Ризаэтдин Фәхретдин исемендәге «Кичүчат» уку-укыту мәдәни фестивале

Yaşlärneñ «Kiçüçat» tatar mädäniyate festiwale berençe tapkır 2014-nçe elnıñ cäendä ütte häm ataklı tatar galim-mägrifätçese Rizaetdin Fäxretdinneñ tugan awılı Kiçüçatta (Älmät rayonı) 100-läp katnaşuçını (11-22 yaşlek malaylar häm egetlär) üz çaralarına cälep itte.

Festiwal programması yaşlärneñ ruxi, icadi, intellektual häm fizik üseşenä yunätelgän. Festwialdä tanılgan galimnär, cämägat häm icat ähelläre belän oçraşular ütkärä, «IT», «Korän häm fän», «Yaña Şura» yunäleşlärendä proektlar tormışka aşırıla,  «Kol Şärif onıkları» konkursınıñ finalı uza, intellektual, icat häm sport bäygeläre oeştırıla.

Proektnıñ maksatı häm burıçları – tatar xalkınıñ mädäni mirasın, goref-gadätlären saklau häm yañadan torgızu; kürenekle tatar galime Rizaetdin Fäxretdin icatın populyarlaştıru; festiwaldä katnaşuçılarga ruxi häm äxläkıy tärbiya birü häm alarnı fänni eşçänlekkä yakınaytu; talantlı yaşlärne, alar belän eşläüçe belgeçlärne barlau, kuätläü häm üseş mömkinlege birü.