«BikaFest» - talantlar biredä! ← kire kaytirga
Berençe tapkır «BikaFest» «Sälät» berläşmäseneñ yakın dustı, fikerdäşe, awtor-başkaruçı Röstäm Tälgat ulı Bikmullinnıñ isemen mäñgeläşterü maksatınnan 2001nçe elda uzdırıldı. Tatar estradası häm şigriyatendä isemnäre yañgırıy torgan Asılyar, Ilnaz Safiullin, Aydar Söläymanow, Läysän Äsxätowa, Miläüşä Safina, şagıyrlär Gölnaz Garipowa, Yoldız Miñnullina, Liliya Gibadullina, Läysän Fätxetdinowa, Alinä Bikmullina, Rifat Säläxow h.b. – icat yulların «BikaFest»ta ciñülärdän başlagan şäxeslär.
Festiwal el saen 12-25 yaşlek aerım çıgış yasauçılarnı häm icadi kollektiwnı cıya. Alar biredä ike yunäleştä katnaşa ala:
1. Muzıkal yunäleş: iñ osta awtor başkaruçı; awtor cırın iñ osta başkaruçı kollektiw; iñ osta kollektiw-başkaruçı; tatar xalık cırın iñ osta başkaruçı; tatar kompozitorlarınıñ akademik äsären iñ osta başkaruçı; estrada cırın iñ osta başkaruçı;
2. Ädäbi yunäleş: üz äsären iñ osta ukuçı; başka awtor äsären iñ osta ukuçı.
Ber ay eçendä festiwalneñ oeştıru komitetı Tatarstannıñ törle rayonnarınnan 200-dän artık gariza kabul itte. Alarnı cibärgän katnaşuçılarnıñ 120-se kazıylar karşında üzsälätlären kürsätte. Katnaşuçılar geografiyase kiñ: Kazan, Yar Çallı, Tübän Kama, Çistay, Älmät, Saba, Yaşel Üzän, Arça, Bögelmä, Kukmara, Piträç, Aktanış, Norlat, Mamadış, Teläçe, Leninogorsk häm başka Tatarstan Respublikası rayonnarı.
Muzıka yunäleşenedä katnaşuçılarga bötenrossiya häm xalıkara bäygelär ciñüçese, 80 artık cırlar awtorı, kompozitor, cırçı, Röstäm Bikmullin isemendäge Respublikaküläm yaşlär cır häm -şigriyat festiwaleneñ Gran-pri iyase, Sälät aktiwistı, muzıka yunäleşe buença kazıylar şurası räise – Läysan Arsentewa; cırçı, awtor başkaruçı, Sälix Säydäşew isemdäge Zur kontsertlar zalı solistı – Ilgiz Möxetdinow; cırçı, bötenrossiya häm xalıkara bäygelär ciñüçese – Tatyana Efremowa; cırçı, Tatarstannıñ atkazangan artistı, Musa Cälil isemendäge premiya laureatı, Sälätneñ dustı – Ilüsä Xucina; muzıka belgeçe, pedagog, pianistka, «SAF» balalar berençe internet-radiosı kısalarında uzdırılgan «SAF muzıka» proektlarınıñ citäkçese, äydaman – Çulpan Yarkäewa bäya birde.
Ädäbi yunäleşneñ kazıyları sostawına şagıyr, jurnalist, tärcemäçe, Tatarstan Respublikasınıñ yazuçılar berlege ägzası, «Tantana» premiyase laureatı, BELLA Xalıkara premiyase laureatı, Sälät aktiwistı, ädäbi yunäleş buença kazıylar şurası räise – Yoldız Miñnullina; şagıyrä, prozaik, tärcemäçe, şigriyat ölkäsendä Sacidä Söläymanowa isemendäge ädäbi premiya laureatı, jurnalistika ölkäsendä Florid Agzamow premiya laureatı, «Tayan Allaga» ädäbi konkursınıñ Gran-pri iyase, «Yoldızlar şulay kuşa», «Akça ilenä säyaxät», «Tämletamak» kitapları awtorı, Sälät aktiwistı – Alinä Bikmullina; «Iñ yaxşı tugan tel häm tugan ädäbiyat ukıtuçısı - 2024» Bötenrossiya hönäri konkursınıñ töbäk etabı ciñüçese, Tugan tellär häm yakşämbe mäktäpläre ukıtuçılarınıñ Bötenrossiya konkursı laureatı, «Idelem Akçarlagı» yaş yazuçılar konkursınıñ «Poeziya» nominatsiyasendä Gran-pri iyase, Sälätneñ dustı – Läylä Fayaz; şagıyr, dramaturg, tärcemäçe, ädäbiyat belgeçe; Tatarstan Yazuçılar berlege ägzası, Sacidä Söläymanowa isemendäge ädäbi premiya, Musa Cälil isemendäge Respublika premiyase, BELLA Xalıkara premiyase laureatı, «Ruxi baylık» medale iyase, Sälätneñ dustı – Luiza Yansuar kerde.
Saylap alu turına çakırılgannar törle ostaxanälärdä katnaşu mömkinlegenä dä iya buldı. Pentatonika nigezendä tatar köyläre buldıru, personajıñnı tabu, ädäbi tekst yazu, oratorlık ostalıgı, zamança tatar cırlarına süzlär yazu, akterlık ostalıgı buença ostaxanälär ütte.
Saylap alu turınnan ütkännär Gala-kontsertta çıgış yasadı. Här nominatsiyadä berençe, ikençe häm öçençe däräcä laureatlar häm töp büläk – Gran-pri iyaläre bilgelände. Muzıka yunäleşendä Gran-priga – Röstäm Xösäenow törkeme, ädäbi yunäleştä Kärim Galiew iya buldı. Barlık ciñüçelär isemlegen sıltama aşa tabıp bula.
Barlık ciñüçelärgä dä «BikaFest» festiwaleneñ partnerlarınnan kıymmätle büläklär häm diplomnar tapşırıldı.