«Äydamannar mäktäbe»neñ küçmä sessiyase tämam kire kaytirga

«Äydamannar mäktäbe»neñ küçmä sessiyase tämam

     Tatarstannıñ törle rayonnarınnan, kürşe respublika häm şähärlärdän kilgän 150 äydaman – cäyne karşılarga äzer! «Äydamannar mäktäbe»neñ küçmä sessiyase tämam. Ul 27 nçe gıynwardan alıp 1 nçe fewralgä kadär «Baytik» balalar sälamätländerü üzägendä ütte.

       Bıel «Äydamannar mäktäbe»nä 20 yaş! Uzgan sessiyalär belän çagıştırganda, yubiley elında küp kenä üzgäreşlär bar. Şularnıñ berse – uku-ukıtu programması belän bäyle. Bıel töp igtibar pedagogik oçraklarga yunälgän: smena wakıtında bala häm äydaman, ata-ana häm äydaman mönäsäbätläre, katlaulı mäsälälärne çişü yulları, äydaman etikası, anıñ xokukları häm burıçları h.b. mäsälälär karaldı. Maxsus spikerlar arasında psixolog, biznes-trener Elwina Babaewa, psixolog Alsu Taciewa, «Räsäy – islam xezmättäşlege Oeşması»nıñ Proekt ofisı citäkçese, tärcemäçe, Sälät Bilär Forumınıñ art-direktorı Tahir Nasibullin, psixolog, sotsial proektlar koordinatorı Ekaterina Gurewa häm KFUnıñ ITIS Yugarı mäktäbe ölkän ukıtuçısı, «Fänsar» mäktäbe häm Bilär forumınıñ belem birü programmaları citäkçese Elina Nasibullina buldı.

        Sessiya däwamında bulaçak äydamannar belän kuratorlar, yagni alannarnıñ ölkän äydamannarı häm direktorları eşläde. Alar smenaga äzerlänü tärtibe, törkem tözelü etapları, kiçke häm köndezge çaralar uzdıru ölkäsendäge täcribäläre belän urtaklaştı.

         Däreslärne 2021 nçe el cäendä Sälät alannarında äydaman bulırga telägän yugarı häm urta hönäri belem birü yortı studentları ütä. Bıel «Äydamannar mäktäbe»neñ küçmä sessiyasendä katnaşırga teläk belderep 220 gariza kilde. Äñgämä nigezendä şularnıñ 150se saylap alındı. Tatarstan şähärlärennän, şulay uk Çuwaşiya, Başkortstan respublikalarınnan, Sankt-Peterburg, Mäskäü häm Samara şähärlärennän katnaşuçılar bar.

      «Bıel äydamannar gomumän başka, ämma bu uzgan elgı äydamannıñ naçarlıgın kürsätmi, kiresençä, el saen balalarnıñ, xäzerge studentlarnıñ tagın da aktiw buluın añlata», – di, proektnıñ koordinatorı Igor Smirnow.

      Küçmä sessiya tämam, ämma cäygä äzerlek äle monıñ belän genä betmi. Tizdän äydamannar cäyge smenalarında eşläü öçen citäkçelär belän oçraşuga kiläçäk. Äñgämä nigezendä yaña komandalar tuplanaçak. Alda bezne kızıklı, möhim, cawaplı häm küñelle cäy kötä!