«WKontakte» kompaniyase wäkile Andrey Muraşew forumnıñ äzerlek däräcäsen bäyaläde häm balalar belän sotsial çeltärneñ yaña trendları turında söyläşte ← kire kaytirga

Bu könnärdä Bilär muzey-tıyulıgı territoriyasendä «Sälät» forumınıñ bişençe smenası - Mäglümati texnologiyalär Bilär Forum (Informatsionnıe texnologii /Information Technologies) uza. Smena mäglümati texnologiyalärgä bagışlangan. Çakırılgan belgeçlär katnaşındagı tıgız uku-ukıtu programması kısalarında katnaşuçılar aldıngı IT-texnologiyalär häm trendlar belän tanışaçak.

Bıel forumda «Wkontakte» sotsial çeltäre wäkilläre buldı. Sälätne federal forumnar belän çagıştıru, sıyfatlı kontent eşläü häm sotsial çeltärlärneñ populyar formatları turında bez WKontakte uku-ukıtu proektları menedjerı Andrey Muraşew belän söyläştek.

Elegräk sez küp kenä uku-ukıtu forumnarında spiker bulıp çıgış yasadıgız. Sälät närsälär belän istä kaldı?

Minem bu forum turında küp işetkänem buldı, läkin şäxsän anı berençe tapkır kürdem. Biredä unikal moxit häm uku-ukıtu protsessına zur xörmät belän karauçı gayat icadi balalar. Sälät federal forumnarga bötenläy oxşamagan - minem başka berkayda da mondıy eçtälekne häm texnik äzerlekne oçratkanım bulmadı. Bolarnıñ barısın da kürgäç, bik täesirländem. Turıdan-turı efirlar studiyaseneñ eşen aerım bilgeläp ütäsem kilä - kır şartlarında studiyane texnik yaktan mondıy däräcädä cihazlandıru bik kıen.

Ostaxanälärdä nindi temalar kuzgatıldı?

Kiçä bez WKontakteda kontentnı populyarlaştıru algoritmnarı häm anıñ belän eşläü ısulları turında söyläştek. Şulay uk bez katnaşuçılar belän alarnıñ nindi köçle yakları buluı häm monı sotsial çeltärlärdä niçek çagıldırırga mömkin ikänlege turında fiker alıştık.

Bügen min kreatiw ideyalärgä zur basım yasadım. Bez kıska wertikal roliklar formatın centekläbräk tikşerdek, çönki soñgı wakıtta bez kontentnıñ bu formatına trend küräbez. Bez balalar belän töp nizamätlärne öyrändek, storitelling turında söyläştek, beraz fiker alıştık häm sotsial çeltärlärdä Sälät forumı öçen rubrikalar turında uyladık. Mäsälän, küp kenä balalar forum eşenä wolonterlar, oeştıruçılar küzlegennän karau, territoriyagä zur bulmagan küzätü yasau kızık bulır ide dip söylädelär.   Kemder kliplarda kiçke çaralarnı yaktırtu, sälkeşlärneñ niçek äzerlänülären kürsätü ideyasen täkdim itte.

Minemçä, wideonıñ mondıy formatı forumda katnaşuçılar arasında bik populyar bulırga mömkin. Alar anı sotsial çeltärlärgä kuyaçak, wideo taralaçak häm forum turında uñay fiker tudıraçak.

Sälätkä tagın ber tapkır kilergä telär idegezme?

Äye, min bik şat bulır idem. Ikençe yulı IT-smenada tulı ber icadi laboratoriya oeştıru äybät bulır ide - minem uylawımça, sälkeşlär belän bezneñ däreslär öçen bu format ideal turı kiläçäk - balalarga üz proektların yasarga mömkinlek birü şäp bulaçak. 

Forumnan soñ katnaşuçılar ideyane üzläre belän bergä alıp kaytıp, üz mäktäplärendä yaki kölliyatlärendä tormışka aşıra häm alga taba da üsterä alır ide. Ä bez, belgeçlär häm ostazlar bularak, faydalı kiñäşlär birä alır idek.

Sez üsep kilüçe kontent buldıruçılarga nindi kiñäşlär birä alır idegez?

1.Ägär sez sotsial çeltärlär öçen kontent buldırırga cıenasız ikän, sezgä platformanıñ funktsionalın centekläp öyränergä kiñäş itäm: anda närsälär eşlärgä mömkin, ä närsälär - yuk. Nindi kontentka igtibar itärgä kiräklegen añlau öçen algoritmnarnıñ eşen dä öyränergä kiräk. Mäydançık üze närsäne yaxşırak populyarlaştıraçak.

Bu teläsä nindi mäydançık öçen aktual, läkin, mäsälän, WKontakteda sez, bezneñ räsmi törkemgä yazılıp, yañalıklarnı küzätä alasız. Anda mäkalälär, podkastlar häm wideoyazmalar seriyase bar, alarda bez härnärsäneñ niçek eşläwe turında añlaeşlı itep söylibez.

2. Üzençälekle kontent yasagız, törle korallar kullanıp karagız, sezneñ auditoriyaneñ moña niçek cawap birüen küzätegez. Şunnan çıgıp, sez, närsäneñ nıgrak oşawın añlap, bu sorauga yaraklaşa alırsız. 

3. Üzegez telägänçä eşlärgä kurıkmagız - bu sezneñ üz yulıgız häm aerım üz küzallawıgız - ul härwakıt igtibar cälep itä. Täcribälär yasaudan kurıkmagız. Ägär ber format kabul itelmi ikän - ikençesen eşläp karagız. Bälki ul başkalarınan yaxşırak kilep çıgar.