«Asıltaş» mäktäbe tagın da yugarırak ürlärgä kütärelergä, kiñäergä äzer» kire kaytirga

«Asıltaş» mäktäbe tagın da yugarırak ürlärgä kütärelergä, kiñäergä äzer»

X Xalıkara «Cälät» yaşlär uku-ukıtu forumınıñ dürtençe smenasında «Sälät – kiçä, bügen, irtägä» dip atalgan onlayn-oçraşu uzdı. Katnaşuçılar berläşmäneñ tugan telne öyränü häm saklauga kertkän öleşe turında fiker alıştı. Töp tema isä Sälät «Asıltaş» mäktäbeneñ üseş mömkinleklären bilgeläü buldı.

Çarada märtäbäle kunaklar, ministrlık wäkilläre häm partnerlarıbız da katnaştı. Alar arasında Tatarstannıñ yaşlär eşläre ministrı Damir Fättaxow, mägarif ministrı Ilsur Hadiullin, Rossiya Federatsiyase Däülät Duması deputatı, «Sälät» berläşmäseneñ Popeçitellär sowetı räise Marat Bariew, Kazan şähäre Başkarma komitetı citäkçese urınbasarı Güzäl Sägıytowa, yazuçı, dramaturg, «Äkiyat» Tatar däülät kurçak teatrınıñ baş rejisserı Ilgiz Zäyniew, şagıyrä Rezeda Zäyniewa, Tatarstannıñ atkazangan sängat eşleklese, kompozitor Elmir Nizamow, Bilär muzey-tıyulıgı direktorı Zöfär Şakirow, «Adımnar-Alabuga» polilingwal belem birü mäktäbe direktorı Nadir Kruamşin bar ide. Şulay uk tügäräk östäl artında Sälät berläşmäse wäkilläre – yaşlär üzäge direktorı Aygöl Gabdraxmanowa, anıñ urınbasarı Igor Smirnow, «Sälät»neñ Mägarif häm belem birü texnologiyaläre üzäge citäkçese, filologiya fännäre kandidatı, dotsent Dilärä Yakubowa, Sälät Klubı prezidentı Timerxan Şäyxetdinow häm oeşma aktiwistları da katnaştı. Çaranıñ moderatorı Tatarstan yaşlär eşläre ministrınıñ berençe urınbasarı Timur Söläymanow buldı.

Onlayn-äñgämädä Törkiya, Sogud Garäbstanı, Kanada, Çexiya, Awstraliya, Ispaniya häm Kıtayda yaşäüçe Sälät aktiwistları katnaştı. Alar berläşmä turındagı istälekläre belän urtaklaştı, ireşkän uñışları, çit ildäge könküreşläre xakında söyläde. Watandaşlar Sälätneñ uku-ukıtu proektlarında katnaşırga äzer buluları xakında äyttelär.

Sälätneñ «Asıltaş» mäktäbe 2020 elda açıldı häm 1 nçe «Ä» sıynıfına 12 balanı kabul itte. Ä yaña uku elına inde yaña sıynıf tuplandı. Älege mäktäp Sälätneñ uku-ukıtu, tärbiyaläü ölkäsendäge 25 ellık täcribäsenä, Sälät sotsial-pedagogik kompleksınıñ infrastruktura häm mömkinleklärenä nigezlänep buldırıldı. «Asıltaş»nıñ belem birü kontseptsiyase nigezendä ukuçı şäxesen törle yaklap üsterü maksatı tora.

«Telne mäcbüri öyrätep bulmıy, monıñ öçen dairä kiräk. Ä Sälät 27 el däwamında xalkıbıznıñ yaşlären, mäktäp balaların cıya, telne öyrätü, anı yarattıru öçen tırışa. Bu – bik zur eş. Ul däwam itä häm itäçäk. Çönki millätneñ tele, moñı, añı häm yaşäeşe barlık xalıklar öçen ürnäk bulırga tieş», – dide Ilsur Hadiullin.

Tatarstannıñ mägarif ministrı fikeren Marat Bariew ta cöpläde.

«Sälät xäräkäte belem birü, hönär öyrätü arkılı yaşlärdä tugan telgä, xalıknıñ tarixına karata mäxäbbät uyatu mäsäläsendä başkalarga ürnäk bulıp torırlık», – dide ul. – Sälät üsä: uzgan el Sälät sıynıfları oeşa başladı. Ä bit kayçandır Sälät mäktäpläre bulır digän uy fantastika sıman yañgırıy ide!» – dide Marat Bariew.

Äñgämädä katnaşkan yazuçı, dramaturg, «Äkiyat» Tatar däülät kurçak teatrınıñ baş rejisserı Ilgiz Zäyniew Sälät mäktäbe tabigıy üseştä bulırga tieş digän fikerdä. Anıñ kızı Gäühär «Asıltaş»nıñ 1 nçe «Ä» sıynıfın tämamlagan.

«Sälät, miña kalsa, üzeneñ tabigıy üseşendä barganga yaşi, kiräkle bulıp kala. Äti keşe bularak ta şunı äytä alam. «Asıltaş» mäktäben dä menä şundıy üseştä küräse kilä. Tulı ber mäktäp bulıp oeşırga tieş kebek. Menä bez ber-ike ay başka mäktäpkä yördek. Läkin balabızga ul turı kilmäde. Ä xäzer Asıltaşka küçkäç, ul mäktäpkä barırga teli, xätta cäyge kanikullar tizräk tämamlanuın kötä. Çönki ul aña turı kilä. Sälät mäktäbe – tatar mäktäbe häm ul – bügenge kön tatarınıñ mäktäbe».

Sälät proektları citäkçese Cäüdät Söläymanow katnaşuçılarga räxmäten belderde. «Bez zur eşlär başkarabız. Häm tagın da yugarırak ürlärgä kütärelergä, mäktäpne kiñäytergä äzer», – dide ul üz çıgışında.