«Kıska metr häm kreatiw ideyalär»: Sälätneñ media smenasında laboratoriyalär ← kire kaytirga

Bu könnärdä Bilär muzey-tıyulıgı territoriyasendä «Sälät» forumınıñ dürtençe smenası - Media Bilär Forum (Media/Media) uza. Smena mediaresurslar belän eşläüneñ aktual ısullarına bagışlangan. Icadi laboratoriyalär häm ostaxanälär wakıtında balalar törle yunäleşlärdä tsifrlı kontent buldıru üzençälekläre belän tanışalar.

Wideo kontent buldıruda ideyaneñ möhimlege, kıska metrajlı film töşerü üzençälekläre häm kinoindustriyagä elägü ısulları turında bez icadi laboratoriyalär citäkçeläre - «Gromkie rıbı» agentlıgı xezmätkäre Timofey Şaragin häm rejisser, stsenarist Ekaterina Germ-Uwarowa belän aralaştık.

Timofey, sez balalar belän tanışuıgıznı närsädän başladıgız?

Bügenge berençe lektsiya kreatiw ideyalär uylap tabu künekmälärenä bagışlandı. Ul - programmanıñ nigeze. Ägär dä anı töşerep kaldırsañ, aldagı, mäsälän, kamera xäräkäte yaki montaj yasau turındagı lektsiyalär faydasız bulaçak.

Praktika kürsätkänçä, teläsä nindi yaxşı wideo - ul berençe çiratta ideya. Anıñ turında bez härwakıt söenergä, gacäplänergä häm uylanırga mäcbür itüçe tekä wideoyazmalar kürgändä genä uylıybız. Matur kadrlar, kamera yulları h.b. turında isä bez soñınnan gına iskä töşeräbez.

Xäzer wideoyazmalarnıñ nindi formatları yaşlär arasında aeruça populyar?

Balalarga xäzer yaña kıska formalar kızıgrak: yutub, tiktok, rilslar - alar tiz arada barısın da cälep itälär häm yaş auditoriyadä bik zur populyarlık kazanalar. Miña kalsa, bu yunäleştä şäxeskä zur xarizma häm üzençälekle xarakteristikalar, şulay uk, kızganıç, öyrätergä mömkin bulmagan başka künekmälär taläp itelä. Ämma nindider gomumi nizamätlärgä härwakıt öyrätep bula.

Xätta kıska wideo formatında da tekä kreatiw nigez härwakıt urınlı bulaçak - xätta töp urın sezneñ xarizmagızga birelsä dä, kızıklı ideya östäp, sez hiçşiksez naçarrak eşlämäyaçäksez.

Balalar programmanı niçek kabul ittelär? Kızıksınuçılar buldımı?

Eş şunda ki, wideoga kagılışlı material - üzennän-üze gadi genä tügel. Biredä bik küp yaşlär kreatiw fiker yörtergä häm dönyanı üzençä interpretatsiyalärgä öyränälär genä äle. Yaña närsä kürä belü - gadi genä künekmä tügel, ul här ölkän keşedä dä yuk.

Uylap tabunı üsterügä birem ütägändä, balalar şunduk canlana başladı. Kayber sälkeşlär aeruça gacäpländerä - yagni sin xätta alar şulkadär yaxşı ideya täkdim itär dip kötmiseñ dä. Mondıy xälne kürü küñelle.

Sez yaş wideokontent uylap tabuçılarga nindi kiñäşlär birä alasız?

Iñ möhime - trendlarnı centekläp küzätep toru. Karalgan kontentnı analizlau bik möhim, çönki analizsız ul faydasız küñel açuga äwerelä. Bu sxema härwakıt bertörle eşli: sin başkalar närsä eşlägänne karıysıñ, monı añlarga tırışasıñ, ä annarı aña üzeñ närsä östi aluıñnı uylap tabasıñ.

Ekaterina Germ-Uwarowa balalar belän kıska metrajlı filmnar töşerü buença icadi laboratoriya başladı häm balalarga kinoindustriyaneñ kayber aspektları turında söyläde.

Icadi laboratoriyagä saylap alu niçek uzdı?

Berençe ike köndä balalarnıñ kaysına bu tema çınnan da kızıklı buluın añlau öçen bez sälkeşlär belän kereş lektsiyalär uzdırdık. Näticädä, laboratoriyagä yakınça 30 keşe kaldı. Kürep toram, alar çın küñeldän cälep itelgän, daimi räweştä soraular birälär, igtibar belän tıñlıylar.

Balalar lektsiyalär tıñlap kına kalmasın, ä täcribä tuplasın öçen min monda däreslärne «çumu» formatında ütkärergä täkdim ittem. Wideoyazmalar töşerü – ul, berençe çiratta, praktika. Nikadär kübräk töşersäñ, stsenariylar yazsañ, şulkadär yaxşırak. Xätta ul nindider tiktoklar yaki rilslar bulsa da, bu bik möhim.

Miña kalsa, sälkeşlärgä praktika citmi, şuña kürä min icadi laboratoriya buldırunı soradım. Anda bez öç kön däwamında ber törkem belän kıska metrajlı filmnar töşerü protsessına çumabız.

Sez proektlar östendä eşli başladıgızmı?

Laboratoriyaneñ berençe könendä bez stsenariynı cıya başladık, anı äzerlädek. Xätta bäläkäy sälkeşlär dä rejissuraga, prodyuserlıkka cälep itelgän ide. Kemder xätta min bilgelägän barlık punktlar buença äzer stsenariynı möstäkıyl räweştä cıya aldı. Min moña bik gacäpländem.

Aldagı könnärdä bez operator bulu ostalıgın häm kadrlar buldıru üzençäleklären öyränäçäkbez, ä annarı - töşerä häm montaj belän şögıllänä başlayaçakbız. 3 kön eçendä tulı prodakşn yasau bik kıen, ämma bez wakıtka sıeşırga häm smena yabılışında äzer eşlärne kürsätergä tırışaçakbız.

Kinoinustriyagä niçek elägergä mömkin? Sez balalarga nindi kiñäşlär birer idegez?

Kinoda härwakıt törle hönär iyaläre eşli. Sez anda nindider katnaş belgeçleklär aşa da elägä alasız. Mäsälän, fotograf - operatornıñ assistentı, jurnalist - stsenarist bulırga mömkin. Şulay uk xelperlar da bar - alar törle wak-töyak yöklämälärne ütilär.

Texnikanı yaxşı belgän keşe logger bula ala. Ul töşerelgän materialnı saklau häm sortlarga bülü öçen cawaplı xezmätkär. Bu bik möhim, çönki ägär nider yugalsa, kadrlarnı yañadan töşerergä turı kiläçäk, ä smena könenä million sumga kadär torırga mömkin. Teläge bulsa, härkem üzenä urın häm üze eşli torgan ölkä taba ala.

Ägär dä sez kinonıñ eçtän niçek eşläwen belergä telisez ikän, töşerü protsessına möstäkıyl karaudan da faydalırak närsä yuk. Nindi roldä buluı möhim tügel. Min, mäsälän, berençe tapkır mäydançıkka bufetçı rolendä eläktem. Üzemneñ anda närsä belän şögıllänüem barıber ide, barı tik bu eşneñ niçek baruın beläsem kilde.

Monnan tış, xäzer «şäxsi blog alıp baru» häm «käräzle telefonga töşerü sängate» yunäleşläre buença icadi laboratoriyalär uza. Tiktoker Elza Ismetowa uñışlı blog buldıru häm anı populyarlaştıru täcribäse belän urtaklaşa, ä fotograf Ildar Äsfändiyarow häm wideograf, kontentmeyker Ewgeniya Oprişko balalarnı käräzle telefon yardämendä sıyfatlı foto- häm wideokontent töşerü nigezlärenä öyrätä.