Sälät cäyge alannar öçen äydamannar komandası tuplıy ← kire kaytirga

DOL «Baytik»ta başcitäklär häm äydamannar öçen «Äydamannar mäktäbe» uza. Biredä  Tatarstan, Başkortstan, Çuwaşiya, Mordowiya, Dagıstan Respublikaları rayonnarınnan, Kirow, Sarıtau häm Samara ölkälärennän cıelgan 130 äydaman,  27 kurator katnaşa.

«Äydamannar mäktäbe» – strategik yaktan bik möhim proekt. Ul Sälätneñ cäyge profille smenaları öçen citäkçelär häm äydamannardan torgan berdäm  komanda tuplauga  yunälderelgän. Proekt kısalarında el äylänäse törle ölkälärdä däreslär alıp barıla: sälätle balalar belän eşläü; komandada eşläü; Sälät printsipları, traditsiyaläre belän tanışu; balalar öçen küñel açu, uku-ukıtu çaraları uylap tabu; profille smenanıñ programmasın uylau; h.b.

Eget-kızlarnıñ kübese berençe tapkır äydaman bulaçak. Alar tatar telebezgä gaşıyk, balalar belän eşläüne üz itä. Katnaşuçılar tatar telendäge inşaların bik yaxşı yazgannar, cäygä kadär Sälät yortında tatar telen öyränüne däwam itäçäklär.

Smena barışında şulay uk psixolog Lyutsiya Zakircanowa citäkçelegendä balalar belän dustanä mönäsäbätlär koru, törkem öçen çaralar ütkärü xakında söyläştelär.

Sälät Fondınıñ Popeçitellär sowetı räise, RFnıñ Däülät Duması deputatı Marat Bariew katnaşuçılar belän oçraşuga kilde, uñışlar, balalarga faydalı da, küñelle dä cäy büläk itülären teläp kaldı.

Katnaşuçılarnıñ teläkläre buença kem kaysı alan äydamanı ikäne bilgelängän, yarış programması başlangan. Biredä algan belemnäre nigezendä alar törle çaralar, şämçeklär äzerlilär. Çıgışlar bik küñelle uzdı, bulaçak äydamannarnıñ äzerlekläre şäp!

Elina Stepanowa, proekt citäkçese:

- Biredä iñ äybät äydaman bulırga teläüçelär cıelgan. Alar bu cäyne üzläreneñ belemnären, ostalıkların bezneñ sälätle balalarıbız belän büleşäçäk. Komandabız bik dus, köçle armiyagä tiñ, barıbız bergä bezgä bernindi kirtälär dä kurkınıç tügel. Alarnıñ bu köç-därtläre böten cäygä citär, sälkeşlärgä teräk, yakın dus häm ostaz bula alırlar dip ışanıp kalam. Minemçä, berençe çiratta, äydaman cawaplı keşe bulırga tieş, konkret biremnärne çişä belergä tieş. Balalar küñelen añlıy belü, alarnı xörmät itü dä bik möhim, çönki här bala – şäxes.

Albina Kadıyrowa, proektnıñ kuratorı:

- Katnaşuçılarıbız şäp! Bez alarga zur ömetlär baglıybız. Hämmäseneñ küzläre yanıp tora, balalar belän eşlärgä teläkläre zur. Äydaman – balalar öçen ürnäk ul, alar aña oxşarga tırışa. Şuña da ul här süzen çamalap söylärgä, eşen uylap başkarırga tieş. Äydaman – äybät psixolog, şäp moderator, kreatiw menedjer da. Tulaem alganda, katnaşuçılar näk şundıy. Energiyaläre taşıp tora, bik şayannar. Üzem isä bıel «Sälät-Şäxes» alanı direktorı bulırga planlaştıram.

Bulat Wäliullin, mäktäpneñ kuratorı:

- Sälättä min 2011-nçe eldan birle. «Şäxes», «Rauşan», «Sanak»ta buldım, «Sälät-Samara» kışkı smenasında katnaşırga ölgerdem.  «Sälät-Bögelmä» klubınıñ kuratorı da äle min. Äydamanka miña bik oşıy. Wakıt buşka uzmıy, här bulaçak äydaman alıştırgısız täcribä tuplıy. Bez alarnıñ eşçänlegen küzätäbez, komandalarıbızga iñ köçle äydamannarnı tuplarga tırışabız. Äydaman ul här ölkädä ürnäk bulırga tieş. Tışkı kıyafäte buença da, uy-fikerläre belän dä. Bu cäyne min  «Sälät-Samara» alanınıñ ölkän äydamanı bulaçakmın. Kızıklı proekt, miña kalsa. Berençe tapkır gına oeştırabız, kışkı smena moña zur äzerlek buldı. Balalarnıñ kübese belän tanıştım, şuña da bik awır bulmas dip uylıym.

Aynur Şäydullin, Çuwaşiya, katnaşuçı:

- Äydaman – sälkeşlär öçen ürnäk häm lider. Bezneñ komanda bik köçle. «Äydamannar mäktäbe»ndä küp belem tupladım, üzemne yaña yaktan açtım.

Elmira Sermukowa, Sarıtau ölkäse, katnaşuçı:

- Bik-bik cawaplı äydaman bulaçakmın, här bala belän icadi yaktan eşlär alıp baraçakmın. Hämmäsen yarataçakmın. Cäyne kötäm, üzem baraçak smenanı iñ äybät smena itär öçen bar köçemne kuyarga äzermen!

Rämiz Mullagamedow, Dagıstan, katnaşuçı:

- Äydaman – ul gadäti keşe tügel. Ul barısın da buldırırga tieş, küp belergä tieş. Balalarnı tınıçlandırırga, käeflären kütärergä, añlarga tieş. Magistraturaga ukırga kerü öçen zur pedagogik täcribä tuplıy aldım. Monıñ öçen Sälätkä zur räxmät! Ul bu eştä ışanıçlı çıganak. Minem öçen bu bik möhim. Tatar tele belän älegä awırrak, tik tırışaçakmın. Bez bit ber gailä! (Kölä)