Tatar ädäbiyatınıñ kiläçäge - sälätle yaşlär kulında ← kire kaytirga

20 aprel könne Flüs Latıyfi isemendäge XIII respublikaküläm «Sälätkä nur bulgan yoldızlar» konkursınıñ finalistları Kazanga cıeldı. Biredä ädäbi konkurska näticälär yasaldı.

«Sälätkä nur bulgan yoldızlar» konkursınıñ geografiyase el saen kiñäya bara. Bıel 25 Tatarstan Respublikası rayonnarınnan häm kürşe regionnardan barlıgı 294 eş kabul itelde, 53 katnaşuçı laureat häm ciñüçe isemenä laek buldı. Alarga diplomnar, partnerlarıbızdan istälekle büläklär tapşırıldı.

Flüs Latıyfi isemendäge XIII respublikaküläm «Sälätkä nur bulgan yoldızlar» konkursınıñ Gran-pri iyase itep Ayliya Xaciewa bilgelände!

Barlık ciñüçelär isemlege belän sıltama aşa tanışırga mömkin.

Kaläm çarlauçı yaşlär öçen älege konkurs - üseş mömkinlege, yaña tanışular, çın ädäbi bäyräm! Katnaşuçılar öçen bay programma äzerlände. Yaş yazuçılar häm alarnıñ citäkçeläre ädäbi Kazan buylap säyaxät itte, alar öçen Tatar kitabı yortına, Kazan federal uniwersitetınıñ Filologiya häm mädäniyatara kommunikatsiyalär institutı muzeena, Şärık klubına ekskursiyalär oeştırıldı.

«Sälätkä nur bulgan yoldızlar» konkursı - icat cimeşeñ öçen büläkkä iya bulu gına tügel, jyuri ägzalarınnan eşeñ buença kaytawaz işetü mömkinlege dä! Kazıylar bulaçak tanılgan ädiplärgä kiñäşlären birde, üseş zonaları turında söyläde, konkurska cibärelgän eşlärgä karata fikerlären citkerde. Katnaşuçılarnıñ icat cimeşlärenä mäşhür ädiplär, tanılgan jurnalistlar: Zilä Fäyzullina, Yoldız Şarapowa, Rädif Sägdi, Xäbir Ibrahimow, Çulpan Galiäxmätowa, Çulpan Garifullina, Gölüsä Zakirowa, Näbirä Gıymatdinowa, Rifat Sälax, Liliya Gıybadullina, Rämis Aymät, Rkail Zäydulla bäya birde.

Kızıklı ekskursiyalär, jyuri ägzaları belän fiker alışu, fikerdäşlär tabu, ciñü şatlıgı: Flüs Latıyfi isemendäge XIII respublikaküläm «Sälätkä nur bulgan yoldızlar» açık ädäbi konkursı tämam.

Barlık ciñüçelärne kotlıybız! Sez - tatar ädäbiyatınıñ kiläçäge!