Как прошел СӘЛӘТ ҖЫЕНЫ ОНЛАЙН?
“Sälät cıenı”nda 2020 elgı profil smenalarına saylap alıngan, şulay uk “Sälät” saytında maxsus gariza tutırgan keşelär katnaştı. Ägär çaranı oeştıruda 100 keşe katnaşsa, anı karauçılar sanı 9 meñnän artkan.
Älege cıen Bilärdäge çın forum kebek ide. Aerma tik şunda: barısı da wirtual räweştä bardı. Cıen irtänge zaryadka, gimn cırlau, “Sälät” älämen kütärüdän başlanıp kitte. Xäzerge wakıtta ildä üzizolyatsiya çorı bulsa da, “sälät”lelär cäygä yaktı ömetlär belän yaşi, cäyge smenalar, “Sälät” forumnarı gadättägeçä uzar digän niyattä alar. Älege çara däwamında bıelgı “Sälät” alannarı direktorları härberse üz smenası turında söyläde. Xäzerge wakıtta alarga gadättäge rejimda äzerlek bara ikän. Bıel “Sälät” IX xalıkara yaşlär uku-ukıtu forumı uzaçak. Gomumän alganda, ul 55 kön däwam itäçäk. Anda 15 meñ keşe katnaşu kötelä.
Tatarstan yaşlär eşläre ministrı Damir Fättaxow turı efirda “Sälät cıenı onlayn” katnaşuçıları soraularına cawap birde. “Bu – bik şäp format. “Sälät” zamanaga karap şunıñ kadär tiz yaraklaşa aluına bik şatmın. “Sälät” ildä şundıy onlayn-forumnı berençe bulıp uzdıra, disäm dä, yalgış bulmas. Bu “Sälät”neñ çın yözen kürsätä häm başka oeşmalardan aerıp tora. Sez – şäp, bez sezne yaratabız”, – di ministr.
Kulinar master-klasslarga da urın tabıldı onlayn-cıenda: biredä “Sälät” yaşlär üzäge direktorı Aygöl Gabdraxmanowa öçpoçmak peşerde. Kiçke aşka isä EDUabroad.pro proektı awtorı Alinä Sadriewa turı efir aşa kıstıbıy peşerergä öyrätte.
Bu könne “Sälät” böten dönyanı berläşterde. Kanada, AKŞ, Awstraliya, Awstriya, Ispaniya, Törkiyadän turıdan-turı totaştırular şunıñ turında söyli. “Sälät kiçläre” şagıyrlär battlı isä şigır söyuçelärne üzenä cıydı. Äydamannar, sälkeşlär Gabdulla Tukay, Ildar Yuzeew, Şäükät Galiew, Mödärris Äglämow şigırlären ukıdı. Parallel räweştä şaxmat buença onlayn-turnirda katnaştı. Şulay uk intellektual çara da uzdı.
“Sälät cıenı onlayn” “fatirnik” formatındagı kontsert belän tämamlandı. Anda muzıkant, cırçı, kompozitor AYGYUL (Wena), Ilnaz Safiullin, «The Cheeklaweek» muzıkal kollektiwı awtorı häm citäkçese Zärinä Wildanow çıgış yasadı.
Çıganak: Yalkın (http://yalkyn.ru/news/belmi-kalma/slt-onlayn-yeny-nichek-uzdy)
Awtor: Alinä Minnewäliewa