Laslo Darotsi belän äñgämä ← kire kaytirga

VI Xalıkara yaşlär uku-ukıtu Sälät forumınıñ programması kısalarında aerım igtibar katnaşuçılarnı motiwatsiyaläü, tagın da kamilläşterügä birelä. Bu eş Tatarstan, Räsäy töbäklärennän häm çit illärdän kilgän tanılgan, uñışlı şäxeslär belän oçraşular aşa başkarıla. Mäsälän, Kazan şähärendä Wengriyaneñ General konsullıgın wakıtlıça başkaruçı Laslo Darotsi da Sälät Forumı 2-nçe smenasınıñ katnaşuçıları belän oçraştı, alarnı kızıksındırgan soraularga cawap birde.

-         Räsäy Sezne ni belän cälep itte?

-         Minem öçen bu yaña urın: kızıklı, sixri, mawıktırgıç. Räsäy turında bik küp ukıdım, tıñladım, öyrändem. Şuña da biregä kilergä buldım. Häm yalgışmadım.

-         Belemegez buença kem Sez?

-         Min Mäskäü däülät xalıkara mönäsäbätlär institutın tämamladım, annarı 17 el jurnalist bulıp eşlädem.

-         Ni säbäple jurnalist hönären sayladıgız? Üz aldıgızga şundıy maksat kuygan idegezme, ällä inde tormış agımına kuşıldıgızmı?

-         Üz wakıtında şuşı uku yortına ukırga kerü mömkinlegem bar ide, anı kuldan ıçkındırmadım. Yazarga yarata idem. Tik biredäge ber student minem öçen institutnı bütän yaktan aça aldı. Şunnan min yazu eşenä kereştem.

-         Ä bügenge wazifagızga niçek kildegez?

-         Biredä inde tormış agımına kuşıldım disäk döresräk bulır. Başta tışkı eşlär ministrlıgında xezmät kuydım, annarı gına barrikadanıñ ikençe yagına küçtem. Mäskäü, Minsk kebek şähärlärdä eşlädem. Bügen inde min Kazanda. Wengriya Xakimiyate Räsäyne, Tatarstannı ähämiyatle partnerı itep kürä. Şuşı elemtäne buldıruda min dä katnaşam.

-         Nindi tellär beläsez? Rus tele sezgä awır bireldeme?

-         3 tel beläm: ispan, ingliz häm rus tele. Rusçanı öyränergä nigezem bar ide, çönki min inde 9 el Räsäydä. Sezneñ il belän eşlekle xezmättäşlek alıp baru miña oşıy. Mäskäügä kilgäç berençe yartı el bik awır buldı, älbättä. Lektsiyalär tıñlap, konspektlar yazu minem öçen ul wakıtta katlaulı ide, tik tora-bara barlık awırlıklar da artta kaldı.

-         Sezneñ konsullık ni belän şögıllänä?

-         Konsullık Wengriya grajdannarınıñ mänfägatlären kaygırtu belän şögıllänä. Ägär alar awır xäldä kalıp, yardäm kiräk bula ikän, bez alarga şuşı yardäm kulın suzabız. Könen dä, tönen dä uyaulıknı yugaltmıybız, ul-bu bulgan oçrakta bez gel äzer.

-         Ä Tatarstanda eşegez nidän gıybarät?

-         Bezneñ oeşma wizalar äzerli, mädäni häm säüdä mönäsäbätlären üsterä.

-         Sez Kazanda berençe tapkırmı?

-         Yuk, inde 2 el Kazan belän eşlim. Konsullık açılgannan birle.

-         Şähär sezgä oşıymı?

-         Bik matur, Ewropa stilendäge şähär. Bar närsädän uñay täesir genä kala. Xezmättäşlek öçen perspektiwa barlıgı da kürenä. Bezneñ biredä buluıbız başta uk fayda kitermäsä dä, tora-bara cimeşläre kürenergä tieş.

-         Eşegez awırmı?

-         Kaywakıt awır çorlar bulıp ala. Cäy könnären aeruça da. Şundıy burıçlar bula, bar närsädä balansnı saklau öçen alarnı komplekslı räweştä xäl itärgä kiräk. Üz wakıtı belän korbannarga da barırga turı kilä, bik eş bulmasa da.

-         Sezneñçä, köçle häm berdäm komandanıñ sere nidä?

-         Komandanıñ uñışı 2 detaldän tora: şäp ideyalär täkdim itüdän häm bulgan burıçlarnı bersüzsez başkarudan.

-         Niçek Sezgä Forum? Katnaşuçılar?

-         Forum bik kızıklı, küñelgä ütep kerä. Oçraşuda yañgıragan soraulardan çıgıp xökem yörtsäñ, biredäge balalar bik sälätle.

-         Biredäge balalar tatar telen öyränü, anı kamilläşterü belän yanalar. Ä Sezneñ tugan telgä mönäsäbätegez niçek?

-         Här keşe dä tugan telen belergä tieş. Tugan telen belmägän xalıknıñ kiläçäge yuk.

-         Sälät Sezne ni belän kızıksındırdı?

-         Çakıru kabul itkäç ük rizalaştım. Balalar häm yaşlär – bik möhim auditoriya. Annan da bigräk, Forum bezneñ öçen Tatarstan belän yakınnan tanışu mömkinlege. Bilär cireneñ tarixı da bik kızıklı, ul bezneñ xalıklarda urtak tamırlar buldırgan. Tarix buença elek masştablı küçep yörülär buluı bilgele. Bezneñ ata-babalarıbız şul wakıtta üz urınnarın Karbat basseynında tapkannar.

-         Forum katnaşuçılarına teläkläregez?

-         Korgan plannarıgız, teläk-xıyallarıgıznı çınga aşırırga köçegez citüen telim! Forumnan mömkin kadär kübräk xis-kiçereşlär alıgız, ilham tuplagız. Wengriyagä kunakka kilegez! Sezne äybät kunak itärgä süz biräm! Muzıka söyuçelärne aerım çakıram: awgust aenda bezdä zur muzıka festiwale uza. Biredä tanılgan muzıkantlar da kötelä.

-         Çakıruıgız öçen räxmät!