäktäp uzgannan soñ «Sälätkä nur bulgan yoldızlar» katnaşuçıların närsä kötä?

– Bu proekt küçmä mäktäp belän genä çiklänmi, kiläçäktä dä zur eşlärebez bulaçak. Sentyabr aennan Sälät Yortında ädäbi yunäleştä kurslar başlanaçak. Oktyabr aenda ikençe küçmä mäktäp uzaçak. Häm «Akkoş küle» klubı eşçänlegen dä yañartıp cibärergä uylap torabız.