Bilärdä Sälätneñ yomgaklauçı smenası start aldı ← kire kaytirga
Kiçä Bilär tarixi arxeologik muzey-tıyulıgı territoriyasendä XI Xalıkara «Sälät» yaşlär uku-ukıtu forumınıñ soñgı altınçı smenası - LIDERLIK BILÄR FORUMnıñ (LIDERSTWO/LEADERSHIP) açılış tantanası bulıp uzdı.
Açılu tantanasında sälamläü süze belän Rossiya Federatsiyase Prezidentınıñ Idel bue federal okrugındagı wäkalätle wäkile apparatınıñ ictimagıy proektların gamälgä aşıru departamentı başlıgı Solowew Dmitriy Ewgenewiç çıgış yasadı.
«Min monda berençe tapkır kildem häm sezgä çın küñeldän könläşäm, dip äytergä telim – sez, çınnan da, iskitkeç urınga eläktegez. Keşelärgä yaxşırak bulırga, yaña duslar tabarga häm milli goref-gadätlärne saklarga yardäm itüçe urınga. Min ışanam, forumda ütkärgän könnäregez sezneñ xäteregezdä mäñgegä kalaçak», - dip assızıkladı ul.
Şulay uk balalarga Tatarstan Respublikası mägarif häm fän ministrı urınbasarı Alsu Äsädullina da möräcägat itte.
«Sez üz yaşegez öçen bik küp eşlär başkarasız. Min bügen başlangan smenanıñ istä kalırlık buluın häm sezne kiläse uku elında cılıtıp toruın bik telim. Räxmät sezgä häm räxmät bu iskitkeç urınnı buldıruçı oeştıruçılarga», - dip östäde ul.
Sälätneñ yomgaklauçı smenası Rossiya mäktäp ukuçıları xäräkäte belän berlektä oeştırıla, forum territoriyasendä ilneñ 12 töbägennän 1000nän artık aktiwist-bala yal itä.
Katnaşuçılar - Tatarstan Respublikası häm Rossiya Federatsiyase töbäkläre «Rossiya mäktäp ukuçıları xäräkäte»neñ baza mäktäpläre üzidaräse liderları, 2022 elgı cäyge sälamätländerü kampaniyase näticäläre buença iñ aktiw balalar.
Yomgaklauçı smena wakıtında kunaklarnı ictimagıy oeşmalardan häm törle ölkälärdäge belgeçlärdän ostaxanälär kötä - SMMnan alıp akterlık ostalıgına kadär. Ä mawıktırgıç uku-ukıtu programmaları balalarga hönäri yunäleşlären saylauda gına tügel, tormış maksatların formalaştıruda da yardäm itärgä tieş.
Ostaxanälärne häm uku-ukıtu sessiyalären dizayner häm ukıtuçı Mariya Stepanowa, TR mädäniyat ministrı kiñäşçese Ruslan Şihabetdinow, MinMolTins yunäleşe citäkçese Alina Kostyagina, TR Yaşlär eşläre ministrı urınbasarı Alla Kondratewa, Mäskäü Politexnik Uniwersitetınıñ studentlar trening üzäge citäkçese Tatyana Bizina, «URAM» yaşlär ekstrim-parkı direktorı Mariya Kryukowa, biznes-trener, kouç Diana Wäliullina häm telejurnalist, prodyuser Kira Jeleznyak ütkäräçäk.
«Sälät» Rossiya mäktäp ukuçıları xäräkäte belän bişençe el rättän urtak smena ütkärä. Bıel Tatarstanga Rossiya mäktäp ukuçıları xäräkäteneñ ekologiya häm liderlık yunäleşläre wäkilläre kilde: 300 yaş ekolog häm lider dönyadagı iñ kisken problemalar häm alarnı çişü ısulları turında fiker alışunı däwam ittälär, şulay uk aktiw räweştä üz-üzläre häm äylänä-tirä dönya belän garmoniyadä bulırga öyränälär.
Monnan tış, smena wakıtında «Canlı Sälät» (SeletLive) turıdan-turı efirlar studiyase üz eşen däwam itäçäk. Translyatsiyalär Sälätneñ räsmi WKontakte häm YouTube akkauntlarında alıp barılaçak.