«Şäxes üseşe öçen Sälättä barlık şartlar da tudırılgan» ← kire kaytirga

Bilärdä X Xalıkara «Cälät» yaşlär uku-ukıtu forumınıñ dürtençe smenası – MEDIA BILÄR FORUM tämamlandı. Sotsial mediaresurslar belän eşläü öçen kiräkle bulgan aktual instrumentlarga bagışlangan älege smena Tatarstannan häm Rossiya töbäklärennän meñnän artık balanı bergä cıydı. Forumda katnaşuçılar Orenburg, Saratow, Samara, Swerdlau, Ulyan ölkäse häm Başkortstannan kildelär.

Smena barışında «Sälät cıenı» tematik festiwale uzdı. Ul sälätlelärneñ Bilärgä kayta başlawına 25 el tuluına bagışlangan. Festiwaldä balalar üzläreneñ intellektual häm icadi potentsialların kürsätä aldı. «Sälät cıenı»na Tatarstan Respublikası prezidentı Röstäm Miñnexanow ta kilde.

Röstäm Miñnexanow «Sälät» forumınıñ tatar telen häm milli traditsiyalärne saklauda möhim urın biläwen bilgeläp ütte. Anıñ süzlärençä, älege missiya Tugan tellär häm xalıklar berdämlege elında aeruça aktual.

«Bu izge cirdä oçraşuıbızga bik şatmın. Sälät keçkenä genä palatkalardan başlandı, xäzer isä barlık mömkinlekläre dä bulgan tulı ber şähärçekkä äylände. Kiläçäktä dä şulay bergä bulıgız! Respublikabıznı, millätebezne alga alıp barırga nasıyp bulsın!», – dide Röstäm Miñnexanow.

Tatarstan yaşlär eşläre ministrı Damir Fättaxow süzlärençä, Sälät bügen Tatarstan häm respublikadan çittä yaşäüçe meñlägän talantlı bala häm yaşlär öçen mömkinleklär buldıra.   

«Sälät» Forumı – törle ölkälärdäge täcribä häm ideyalär belän urtaklaşu mäydançıgı. Ul gadäti yaşlär xäräkätennän cämgıyatne sälamätländerü texnologiyasenä äylände. Talantlı balaları, icadi proektları, üz kiemnäre, media üzäge, xätta mäktäbe dä bar! Bu Sälätne Tatarstannıñ iñ köçle brendlarınıñ bersenä äwerelderä, – dip bilgeläp ütte ministr. – Bu el Tatarstanda Tugan tellär häm xalıklar berdämlege elı dip iglan itelde. Ä Sälät digändä härwakıt totrıklılık, telne saklau häm aña karata mäxäbbätne arttıru küz aldına kilä».

«Sälät cıenı» kısalarında «Sälät – kiçä, bügen, irtägä» dip atalgan onlayn-oçraşu uzdı. Çarada Sälät aktiwistları, çakırılgan kunaklar katnaştı. Onlayn-äñgämägä Törkiya, Sogud Garäbstanı, Kanada, Çexiya, Awstraliya, Ispaniya häm Kıtayda yaşäüçe Sälät aktiwistları da kuşıldı.

Katnaşuçılar berläşmäneñ tugan telne öyränü häm saklauga kertkän öleşe turında fiker alıştı. Töp tema isä Sälät «Asıltaş» mäktäbeneñ üseş mömkinleklären bilgeläü buldı. Çit ildä yaşäüçe watandaşlar berläşmä turındagı istälekläre belän urtaklaştı, ireşkän uñışları, çit ildäge könküreşläre xakında söyläde. Kunaklar Sälät berläşmäseneñ belem birü proektlarında katnaşırga äzer buluların belderde.

«Telne mäcbüri öyrätep bulmıy, monıñ öçen dairä kiräk. Ä Sälät 27 el däwamında xalkıbıznıñ yaşlären, mäktäp balaların cıya, telne öyrätü, anı yarattıru öçen tırışa. Bu – bik zur eş. Ul däwam itä häm itäçäk. Çönki millätneñ tele, moñı, añı häm yaşäeşe barlık xalıklar öçen ürnäk bulırga tieş», – dide Ilsur Hadiullin.

Isegezgä töşeräbez, bıel MEDIA BILÄR FORUM 6 yunäleş – foto, wideoprodakşn, sotsial çeltärlärne alıp baru, telewizion jurnalistika, bloging häm podkastlarnı kolaçlıy.

«Xäzerge wakıtta piar belgeçlege – iñ aktual hönärlärneñ berse. Anı zamana taläbe dip äytergä bula. Däreslärem dä näk şul temaga bagışlangan ide. Balalar belän üz brendıñnı buldıru, eşlägän oeşmañnı tanıtu turında söyläştek. Alarga könläşep tä kuydım. Sälätneñ üz ruxı, dönyası. Şäxes üseşe öçen barlık mömkinleklär dä bar. Monda kilgän balalarga barı tik tudırılgan şartlardan faydalanıp, belem alırga häm yal itärgä kiräk», – di smenanıñ spikerı, «Tärtip» radiosınıñ PR bülege citäkçese Aysılu Leron.

Smenaga spiker bularak çakırılgan kunaklar arasında şulay uk tarix fännäre kandidatı, Kazan Federal uniwersitetı dotsentı, Istanbul uniwersitetı mögallime Ilsur Näfıykow, rejisser Ilşat Räximbay, G. Kamal isemendäge Tatar däülät akademiya teatrı akterı, Tatarstannıñ atkazangan artistı Fänis Cihanşa, GTRK «Tatarstan» alıp baruçısı Ayzilä Batırxanowa, Feysbuk, Instagram, TikTok targetologı Räsül Wäliew, şagıyrä, «Kitap FM» radiosınıñ tapşırular redaktorı Gölinä Şäyxi, «cirle turizm» yunäleşe blogerı, RF Mädäniyat ministrlıgı oeştırgan «Kultura slowa» konkursı ciñüçese Rusina Semenenko, SMM belgeçe, frilanser Läylä Leron-Baxmutowa, «Şayan TW» redaktsiyase wäkilläre h.b. bar.