«SÄLÄT» FORUMINIÑ BERENÇE SMENASI TÄMAM ← kire kaytirga
X Xalıkara «Cälät» yaşlär uku-ukıtu forumınıñ berençe smenası tämamlandı. JUNIOR SKILLS BILER FORUM Tatarstannıñ barlık rayonnarınnan, Samara häm Leningrad ölkäläre, Udmurtiya, Başkortstan, Çuwaşiya, Mariy El häm Mäskäüdän balalar häm yaşlärne cıydı. Smena 19-23 iyun könnärendä Bilär muzey-tıyulıgı territoriyasendä ütte.
Berençe smenanıñ räsmi yabılu tantanası bıel da bäyräm ruxında uzdı. Säxnä türendä Sälät berläşmäse üseşenä zur öleş kertkän aktiwistlarnı büläklädelär. II häm III däräcädäge Sälät bilgelärenä 20 kız häm eget laek buldı.
«Sälät» yaşlär üzäge direktorı smena katnaşuçılarına räxmäten belderde. «Sez bulmasagız, mondıy smena bulmas ide. Barıgızga da räxmät! Sälkeşlär yal itä, yaña mäglümat, yaña belemnär tuplıy alsın öçen bik tırıştık. Häm bez buldırdık dip uylıym!»
Kiçne «Sälät bezgä oçar kanat birde» dip atalgan icadi kontsert belän däwam ittelär. Säxnädä sälkeşlär belän berrättän äydamannar, oeştıru komitetı ägzaları da çıgış yasadı. Kontsert Sälät dönyasında inde «klassika» däräcäsen algan törle ellardagı forum cırları belän ürelep bardı. Soñınnan çaranıñ töp kunakları «OMMAJ» häm didjey Malsi Music çıgış yasadı.
Isegezgä töşeräbez, JUNIOR SKILLS BILER FORUM-nıñ töp ideyase – mäktäp ukuçılarına xäzerge zaman häm kiläçäk hönärlären üzläşterü öçen yaña mömkinleklär tudıru.
«Hönär saylau – kiläçäk tormışıñnı saylau digän süz bit ul. Kızıksındırgan eşeñ turında mömkin kadär kübräk belem tuplarga kiräk. Şunıñ öçen dä üz hönärläreneñ çın ostaları belän aralaşu bik möhim. Bez bit däres kenä ukıtıp kalmıybız, üseş tarixıbız belän dä urtaklaşabız. Balalarga ciñü genä tügel, ciñelülär xakında da söylärgä, awır çaklarnı niçek döres ütkärep cibärergä ikänen dä añlatırga kiräk» – dip bilgeläp ütte smena spikerı, arxitektor Marina Däülätgäräewa.
Forumga çakırılgan spikerlar arasında arxitektor, urbanist, Zölfiya Ilkaewa, rässam Ruslan Ibrahimow, kalligraf Ayzat Minhacew, Mäskäü politexnika uniwersitetı häm Kazan milli tikşerenü texnik uniwersitetı – KAI mögallimnäre, Kazan däülät arxitektura-tözeleş uniwersitetınıñ «DAŞKA» balalar arxitektura-dizaynerlık mäktäbe ukıtuçıları dä bar ide.
Katnaşuçılar fänni şou karıy, pilotsız oçkıçlar, awiatsiya sistemaları, lettering, garäp kalligrafiyase belän yakınnanrak tanışa aldı. Şulay uk alar üz kulları belän art-obektlar tözede häm Sälät parkı maketın äzerläde.
«Yugarı uku yortında ukıtkaç, monda, balalar yanında, lektsiyalär niçek ütär ikän dip borçılgan idem. Ämma «Sälät»täge yaşlärneñ yugarı intellekt däräcäsen bilgeläp ütäsem kilä. Mine mondagı moxit, sälkeşlärneñ aralaşuı şakkattırdı: küreşkändä isänläşüläre, master-klasslardan soñ kilep aerım räxmät äytüläre bik söenderde», – dip xis-kiçereşläre belän urtaklaştı dizayner Yuriy Mençits.
Bıel smenalarda ekologiya temasına zur igtibar birelä. Forum territoriyasendä balalar cämägat bakçası buldırdı. Cäy däwamında Bilärdäge smena katnaşuçıları andagı yaşelçä häm çäçäklärne karap, tärbiyaläp toraçak. Şulay uk balalar öçen tabigatkä karata sakçıl karaş uyata torgan törle eko-çaralar oeştırıldı.
Forum territoriyasendä sport uennarı: futbol, woleybol häm basketbol buença çempionatlar uzdı. Katnaşuçılar üzlären boço, snukbol häm stritbol kebek sport törlärendä sınap karıy aldı.