«Yarışnıñ iñ awır mizgele – ul üz-üzeñ belän köräşü» kire kaytirga

«Yarışnıñ iñ awır mizgele – ul üz-üzeñ belän köräşü»
Cilkännär cildä, ä äydamanlık ostalıgı yarışta sınala!

18-22 noyabr könnärendä «Fänsar»da «Äydamannar yarışı» uzdı. Uzgan cäydä Sälät alannarında eşlägän, täcribä cıygan 40 abıy häm apa äydamanlık ostalıgın sınadı.

Katnaşuçılar ike ligaga bülende: «Premer-liga»da 26, «Berençe liga»da 14 äydaman yarıştı. Konkurs däwamında kızlar häm egetlär pedagogik oçraklarnı çişte, sörännär yazdı, şämçeklär ütkärde, test uzdı – gomumän, äydamannar öçen 20gä yakın birem äzerlängän ide.

«Öç kön yarış näticäsendä här ligadan 4 finalist saylandı. Finalda alar säxnädän töşmädelär, disäk tä bula! Şul kıska wakıt eçendä finalistlar 10 törle birem ütäde», – dip söyli Sälätneñ yaşlär belän eşläüçe belgeçe Ayaz Xanafin.

Här äydaman öçen dulkınlandırgıç mizgel – ciñüçe isemen iglan itü. Bıel «Berençe liga»da berençelekkä Almaz abıy Yarullin laek buldı. «Premer-liga» ciñüçese dip Liliya apa Gatina tabıldı!

«Yarışka kilü belän kurku xise dä tudı. Buldıra alırmınmı? Miña ışangan keşelärneñ ömetlären aklarmınmı? Başta şundıy xislär biläp aldı. Yarışnıñ iñ awır mizgele – ul üz-üzeñ belän köräşü. Nikadär kıen bulsa da, şul mizgeldä köçeñne cıep, ber adım alga atlasañ – ciñüçe bulaçaksıñ. Yarıştan ütkän keşe yarışka kadärgesennäñ küpkä aerıla. Üseşeñne sizäseñ», – di Almaz abıy Yarullin.

Xis-kiçereşläre belän «Premer-liga» ciñüçese Liliya apa Gatina da urtaklaştı.

«Äydamannar yarışı»nda katnaşıp ciñü yaulagaç, apam (Gölnaz Gatina – «Äydamannar yarışı 2019» ciñüçese) bu konkursnıñ kabatlanmas häm här keşe öçen zur täcribä buluın gel äytä kilde. Üzemneñ köçemne dä sınap kararga buldım. «Äydamannar yarışı», çınnan da, böten äzerlegeñne, täcribäñne tikşerä, säläteñne bar yaklap açarga mömkinlek birä. Säxnädän üz isememne işetkäç, şundıy söendem! Kuelgan köç, äzerlekneñ näticäse buluına ixlas şatlık häm Sälätkä şuşındıy mömkinlek birgäne öçen räxmät xise ide küñeldä. «El äydamanı» digän isemne yörtü – iñ zur büläk häm cawaplılık, miña kalsa».

Ciñüçelärne çın küñeldän kotlıybız! Ä büläkläü inde tizdän, VII «Sämrux» El premiyasendä bulaçak.