Sälät Korporatiw Uniwersitetınıñ küçmä intensiwı tämam! ← kire kaytirga
50 katnaşuçı, 2 trener, 7 sessiya. 19-21 martta Sälät Korporatiw Uniwersitetınıñ küçmä intensiwı uzdı.
Sälät häm baza xezmätkärläre, aktiwistlar häm citäkçelär belän yal könnärendä bez trenerlar yardämendä üz-üzeñ, ber-bereñ häm, gomumän, komanda belän bergä näticäle eşläü yulların ezlädek.
Sälät komandası şäxsi üseş häm kreatiwlık buença trener Anna Feldman häm formal bulmagan belem birü buença trener Ekaterina Gurewa citäkçelegendä eş alıp bardı. Uen aşa kümäk eşneñ sıyfatın yaxşırtu häm tagın da zurrak näticälärgä ireşü öçen närsälär eşlärgä mömkin ikänlegen karadık:
«Uen - ul tormış. Üz-üzeñne yaxşırak añlau, tagın da tiränräk toyu öçen yardäm itä torgan çara. Härdaim küzätergä! Üzeñ, partner, protsess häm äylänä-tirä moxit belän elemtädä bulu möhim. Legodagı şikelle komandadagı eş wak kisäklärdän tora. Anı tözüçe härber keşeneñ role möhim ikänlegen kürsätergä tırıştık», - di trenerlar.
Programma buença 1 nçe kön eşkä kereşü aldınnan ber-berebez belän dä, networking programma belän dä yakınrak tanışuga yunältelde. Alga taba, şäxesneñ üz-üzen tanıp belüe buença eş alıp bardık, çönki üzgäreşlär härwakıt aerım ber keşedän başlana. Häm, nihayat, komandada eşläü serläre, strategiyalärenä bäyle sessiyalär uzdı.
Koroporatiw Uniwersitet proektı citäkçese Aygöl Wäliullinanıñ süzlärençä, komanda zur näticälärgä ireşsen öçen berniçä şart bulu kiräk: «Bu berniçä kön bik näticäle buldı. Bez başta üzebezne borçıgan nindider soraularga cawap birä aldık. Törle oçraklarda igtibarnı närsägä yunältäbez ikänen añladık: eş barışınamı (protsess), başka keşe, yagni partnergamı yaisä üzebezgäme. Ä bälki tirä-yundäge wakıygalar kübräk yogıntı yasıydır. Üzgäreşlärne küzätü bik kızık, minemçä. Komandaga küçmä intensiwlar yardäm itä ala dip uylıym. Läkin barıbız da katnaşkan oçrakta. Ägär härber keşeneñ teläge bulsa, birelep eşläsä, cawaplılık sizsä. Küçmä mäktäpneñ ber sessiyase genä üzgäreşlärgä kitermäskä dä mömkin. Mondıy çaralarnı daimi ütkärep torırga, treninglarda katnaşırga kiräk dip uylıym».
Wakıtnı faydalı häm produktiw ütkärergä, uzgan elda başlagan zur eşebezne däwam itärgä menä digän mömkinlek buldı.
Proekt yaşlär eşläre buença federal agentlık yardäme belän ütkärelä.
