Timur Söläymanow: «Aldıngılar xäräkäte»ndäge balalarga üzlären kürsätergä mömkinlek birgän öçen «Sälät»kä räxmät ← kire kaytirga

Bilärdäge «Sälät» forumınıñ yomgaklau smenası «Aldıngılar xäräkäte» belän berlektä uzdırıla.

Kiçä Bilärdä XII Xalıkara «Sälät» yaşlär uku-ukıtu forumınıñ yomgaklau smenası – Aldıngılar Bilär Forum start aldı. Bıel ul berençe tapkır «Aldıngılar xäräkäte» Rossiya balalar häm yaşlär xäräkäte belän berlektä uzdırıla.

Smena açılışında «Sälät» Yaşlär üzäge direktorı Aygöl Gabdraxmanowa çıgış yasadı:

«Bez sezne köttek häm sezneñ öçen programma äzerlädek. Smena däwamında biredäge aktiw katnaşuçılarnıñ kim digändä yöze belän duslaşırsız dip ışanam. Sezgä wakıtıgıznı mawıktırgıç itep uzdıru, yaña belem alu, tanışular, kiläse uku elına energiya tuplawıgıznı teläp kalam», – dide ul üz çıgışında.

Smena katnaşuçıların Tatarstan Respublikası Räise yardämçese, «Aldıngılar xäräkäte» balalar häm yaşlär gomumrossiya ictimagıy-däülät xäräkäteneñ töbäk bülege Sowetı citäkçese Timur Söläymanow sälamläde.

«Bilär – köç cıyu häm oçraşu urını. Biredä bez ber-berebezne tagın da köçäytergä häm üzara yardäm iteşergä tieşbez. Monı barı tik ber-bereñne işetä, xörmät itä, kadereñne belä torgan cirdä genä eşlärgä mömkin. «Sälät» tarafınnan yaña buınga şundıy mönäsäbät, kaygırtuçanlık, igtibar bulganga, bezneñ, «Aldıngılar xäräkäte»neñ, yaña xäräkät bularak, zur missiyase bar: yaña balalarga üzlären kürsätü mömkinlege birü. Monıñ öçen «Sälät»kä bik zur räxmät», – dip bilgeläde üz çıgışında Timur Söläymanow. – Min bezne Baykonur (dönyada berençe häm mäydanı buença iñ zur, xäzerge wakıtta gamäldä bulgan kosmodrom – awt.) belän çagıştırır idem. Bügen «Aldıngılar xäräkäte» aldında kosmik burıç tora: Aldıngılar cıelmasın buldıruga start birü. Tatarstanda bu eşne centekläp başkarabız. Bezgä barıbızga da här ägzası möhim bulgan, ber zur gailägä äwerelüebezne telim. Şul uk wakıtta xäräkätebezneñ gomumi printsipları, kıymmätläre turında da onıtmaska tieşbez. Äytergä kiräk, alar «Sälät» printsipları belän 100 protsent turı kilä. Älege urın – köç tuplau urını, näk menä biredä zur xäräkätebez üseşeneñ yaña tarmagı üz başlangıçın ala.

Tantanalı açılıştan soñ Open-air kontsertında Ilgiz Şäyxraziew häm Malsi Music çıgış yasadı. «Sälät» xitları yardämendä alar smena katnaşuçıların aktiw yal dulkınına köyläde.

Aldıngılar Bilär Forumda Tatarstan munitsipal rayonnarınnan 12-17 yaşlek 900dän artık bala katnaşa. Alar «Aldıngılar xäräkäte»neñ här bülegennän saylap alıngan.

Altınçı smena ukuçılar üzidaräsen häm komanda künekmälären üsterügä bagışlana. Forum eşçänlege «Aldıngılar xäräkäte»neñ 12 yunäleşe – belem birü, fän, xezmät häm hönär, mädäniyat, ireklelek, watanpärwärlek, sport, sälamät yaşäü räweşe, media häm kommunikatsiyalär, diplomatiya, ekologiya häm turizm buença alıp barılaçak.

Programma däwamında ukuçılarnı ictimagıy oeşmalar wäkillärennän, törle ölkä professionallarınnan belem birü master-klassları kötä.

Älege smenada «Närsä? Kayda? Kayçan?» elitar klubı ägzası, «Bällür yabalak» iyase Nikita Starun da katnaşa. Ul forum katnaşuçıları belän oçraşaçak häm intellektual turnir uzdıraçak.

9 häm 10 awgustta smenada «Canlı Sälät» (SeletLive) studiyasennän turıdan-turı efirlar ütkäreläçäk. Alarnı härkem «Sälät»neñ WKontakte häm YouTube räsmi akkauntlarında karıy ala. Translyatsiyalär 18.30da başlanaçak.

«Aldıngılar xäräkäte» balalar häm yaşlärneñ Rossiya xäräkäte il Prezidentı Wladimir Putin kararı belän 2022 elnıñ cäendä buldırıldı. Tatarstanda «Aldıngılar xäräkäte» aktiw eşçänlegen 2023 elnıñ gıynwarında başlap cibärde. Näk menä şul wakıtta töbäk xäräkäteneñ citäkçese itep Timur Söläymanow bilgelände.

Älege xäräkätneñ töp yunäleşläre balalar häm yaşlärneñ kıymmätlären formalaştıru, urtak icadi eşçänlek arkılı balalar häm yaşlärneñ üzlären kürsätergä yardäm itü, yaşlär xäräkätläre eşçänlegenä yaña auditoriya cälep itü.

Isegezgä töşeräbez, Xalıkara «Sälät» yaşlär uku-ukıtu forumı Tatarstan Respublikası Xökümäte, TR Yaşlär eşläre ministrlıgı häm TR Mägarif häm fän ministrlıgı yardäme belän uzdırıla.