Sälätneñ iñ icadi smenasında laboratoriyalär ← kire kaytirga

Bu könnärdä Bilär muzey-tıyulıgı territoriyasendä «Sälät» forumınıñ ikençe smenası uza. Forumnıñ iñ icadi smenası sälätle balalarnıñ, talantlı yaşlärneñ häm alarnıñ citäkçeläreneñ muzıka, teatr sängate häm biyu yunäleşlärendä icadi potentsialın tormışka aşıru häm üsterü mäydançıgı bulıp tora. Icat Bilär Forumnıñ uku-ukıtu programması unikal: ul üz eçenä Tatarstan Respublikasınıñ häm Rossiya Federatsiyaseneñ başka töbäkläreneñ äydäp baruçı belgeçläre tarafınnan katnaşuçılar häm alarnıñ citäkçeläre öçen äzerlängän küp sanlı lektsiyalär, ostaxanälär, treninglar, icadi oçraşular, laboratoriyalärne ala.

Smena turında tulırak yunäleş citäkçeläre Liliya Nurel, Liya Magnaweewa, Wenera Galimowa, «Ostaz» proektı citäkçese Dilärä Yakubowa häm çakırılgan belgeçlär Nurbäk Batulla häm Zärinä Wildanowa belän söyläştek.

Liliya Nurel: Sälätkä böten respublikadan şulkadär talantlı balalar kilä! Alar öçen belem, yaña täcribä tuplau häm yaña keşelär, kızıklı spikerlar belän tanışu öçen iskitkeç mömkinlek bar. Bez teatr yunäleşe öçen üz eçenä akterlık ostalıgın da, plastikanı da algan kiñ programma tözergä tırıştık. Balalar säxnä sugışın häm xäräkäten öyränäçäk, üz tawışları östendä eşläyaçäk häm teatrnıñ närsä ikänen häm anıñ niçek oeştırılganın beläçäk.

Sälät – ul yaştän ük tormışka döres ruxi mönäsäbät urnaştıruçı fälsäfä. Monda härkemneñ üzeneñ buldıra alaçagına ışanıçı uyanaçak.

Nurbäk Batulla: Sälättä balalar da, ostazlar da zamança mäglümat öyränälär. Citäkçelär yaña täcribä alıp, yaña icat ısulları belän tanışsa, alar balalar belän täñgäl kilerlär ide dip uylıym. Şulay itep, ostazlar ukuçılarga, ä ukuçılar ostazlarga yardäm itäçäk. Bu alım faydalı bulır dip ömetlänäm.

Zärinä Wildanowa: Sälät – minem öçen icat, minem icatlı gailäm. Mondagı keşelär, barlık binalar minem öçen icadi möhit tudıra. Minemçä, Sälättä härkem öçen dä yaña tormış başlana, törle yullar açıla. Sälätkä niçä yaş buluga karamastan da, ul mäñge yaş bulıp kalaçak. Çönki anıñ yazmışı yaşlär kulında.

Liya Magnaweewa: Monda icat törläre sublimatsiyase bara: teatr, biyu häm muzıka. Minemçä, alar ber-berseneñ aerılgısız öleşe. Bıel bez programmabıznı tagın da kızıgrak yasarga buldık. Bezdä öç törle laboratoriya barlıkka kilde, alarga bez iskitkeç sälätle eget-kızlarnı aldık. El saen bez üzebezneñ programmaga yañalık kertergä tırışabız: bıel säxnä xäräkäte, akterlık ostalıgı häm wokal buença ostaxanälär äzerlädek. Küz aldıgızga kiteregez, ber sägat egerme minut eçendä balalar cır yaza ala! Kemder süzlär, kemder muzıka, ä kemder bit yaza, häm şäp näticä kilep çıga.

Sälät ilhamlanu mömkinlege birä, çönki irtännän kiçkä kadär balalar muzıka, cır häm biyu belän şögıllänälär. Sälät minem öçen ilham çıganagı.

Dilärä Yakubowa: Bu smenaga balalar üzläre genä tügel, ä ostazları, ukıtuçıları, citäkçeläre belän kildelär. Bez alar öçen inde öçençe el kızıklı ostaxanälär äzerlärgä tırışabız. Mäsälän, törle icadi eçke xalätlär belän eşlärgä häm balalarga yardäm itärgä, proektlarga yul tabarga, tawış belän idarä itärgä öyrätäbez. Ä bıelgı smenıñ yañalıgı – ul laboratoriyalär. Öç kön däwamında bezneñ ostazlar ike laboratoriyadä eşli. Uzgan elnı ostazlar balalarnıñ çıgışına karap kızıkkanga, bıel alar öçen dä laboratoriya formatın kerttek.

Minemçä, Ostaz proektı bik ähämiyatle. Balalarga üseş mömkinlekläre birer öçen ostazlarnıñ üzlärenä da üsärgä kiräk, häm monda bez alar öçen şundıy möhit tudırabız.

Wenera Galimowa: Bez balalarga gına tügel, ä ostazlarga da maxsus programma tözibez. Bıel Ostaz proektına inde öç el, häm anıñ eçendä maxsus programma kısalarında icadi laboratoriyalär uzaçak. Balalar belän bergä ostazlar da smena axırında icadi näticälären kürsätäçäklär.

Sälät – mömkinleklär tudırgan möhit. Balalarga, kiläçäk buennarga älege möhitne buldırırga öleşemne kertä alu belän min bik gorurlanam.