Röstäm Miñnexanow: «Sälät - bezneñ prioritetta» ← kire kaytirga

Bügen Tatarstan Respublikası Räise Röstäm Miñnexanow XIII Xalıkara «Cälät» yaşlär uku-ukıtu forumınıñ altınçı, Rossiya balalar häm yaşlär xäräkäte «Aldıngılar xäräkäte» belän berlektä uzdırıluçı smenası - Aldıngılar Bilär Forumda (Perwıe/ Forward) buldı.

Respublikabız Räise Aldıngılar Bilär Forum katnaşuçıları belän aralaştı, smenanıñ uku-ukıtu mäydançıkları belän tanıştı häm sälkeşlärgä möräcägat itte:

«Sezneñ kebek kızlar-egetlär bulganda Tatarstannıñ, ilebezneñ kiläçäge uñay bulır. Respublikabızda küp proektlar gamälgä aşırıla, Sälät – bezneñ prioritetta. Bez näk menä sezgä tayanabız. Sälätkä telägem – kiñäergä!»

Smena Bilärdä, 5 awgusttan başlap, 9 awgustka kadär uza. Ul ukuçılarnıñ üzidaräsen häm komanda künekmälären üsterügä yunälderelgän. Eş xäräkätneñ 12 yunäleşe: mägarif, fän, xezmät häm hönärlär, mädäniyat, igeleklelek, patriotizm, sport, sälamät yaşäü räweşe, media häm kommunikatsiyalär, diplomatiya, ekologiya häm turizm buença başkarılaçak. Aerım igtibar xäräkätneñ maxsus Tatarstanda gına bulgan yunäleşe – «Tugan tel, milli mädäniyat häm traditsiyalär»gä bagışlana. Aldıngılar Bilär Forum (Perwıe/ Forward) smenasında 800 bala katnaşa.

«Aldıngılar xäräkäte»ndä katnaşuçılarnıñ kübese «Sälät» proektlarında katnaşu täcribäsenä iya. Alar proektlarnıñ asılın añlıylar. «Aldıngılar xäräkäte», gomumrossiya xäräkäte bularak, «Sälät» berläşmäsenä törle mömkinleklär birä. «Sälät» bilgele ber kıymmätlär nigezendä üsä.

Bıel «Sälät» 30 ellıgın bilgeläp ütä. Kazan däülät uniwersitetınıñ entuziast-ukıtuçıları initsiatiwası belän 1994 elda Arçada (Tatarstan) 65 bala katnaşında berençe ukıtu-sälamätländerü lagerennan başlangan «Sälät» xäräkäte, Tatarstan Respublikasınıñ 25 meñnän artık sälätle balasın häm yaşlären, Rossiya Federatsiyaseneñ unnan artık töbägen, şulay uk çit illärne üz proektlarına cälep itüçe sotsial-pedagogik komplekska kadär utızellık üseş yulı ütte.

Bügenge köndä «Sälät» - ekosistema isemenä laek berläşmä. Bu xakta «Sälät» yaşlär üzäge direktorı Aygöl Gabdraxmanowa belderde. Ul «Sälät»neñ üseş yulı, alannarı, proektları turında söyläde, ekosistemanıñ töp kıymmäte – sälkeşlär buluın assızıkladı.

Iskärtep uzıyk, Xalıkara «Sälät» yaşlär uku-ukıtu forumı 24 iyunnän 9 awgustka kadär Bilär tarixi-arxeologik muzey tıyulıgı territoriyasendä uza.

Forum wakıtında törle yunäleşlärgä bagışlangan altı smena: Hönärlär Bilär Forum (Remesla/Junior Skills), Icat Bilär Forum (Tworçestwo/Arts), Sälät Bilär Forum (Selet/Sälät), Mäglümati texnologiyalär Bilär Forum (Informatsionnıe texnologii/Information Technologies), Media Bilär Forum (Media/Media) häm Aldıngılar Bilär Forum (Perwıe/Forward) uza.

«Sälät» forumı – Tatarstan Respublikası Räise Röstäm Miñnexanow yardäme belän uzdırıluçı töbägebezneñ yöze bulgan proektlarnıñ berse.

Bıel «Sälät» forumnarı Tatarstan Respublikasınıñ barlık rayonnarınnan 14000 balanı häm Rossiya töbäklärennän kilgän watandaşlarnı berläşterde.