22 mart «Asıltaş» Sälät mäktäbendä oeştırıluçı «Törki illär buença säyaxät» proektı atnalıgınıñ yomgaklau çarası uzdı. Festiwalgä ukuçılar häm alarnıñ mögallimnäre genä tügel, balalarnıñ äti-äniläre, abıylar-apaları, kürşeläre dä bik tırışıp äzerlände. Çarada çın bäyräm moxite buldıruga härkem üz öleşen kertte. Gimnaziyaneñ bizäleşe, ukuçılarnıñ, tamaşaçılarnıñ milli kiemnäre, kunaklar öçen äzerlängän sıy-nigmätlär törki illär buença säyaxät moxiten tudırdı. Säyaxätneñ marşrutı 8 ildän tordı. Alıp baruçılar tamaşaçılarnı här törki töbäkneñ tarixı belän tanıştırdı, alar turında kızıklı faktlar söyläp ütte. Ukuçılar kilgän kunaklarga Törkiya, Üzbäkstan, Äzerbäycan, Törkmänstan, Kazaxstan, Yakutiya, Başkortostan häm Respublikabız Tatarstan xalıklarınıñ milli üzençäleklären çagıldırgan çıgışların täkdim itte. Här törki il xalıklarınıñ milli kostyumnarı, rizıkları, uennarı, cırları, biyuläre, goref-gadätläre – bolarnıñ barısı da «Törki illär buença säyaxät» festiwalendä, çın mägnäsendä, bäyräm ruxı tudırdı. Monnan tış, kiçägä kilgän kunaklar häm ukuçılar festiwal kısalarında oeştırılgan kürgäzmä belän tanışa häm törki illärned milli rizıkların awız itä aldı. Asıltaşlar el däwamında Sälättä häm mäktäptä uzdırıluçı proektlarda, çaralarda aktiw katnaşa. «Törki illär buença säyaxät» proektı üz çiratında balalarnıñ başka millätlär, alarnıñ tarixı, mädäniyate belän, gailälärneñ ber-berse belän yakınnanrak tanışuı, kızıksındırgan soraularına cawaplar tabuı öçen şäp mömkinlek bulıp tora.