Sälät yaña täcribä häm zur ürlär yaularga etärgeç birä ← kire kaytirga

«Tatar-inform» mäglümat agentlıgında «Sälätle cäy – 2024» yal itü kampaniyase başlanuına häm Sälätle balalarnı häm yaşlärne üsterü ölkäsendä IX respublikaküläm «Sämrux» el premiyasen tapşıru tantanasına bagışlangan matbugat konferentsiyase uzdı. 

Çarada TR Räise yardämçese, «Aldıngılar xäräkäte» oeşmasınıñ respublika bülege citäkçese Timur Söläymanow, TR Yaşlär eşläre ministrı urınbasarı Aygöl Sabirowa, «Sälät» yaşlär üzäge direktorı, Sälät klubınıñ IX prezidentı Aygöl Gabdraxmanowa, «Sälätle cäy» üzäge citäkçese, «Sälät» yaşlär üzäge direktorı urınbasarı Ayaz Xanafin, IX «Sämrux» el premiyaseneñ «El äydamanı» nominatsiyase ciñüçese Ilziya Näcipowa katnaştı.

«Sälät» yaşlär ictimagıy fondı, Tatarstan Respublikası Xökümäte yardäme belän, aktiw balalarnı, yaşlärne, ostazlarnı, alannarnı, Sälät klubların 2015 nçe eldan başlap, «Sämrux» el premiyase belän büläkli. 9 el däwamında älege çarada 625tän artık keşe katnaştı, 74 ciñüçe bilgelände.

Bıel «Sämrux» el premiyasendä barlıgı 18 nominatsiya: «El sälkeşe», «El äydamanı», «El kuldaşları», «El ölkän äydamanı», «El metodistı», «El direktorı», «El alanı», «El klubı», «El ostazı», «El partnerı», «Sälät cırlıy», «Forum başcitäge», «Sälät stipendiyase», «Bez räxmätle», «Ber dulkında», «Sälät klassı», «El klub kuratorı», «El klub ukıtuçısı» buença ciñüçelär bilgelände.

«Min Sälätkä berençe tapkır 2016 elda kuşıldım. Mäktäptän aktiwist bularak, mine «Bolgar — Tugan tel» alanına cibärdelär. Şundıy oşatıp kayttım bu moxitne, biredäge açık küñelle keşelärne häm bik teläp, törle smenalarda yal ittem, äydaman buldım. Sälättäge aktiw eşçänlegemneñ näticäse «Sämrux» el premiyasendä ciñü buldı, - dip söyläde jurnalistlarga Ilziya Näcipowa. - Sälät yaña täcribä häm zur ürlär yaularga etärgeç birä. Ber nominatsiyadä ciñüçe inde bilgele, ä kalgannarında berençelekne kemnär alganın bügen «Sämrux» el premiyasen tapşıru tantanasında beläçäkbez».

«Bıel «Sämrux» el premiyase tugızınçı tapkır ütkärelä. Ul el däwamında Sälätne üstergän, nıgıtkan şäxeslärgä räxmät citkerü, alarnıñ xezmäten bilgeläü, iñ osta sälätlelärne büläkläü yözennän uzdırıla. «Sämrux» el premiyase belän kışnı tögälläp, uzgan elga näticälär yasap, «Sälätle cäy – 2024» yal itü kampaniyasen başlıybız», - dip söyläde Aygöl Gabdraxmanowa.

Şulay uk «Sälät» yaşlär üzäge direktorı TR Räise Röstäm Miñnexanownıñ, TR Yaşlär eşläre ministrlıgınıñ, TR Mägarif häm fän ministrlıgınıñ Sälät üseşenä zur öleş kertüen dä bilgeläp ütte.

«Sälätle cäy – 2024» yal itü kampaniyase kısalarında, gadättägeçä, profille smenalar, töbäkara çatırlı «Bolgar –Tugan tel» alanı, XIII Xalıkara «Sälät» yaşlär uku-ukıtu forumı häm «Iske Kazan» cıenı uzaçak.

«2023 elnıñ cäendä Sälät berläşmäse tarafınnan Tatarstan, Çuwaşiya, Başkortstan häm Kırım Respublikalarında 30 profille alan uñışlı uzdırıldı. Bu wakıt eçendä Sälät alannarı häm Forumnarında 14000nän artık keşe yal itte, alar belän 500 dän artık äydaman eşläde. Agımdagı elda şulay uk, traditsion Sälät alannarın, xalkıbıznıñ tarixın öyränü, tugan telne saklau häm üsterügä yunältelgän çaralar uzdıru planlaştırıla», - dip söyläde Aygöl Sabirowa.

«Sälätle cäy» yal itü kampaniyasenä äzerlekle kadrlar cälep iteläçäk. Sälät bu eşne el äylänäse alıp bara. Kadrlar äzerläü maksatında «Äydamannar mäktäbe», «Başcitäklär mäktäbe» häm «Ukıtuçılar mäktäbe» uzdırıla. Alarnıñ eşçänlegendä 700dän artık keşe katnaşa.

«Barlık Sälät alannarında, proektlarında katnaşırga teläüçe äydamannar öçen maxsus onlayn häm oflayn däreslär oeştırıldı. Uzgan eldan başlap, «Başcitäklär mäktäbe» kısalarında metodistlar öçen uku-ukıtu programması uzdırsak, bıel berençe tapkır SMM-belgeçlär öçen «Media mäktäbe» ütkärdek. Alannar öçen sıyfatlı programma äzerläü közdän ük başlana», - dip assızıkladı «Sälätle cäy» üzäge citäkçese, «Sälät» yaşlär üzäge direktorı urınbasarı Ayaz Xanafin.

Anıñ süzlärençä, här balanıñ üzenä oşagan profille alannı saylau häm şuşı yunäleşne tiränten öyränü mömkinlege.

TR Räise yardämçese, «Aldıngılar xäräkäte» oeşmasınıñ respublika bülege citäkçese Timur Söläymanow Sälät belän «Aldıngılar xäräkäte»neñ xezmättäşlege xakında söyläp kitte.

«Ike xäräkätneñ dä missiyase täñgäl. Kızıklı häm faydalı bulgan urtak proektlarıbız bar. 2023 elda Bilär Forumnıñ altınçı smenası Rossiyaneñ «Aldıngılar xäräkäte» balalar häm yaşlär xäräkäte belän berlektä uzdı. Sälät moxite «Aldıngılar xäräkäte»nä köçle komanda tuplarga yardäm itte,» - dip bilgeläde ul üz çıgışında.