Bez kayttık siña, Bilär! ← kire kaytirga

Bügen, 12-nçe iyul, Izge Bilärneñ muzey-tıyulıgı VI Xalıkara yaşlär uku-ukıtu Sälät forumına cıelgan sälätle balalar, aktiw yaşlär häm maksatçan ukıtuçılarnıñ şatlıklı awazı belän tuldı. «Bilär kalası», «Rauşan», «Ruxiyat», «Bua (Gayrät)», «Saba», «Samara», «Batır», «Kandrakül», «Bögelmä», «Aznakay», «Bolgar» häm «Yar Çallı» alannarı sälkeşläre yañgırawıklı sörännäre, betmäs energiyaläre belän här keşene yaña ürlärgä ilhamlandırdılar.

«Sälam, Sälät! Sälam, Bilär, Izge çişmä! Biredä bezneñ tamırlarıbız. Bez üzebezgä kayttık. Barıbız bergä kayttık. Bez – berböten. Härwakıt şulay bulsın. Koyaş nurları şikelle härwakıt yaktırtıp, cılılık öläşegez. Tatar telebezne yaratıgız, goref-gadätlärebezne xörmät itegez. Härberegezgä dä räxmät!» - dip sälamläde Sälät proektları citäkçese Ädip Älmir.

«Sälam, Sälät! Biredä köç, biredä därt! Bez – ber gailä. Häm bez başlıybız! Inde sezgä bilgele bulgança, bıel Sälät Forumı 2 smenada uza. Bu – sezneñ yaña açışlarıgız öçen. Uñışlar sezgä yuldaş bulsın!» - dip «Sälät» Fondınıñ başkarma direktorı Timur Söläymanow produktiw eşkä yunälderde.

Forumnıñ berençe köne xis-kiçereşlär belän genä tügel, yaña belemnär belän dä istä kaldı.

«Kazanskiy okrıtıy uniwersitet talantow 2.0» oeşması belän berlektä Fänni yarışlar çempionatı uzdırıldı. Biredä berençe häm ikençe ligada mäktäp ukuçıları da, studentlar da katnaştı. Eget-kızlar biologiya, ximiya, cämgıyat beleme häm psixolingwistikadan üzläreneñ fänni proektların täkdim ittelär.

Kön däwamında Forum territoriyasenä maxsus radio xäbärlär ireşterä, cır-moñnar belän bezne söenderä. «Selet FM» dulkınnarında Äbri Xäbriew belän Gayaz Gaysin bar kunaklarnı oeştıru komitetı, başcitäklär belän tanıştırdılar. Töp mediapartner – «Tatar radiosı».

Aygöl Gabdraxmanowa, «Sälät» yaşlär üzäge direktorı:

- Bügen bezdä bäyräm! Sälätelär bäyräme! VI Xalıkara yaşlär uku-ukıtu Sälät forumı başlangan kön! Bıelgı tema da bik üzençälekle: 4-nçe sänägat rewolyutsiyase kısalarında uku-ukıtu texnologiyaläre. Şuşı uñaydan bik küp ostaxanälär, lektsiyalär, sport çaraları kötelä. Biredäge çatırlı mäydançılarnı 1 ay aldan äzerli başlıylar. Şäxsän min Izge Bilär cirenä 12-nçe tapkır kiläm. Bügen aralaşkan duslarımnıñ 50%-ı – Sälät keşeläre. Sez dä tanışıp, duslaşıp kalıgız! Forumnıñ här minutınnan läzzät alıgız!

«Sälät-Samara 2017» alanı äydamanı Tahir Kärimullin:

- Bıel alannar isemlegenä «Sälät-Samara» da kuşıldı. Bez kıştan birle eşlibez, yaña el kanikullarında bezdä 40 balalı smena ütte. Şuşı kışkı smena bezgä etärgeç buldı da inde. Biredäge balalarnıñ 30%-ı Kazannan, kalgan 70-e – Samaralılar. Forumga kilü – üze ber can räxäte. Samara sälkeşläre biregä bik aşkınıp kilde. Alarga äle awırrak, Sälät moxite belän dä tanışıp kına kilälär. Här könneñ kaderen belep ütkäräbez. Sälät bezne berläşterde, zur räxmät!

«Sälät-Bilär kalası 2017» alanı direktorı Dilärä Xälitowa:

- Min «Sälät-Bilär kalası» sälkeşe, äydamanı, ölkän äydamanı, bügen inde direktorı. Häm moña bik şatmın. Bezdä Çexiya, Ispaniya, Finlyandiya, Mäskäüdän balalar bar. Alar bik tıynak häm aktiw, üzençälekläre dä şunda. Çexiya häm Finlyandiya balaları tatarça añlıylar, ä Ispaniya balalarına rusça endäşergä kiräk. Bıel alanıbızda tarix häm ekologiya fännärenä zur basım yasıybız, balalar üz proektların konkurs formatında täkdim itälär. Forumda bulgan çaralardan därt alıgız, aktiw katnaşıgız häm härçak elmaegız!

Emil Şäydullin, «Izge Çişmä» studentlar alanı direktorı:

- Sälät – ul minem tormışım. Forumda katnaşıp cäyneñ matur könnären Bilärdä ütkäräsem kilde. Kazannıñ 155-nçe gimnaziyada tarix häm cämgıyat beleme ukıtuçısı bulıp eşlim. Bilärgä bez 3-nçe iyuldä ük kildek. Tabigatneñ bar maturlıgın kürep ölgerdek: bezgä yañgırlar da, cil-burannar da kurkınıç tügel. Bezneñ katnaşuçılar forum territoriyasendä eşli, säxnä äzerlibez.