«Tatsoft» – rusça-tatarça yaña tärcemäçe kire kaytirga

«Tatsoft» – rusça-tatarça yaña tärcemäçe
Bügen Sälät Yortında rusça-tatarça «Tatsoft» maşina tärcemäçesen täkdim ittelär. Tatsoft proektın gamälgä aşıruçılar: Tatarstan Fännär akademiyaseneñ gamäli semiotika institutı häm Innopolis Uniwersitetı. Anı eşlägän galimnär äytüençä, bu – älegä dönyada iñ yaxşı rusça-tatarça tärcemäçe.

Neyroçeltärlär alımı nigezendä eşli torgan «Tatsoft» tärcemäçesendä bügen 1 million par rusça-tatarça cömlä bar. Tärcemä itelgän cömläne tıñlap ta bula. Tatarstan Fännär akademiyaseneñ gamäli semiotika institutı ölkän fänni xezmätkäre Aydar Xösäenow äytüençä, kiläçäktä tärcemäçe söylämne yazma tekstka äyländerä häm tärcemä itä alaçak.

Älege tärcemäçe aerım süzlärne tügel, cömlälärne tärcemä itä. Döres, maşina tärcemä itkändä xatalar da bulırga mömkin. Xatanı här kullanuçı tözätä ala. Monıñ öçen «dizlayk»ka basarga häm, xatanı kürsätep, xat yazıp cibärergä kiräk. Lingwistlar monı tikşeräçäk häm çınnan da xatalı ikäne açıklansa, programmaga döres tärcemäne «öyrätäçäklär». Programma üzenä kertkän barlık cömlälärne dä «xätere»ndä saklap kaldıra.

– Bezneñ maksat – programmada 10 million par cömlä cıyu. Şuña kürä här kullanuçı ber cömlä genä bulsa da kertsen ide. Bügengä bezneñ 300gä yakın unikal kullanuçıbız bar, – dip söyläde Aydar Xösäenow.