Sälät SMM-belgeçlär äzerli ← kire kaytirga

26 – 28 gıynwar könnärendä «Yoldızlı» Sälätle balalar häm yaşlär yal itü häm uku üzägendä I Respublikaküläm Sälät «Media mäktäbe»neñ küçmä sessiyase bulıp uzdı.

Media mäktäbe profille Sälät alannarınıñ eşçänlegen, sıyfatlı kontent yasap, sotsial çeltärlärdä yatkırtuçı professional SMM-belgeçlär tuplauga häm alarnıñ künekmälären üsterügä yunältelgän.

Küçmä sessiya kısalarında gayat bay uku-ukıtu programması uzdırıldı. Katnaşuçılarnıñ şäxsi sıyfatların üsterügä, sıyfatlı wideoroliklar töşerü, alarnı montajlau, kontent-plan, media-plan tözü, surätlär yasau, kızıklı rubrikalar, wiktorinalar kullanu, postlar öçen döres, matur tekstlar yazu serlären üzläşterügä yunältelgän törle treninglar, ostaxanälär, açık lektsiyalär ütkärelde. SMM-belgeçlär yaña belemnär tuplap kına kalmadı, alarnı gamäldä kullanırga da öyrände – katnaşuçılarnıñ iñ yaxşı eşläre Sälät berläşmäseneñ räsmi akkauntlarında çıgarıldı.

Media ölkäsendä eşläüçe aldıngı belgeçlär yaş SMM-belgeçlärgä üz kiñäşlären birde. Sotsial çeltärlärne alıp barunıñ neçkälekläre turında katnaşuçılarga Tatarstan Respublikası Räise mäglümat-analitika idaräseneñ analitika bülege mödire urınbasarı Ekaterina Yambarşewa, rilsmeyker, Reels buença intensiw awtorı Nazlıgöl Xäbibullina, Tatarstannıñ tanılgan blogerı Rawil Zakirow, kopirayter Dilärä Şäripowa, SMMATRIX agentlıgına nigez saluçı Arzu Yosıfowa, Tatarstan Respublikasınıñ Milli kitapxanäseneñ SMM-belgeçe Renata Şäripowa häm «Sälät» media üzägeneñ belgeçläre söyläde.

Monnan tış, uku-ukıtu programmasında alannarnıñ sotsial çeltärlären alıp baruda Sälät printsiplarına häm matsatına nigezlänüneñ möhimlegenä basım yasaldı.

Täüge «Media mäktäbe» tögälläde. SMM-belgeçlär Sälätne kürsätergä äzer, alda alarnı onıtılmaslık täcribä häm gacäep cäy kötä!