Islam Mirgayazow: «Sälät klubı – ul bez!» ← kire kaytirga

17- 21 mart könnärendä «Yoldızlı»da Töbäk «Sälät» klubları öçen XXI gamäli uku-ukıtu seminarı uzdı. «Sälät» klubları balalarga üzläreneñ sälätlären häm kızıksınuların açıklarga häm üsterergä mömkinlek birä. Törle yunäleşlärdäge proektlar, ostaxanälär, treninglar aşa balalar häm yaşüsmerlär üzlären sınap karıy alalar. Seminar duslar tabu, aralaşu häm yaña tanışular buldıru öçen yaxşı mömkinlek. Sälät klubları ägzaları törle proektlarda bergä eşlilär, täcribä urtaklaşalar häm ber-bersenä yardäm itälär.

Smenanıñ barlık neçkälekläre, programması turında bezgä «Sälät» Klubınıñ XIV Prezidentı Islam Mirgayazow söyläde.

- «Sälät» klubı – ul...

Älege sorauga ber süz yaki ber cömlä belän genä cawap birep bulmıydır, miña kalsa. Bez «Sälät klubı – ul bez!» diyargä yaratabız, çönki biredä bik küp sälätle, aktiw, yañalıkka, üseşkä omtıluçı şäxeslär berläşä. Här katnaşuçı – kaderle, härkem kiräk. Bez – berdäm, tatu gailägä äwerelgän zur sistema. Härkemneñ Sälät klubları eşçänlegenä kertkän öleşen bäyaläp betergesez, bar başkargan eşebezne barçabız da çın küñeldän, citdi başkarabız.

- Älege gamäli seminar «Sälät» klubları öçen närsä añlata?

Yazgı gamäli uku-ukıtu seminarı – ul klublarnıñ aerım ber wakıt eçendä başkargan eşçänleklärenä näticä yasau, xisaplar äzerläü, alga taba uzdırırga planlaştırılgan proektların täkdim itü mäydançıgı. Monnan tış, katnaşuçılarnı seminarda klublar eşçänlegendä kiräk bulgan künekmälärgä öyrätü, alarnı komanda bularak berläşterü dä karalgan. Programma näk menä şul maksatlarga nigezlänep tözelä.

- Seminarnıñ programması närsädän gıybarät buldı?

Seminar barışında strategik planlaştıru häm «Sälät» klubları eşçänlegen näticäle alıp baru buença uku-ukıtu programması karalgan. 4 kön däwamında katnaşuçılar başka klublar belän bergäläşep, ber-berseneñ täcribäsen üzläşterep, üz komandalarında eşlädelär. Çakırılgan ekspertlardan häm klub kuratorlarınnan lektsiyalär, treninglar, ostaxanälär oeştırıldı. Bu elnıñ üzençälege bularak, töbäk klubları räisläre öçen aerım uku-ukıtu däresläre dä ütkärelde. Härkem tüzemsezlek belän kötep algan kiçke çaralar da programmanıñ bizäge buldı.

- Bıel nindi proektlarnı tormışka aşıru turında uylandıgız?

Berençedän, töp maksatıbız – ul inde planlaştırılgan proektlarnı yugarı däräcägä citkerü, üsterü, kamilläşterü, ikençedän, iñ masştablı çara – Sälät klubları öçen uku-ukıtu forumı, aña näticäle äzerlekne başlau, häm inde klublar üz töbäklärendä härdaim törle çaralar oeştıra, şul çaralarnıñ proektların äzerläü.

- Töbäk «Sälät» klubları öçen XXI gamäli uku-ukıtu seminarınıñ üzençälege närsädä?

Härber seminarnıñ üz üzençälege bula, berençe karaşka alar oxşaş kebek tä, läkin här seminar saen bez kilgän katnaşuçılarnı häm ukıtuçılarnı yaña alımnar belän gacäpländerergä tırışabız. Mäsälän, bu yulı «Çıgarılış kiçäse» här katnaşuçı öçen onıtılmaslık mizgel buldı. 11 nçe sıynıfnı tämamlauçı sälkeşlärebez öçen bez dä maxsus kiçke çara formatında çıgarılış kiçäse oeştırdık. Şunıñ kısalarında, bez balalarga xäräkätebezdäge däwamçanlık nizamäte, Sälättäge mömkinleklär turında söylärgä telädek.

- «Sälät» Klubı Prezidentı täcribäse şäxsi üseşeñä nindi dä bulsa yogıntı yasadımı?

Älbättä, «Sälät» klubı – ul zur, küpkırlı sistema. Bu sistemada törle keşelär, törle yunäleşlär belän eş itärgä kiräk. «Sälät» mine metodik, icadi, kommunikatiw kebek yaklardan üsterde, kamilläşterde, gomumän, şäxes bularak üsterde, nıgıttı.

- Sälät klublarına teläkläreñ

Minem yaratkan Sälät klublarım, bez sezneñ belän küp kenä katlaulı, läkin şul uk wakıtta kızıklı häm küpkırlı eş başkarabız, alda sezne ni genä kötsä dä, gel alga taba atlagız, yaxşılıkka tartılıgız, yaña eşlär başkarırga sezneñ wakıtıgız citte!