Mart turında kıskaça! ← kire kaytirga
Yaznıñ berençe ae cılı koyaş nurları belän bergä istälekle çaralar häm şatlıklı mizgellär alıp kilde! Äydägez, mart aen yanädän iskä töşerep, näticälär yasıyk!
· «Sälätle cäy - 2025» garizalar kabul itü kampaniyase startı
Sälkeşlär häm alarnıñ äti-äniläre bu yañalıknı bigräk tä zarıgıp kötte! «Sälätle cäy - 2025» yal itü kampaniyase üz eşçänlegen başlap cibärde! Cäyge alannarnıñ isemlege belän Sälätneñ räsmi saytında tanışırga mömkin, garizalar portfolio-selet.ru saytında kabul itelä. Bu cäyne Sälättä bergä ütkärik!
· «Tamırlar» muzıkal kontsertı
3 mart könne K.Tinçurin isemendäge teatr säxnäsendä gacäep «Tamırlar» muzıkal kontsertı uzdı! Bu kiçädä bezneñ yaratkan şagıyrebez Söläymannıñ şigırlärenä Sälät festiwale cırınıñ awtorı, kompozitor Roza Möxetdinowa icat itkän «Tamırlar» kantatası kürenekle artistlar häm «La Primavera» orkestrı başkaruında yañgıradı. Älbättä, barlık sälätlelär bu istälekle çaradan çittä kalmadı. Muzıkal wakıyga härber tamaşaçınıñ küñelendä yaktı tirän ez kaldırdı.
· Töbäk «Sälät» klubları öçen XXI gamäli uku-ukıtu seminarı
17- 21 mart könnärendä «Yoldızlı»da Töbäk «Sälät» klubları öçen XXI gamäli uku-ukıtu seminarı uzdı. Yazgı gamäli uku-ukıtu seminarı – ul klublarnıñ aerım ber wakıt eçendä başkargan eşçänleklärenä näticä yasau, xisaplar äzerläü, alga taba uzdırırga planlaştırılgan proektların täkdim itü mäydançıgı. 4 kön däwamında katnaşuçılar başka klublar belän bergäläşep, ber-berseneñ täcribäsen üzläşterep, komandalarda eşlädelär. Çakırılgan ekspertlar häm klub kuratorlar tarafınnan äzerlängän lektsiyalär, treninglar, ostaxanälärdä katnaştılar.
· M.I.Mäxmütow isemendäge «Fänsar» mäktäbeneñ yazgı sessiyase häm «Olimp» alanınıñ yazgı smenası
Iñ sälätle balalar yazgı kanikullarında Sälät alannarına cıeldı! Küñelle häm yaña belemnärgä bay kanikullar «Olimp» alanında häm «Fänsar» mäktäbeneñ yazgı küçmä sessiyasendä başlanıp kitte. «Fänsar» mäktäbeneñ yazgı sessiyase fän olimpiadalarında häm konferentsiyalärdä aktiw katnaşuçı 8-11 nçe sıynıf ukuçıları öçen ütkärelsä, «Olimp» alanınıñ yazgı smenası 1-11 sıynıf ukuçıların yazgı kanikullar wakıtında olimpiadalar häm imtixannarga äzerläü belän berrättän küñelle yal itterde. Imtixannarga häm olimpiadalarga näticäle äzerlek, ruxlandırgıç ostaxanälärdä yaña künekmälär üzläşterü, küñelle çaralar – bu süzlär näk «Fänsar» häm «Olimp» turında!
· Yaz – yaña mömkinleklär, yaña ürlär yaulau wakıtı!
Mart ae citü belän Flüs Latıyfi isemendäge Respublikaküläm «Sälätkä nur bulgan yoldızlar» açık ädäbi konkursına, M. I. Məxmütow isemendəge «Fənsar» məktəbeneñ X Respublikaküləm fənni-gaməli konferentsiyasenä häm «Sanak» uku-ukıtu laboratoriyaseneñ yazgı küçmä sessiyasenä garizalar kabul itelä başladı! Nigezlämälär belän «Sälät»neñ räsmi saytında tanışa alasıñ. Garizañnı tizräk tutırıp cibär!
· «Fänsar – Almagaç» fänni-gamäli proekt konferentsiyase
«Almagaç» mäktäbendä oeştırılgan fänni-gamäli proekt konferentsiyase çın mägnäsendä fän bäyrämenä äwerelde! Konferentsiyadä törle yunäleşlärdä bik kızıklı häm fähemle çıgışlar täkdim itelde. Här çıgış - yaña belem, yaña açış! Kompetentlı jyuri ägzaları eşlärgä karata fikerläre häm kiñäşläre belän dä büleşte. «Almagaç» mäktäbe ukuçılarınıñ tırışlıgı, äzlänüläre häm icadi yakın kilüläre soklandırgıç ide!
· «Sälätle cäy» marafonı
«Sälätle cäy - 2025» yal itü kampaniyasenä äzerlek kısalarında «Sälätle cäy» marafonı üz eşçänlegen aktiw alıp bara. Ay däwamında Sälät yortında alannar törle çaralar oeştırdı: «Mirax» intellektual klubı «Ruxiyat» alanı belän berlektä «Närsä? Kayda? Kayçan?» intellektual uenı, «Tel» alanı - «Kiçke tel» muzıkal kwizı, «Aznakay» alanı - «Aznakay» fatirnigı, «Rauşan» alanı ostaxanäse , «Cisem» alanı - «Cisemle säyaxät» kiçäse. Şulay uk Sälät alannarı «Almagaç» mäktäbe belän şaktıy küp oçraşular uzdırdı, ukuçılarnı Sälät dönyası belän yakınrak tanıştırıp, alarga küñelle ostaxanälär oeştırdı. Sälätlelär şulay uk «TNW» telekanalı tapşırularında, «Bolgar» häm «Saf» radiolarınıñ efirlarında «Sälätle cäy - 2025» turında söyläde.
· «Yaş yöräklär» teatr laboratoriyase däresläre (ay däwamında)
Teatr sängate belän kızıksınuçılar öçen laboratoriya däresläre üz eşçänlegen däwam itte. Katnaşuçılar «Luiza…» dip isemlängän mäxäbbät tarixına nigezlängän spektakl äzerläde. Yomgaklau spektakleneñ premerası 2 aprel könne 18:00 sägattä Şärık klubında uzaçak. Bezneñ belän ber dulkında bul!