«Sämrux» koşı kanatların cäya. VII El premiyasenä garizalar kabul itä başlıybız! kire kaytirga

«Sämrux» koşı kanatların cäya. VII El premiyasenä garizalar kabul itä başlıybız!

Yöräge Sälät dulkınında tipkän härkem öçen kötelgän kön: VII «Sämrux» El premiyasenä garizalar kabul itä başlıybız!

Premiya Tatarstan Respublikası «Sälät» yaşlär ictimagıy fondı tarafınnan Tatarstan Respublikası xökümäte yardäme belän ütkärelä. Oeştıruda «Kazan sälätlelär açık uniwersitetı 2.0» Awtonom kommertsiyaçel bulmagan oeşması yardäm itä. 

Premiyaneñ maksatı: Sälät xäräkätendä katnaşuçı sälätle balalarnı häm talantlı yaşlärne büläkläü, Sälät aktiwistlarınıñ, partnerlarınıñ, Sälät proektları awtorlarınıñ häm oeştıruçılarnıñ eşenä bäya birü.

El saen uzdırıluçı «Sämrux» premiyase tübändäge nominatsiyalär buença ütkärelä:

- «El direktorı» (älege nominatsiyadä barı tik «Sälät 2021» profille alannarı direktorları gına katnaşa ala). 

- «El ölkän äydamanı» (älege nominatsiyadä barı tik «Sälät 2021» profille alannarnıñ ölkän äydamannarı gına katnaşa ala).

 - «El alanı» (älege nominatsiyadä barı tik «Sälät 2021» profille alannarı gına katnaşa ala). 

- «El sälkeşe» (älege nominatsiyadä 14 yaştän alıp 18 yaşkä kadär bulgan, Sälät xäräkätendä aktiwlıgı 2 eldan da kim bulmagan sälkeşlär katnaşa ala). 

- «El äydamanı» (älege nominatsiyaneñ laureatları häm ciñüçese Respublikaküläm «Äydamannar yarışı 2021» bäygese näticäläre nigezendä bilgelänä). 

- «El klubı» (älege nominatsiyadä Sälät xäräkätendä kimendä ber el eşçänlek täcribäse bulgan klublar gına katnaşa).

 - «El kuldaşları» (älege nominatsiyadä Sälätneñ 2021 nçe elnıñ profille smenasında kuldaş bularak (ber törkemdä) eşlägännär genä katnaşa ala).

 - «Sälät cırlıy» (älege nominatsiyadä 2020-2021 nçe ellarda icat itelgän awtorlık cırı katnaşa ala. Cır tübändäge koeffitsientlar nigezendä bäyalänä: 1,5 — katnaşuçı cırnıñ süzlären häm köen üze yazgan bulsa, 1 —  katnaşuçı başka awtor köenä üz aranjirowkasın yasagan häm  cır süzlären üze yazgan bulsa).

- «El initsiatiwası» (älege nominatsiyadä töbäk «Sälät» klubları häm Sälät aktiwı mäktäbe proekt törkemnäre eşçänlege kısalarında tormışka aşırılıp, uñışka ireşkän proektlar katnaşa. Proektnı tormışka aşıru wakıtı ber aydan da kim tügel, ämma ber eldan artmaska tieş).

Bıel bu isemlekkä yaña nominatsiya östälde! Xäzer premiyagä «Sälät» eşçänlege kısalarında 1 eldan artık tormışka aşırıla torgan proektlar dägwa kıla ala. 

«El proektı» nominatsiyase – Sälättä inde eldan artık eşläp kilüçe proektlarga üz eşçänlekläre belän tanıştıru, näticäläre belän büleşü öçen menä digän mömkinlek! Premiya yaña däräcälärgä kütärelergä, proektnı tagın da kiñäytergä, üsterergä yardäm itäçäk», - di «Sämrux» el premiyase koordinatorı Aliya Mirmiewa. 

Premiya dürt etapta uzdırıla:

1 nçe etap – «Garizalar kabul itü». Katnaşuçılar garizanı raslangan forma belän www.selet.biz saytında tutıralar häm portfolioların oeştıru komitetına cibärälär. Wakıtı – 2021 elnıñ 29 nçı noyabrenä kadär.

2 nçe etap – «Katnaşuçılarnı saylap alu. Çittän torıp katnaşu etabı». Katnaşuçılarnı portfolio nigezendä saylap alu. Wakıtı – 2021 el, 1-4 nçe dekabr.

3 nçe etap – «Katnaşuçılarnı äñgämä nigezendä saylap alu». Kandidatlar belän äñgämäne ekspertlar sowetı uzdıra häm bäya birä, anıñ töp maksatı – katnaşuçınıñ eşçänlege turında tulırak mäglümat alu. Wakıtı – 2021 elnıñ 7 nçe dekabrennän - 2022 elnıñ 20 nçe gıynwarına kadär.

4 nçe etap – «Tantanalı räweştä premiyane tapşıru». 2022 el, fewral – laureatlarnı häm premiyaneñ ciñüçelären büläkläü. Tantananı ütkärü datası häm wakıtı  oeştıru komitetı tarafınnan östämä räweştä xäbär itelä.

Garizalarıgıznı kötep kalabız! Nigezlämä belän MONDA tanışa alasız.