Rinat Sadıykow: «Bez Tatarstanda «Sälät» kebek berläşmä buluı belän bäxetle». Bilärdä «Sälät» forumınıñ media smenası tämamlandı ← kire kaytirga

Bilärdä «Sälät» forumınıñ bişençe smenası - Media Bilär Forum (Media /Media) tögällände. 6 kön däwamında bargan smena zamança mediaresurslarga bagışlangan ide.

Forumga Samara, Irımbur, Mäskäü ölkäläre, Çuwaşiyadän, Sankt-Peterburgtan häm Tatarstannıñ barlık rayonnarınnan 823 katnaşuçı cıeldı. Alar arasında - fän olimpiadaları, konferentsiyalär ciñüçeläre häm prizerları, töbäk Sälät klubları liderları häm Tatarstan Respublikası rayonnarı häm mäktäpläre aktiwistları.

Smenanıñ yabılu tantanasında Tatarstan Respublikası yaşlär eşläre ministrı Rinat Nail ulı Sadıykow ta katnaştı:

«Bez Tatarstanda «Sälät» kebek berläşmä buluı belän bäxetle. Monda respublikabıznıñ här 45 rayonınnan da katnaşuçılar cıeldı. El saen monda kilü sezneñ öçen zur bäxet ikänen beläm.

Sezgä Respublikabız Räise Röstäm Nurgali ulı Miñnexanowtan kaynar sälamnär citkeräm. Tatarstan Xökümäte, Yaşlär eşläre ministrlıgı berläşmägä härwakıt yardäm kürsättelär häm kiläçäktä dä kürsätäçäk.

«Sälät»kä bıel 30 yaş tuluı belän bez sezne çın küñeldän täbriklibez. Bu - zur uñış häm zur xezmät. Monıñ öçen härkaysıgızga zur räxmät!»

Media Bilär Forum smenası sotsial mediaresurslar belän eşläü öçen kiräkle bulgan aktual instrumentlarga bagışlangan smena ide. 6 kön däwamında bargan uku-ukıtu programması wakıtında katnaşuçılar jurnalistika, foto häm wideo, trendlar, reklama, kreatiw fikerläü, bloging häm sotsial çeltärlär buença kontent buldıru üzençälekläre buença belem aldılar, üzlären bu ölkädä sınap karadılar.

Alar öçen däreslärne, ostaxanälärne Tatarstan häm Rossiyaneñ äydäp baruçı belgeçläre: «Gromkie rıbı» kreatiw agentlıgınıñ nigez saluçılarnıñ berse, rejisser Timur Usaew, «MOBi digital» marketing agentlıgınıñ citäkçese Azat Şämsewäliew, Imagine group agentlıgınıñ kreatiw direktorı Saşa Korolkow, «Kazan interesnaya» blogı awtorı, tanılgan bloger Rusina Semenenko, SMM, marketing ölkäse belgeçe Alinä Gimaltdinowa, Tatarstannıñ äydäp baruçı jurnal häm gazetalarınıñ baş möxärrirläre häm korrespondentları häm başka bik küp belgeçlär alıp bardılar. Ostaxanälärdä häm icadi laboratoriyalärdä üzeñne icadi yaktan kürsätü, hönär saylau, media-tirälektä eşläü, blog başlau, sotsial çeltärlär alıp baru häm portfolio buldıru öçen möhim künekmälärne öyränü temaları kütärelde.

Smenanıñ här köne kızıklı däreslär häm uennar, sport yarışları, intellektual uennar häm kiçke çaralar belän ürelep bardı. «Sälät»neñ traditsiyalärenä kerep bargan «GalämFest» wideokiçäse, futbol, woleybol, stritbol, şaxmat buença çempionatlar häm djem-sessiyalär uzdı.

Forumda katnaşuçılar ostaxanälär, treninglar häm lektsiyalär tıñlau barışında spikerlar birgän biremnärne ütädelär, üzlären jurnalistlar häm media ölkäse keşeläre bularak sınap karadılar. Däreslärdäge basım kreatiw fikerläügä, üzeñne kürsätügä, zamananıñ aktual häm faydalı instrumentların kullanuga bagışlangan ide.

Forumda «Canlı Sälät» turı efirlar studiyase şulay uk eşçänlegen däwam itte. Efirlarda «Sälät» media-üzäge citäkçese Alsu Äbüzärowa, SMM, marketing ölkäse belgeçe Alinä Gimaltdinowa, «Gromkie rıbı» kreatiw agentılıgı stsenaristları häm rejisserları Ruslan Zakyainow belän Timofey Şaragin, alannarnıñ başcitäkläre, yunäleşlär direktorları katnaştılar. Tapşırularnıñ yazmaların härkem forumınıñ räsmi WKontakte häm YouTube akkauntlarında karıy ala.

Şulay uk smena däwamında Sälät radiostantsiyase eşläde, ul forum katnaşuçılarına matur cırlar, kızıklı äñgämälär häm kütärenke käef büläk itte.

Yomgaklau kiçke çarasında «Malsi Music» katnaşında open-air uzdı.

Alda katnaşuçılarnı «Sälät» forumınıñ altınçı smenası — ALDINGILAR BILÄR FORUM kötä, ul «Aldıngılar xäräkäte» belän berlektä oeştırıla. Bu smena kısalarında katnaşuçılar liderlık häm komanda künekmälären üsteräçäklär. Eş xäräkätneñ 12 yunäleşe buença başkarılaçak: mägarif, fän, xezmät häm hönärlär, mädäniyat, wolonterlık, patriotizm, sport, sälamät yaşäü räweşe, media, diplomatiya, ekologiya häm turizm.

Anıñ kısalarında ukuçılarnı törle ictimagıy oeşmalardan, törle ölkälärdän kilgän belgeçlärdän ostaxanälär häm lektsiyalär kötelä.

Xalıkara «Sälät» yaşlär uku-ukıtu forumı Tatarstan Respublikası Xökümäte, TR Yaşlär eşläre ministrlıgı häm TR Mägarif häm fän ministrlıgı yardäme belän uzdırıla.