24 nçe gıynwar – 26 nçı gıynwar könnärendä «Yoldızlı» bazasında Respublikaküläm «Başcitäklär mäktäbe» häm «Media mäktäbe» proektlarınıñ küçmä sessiyaläre uzdı.

«Başcitäklär mäktäbe» – strategik yaktan möhim proekt, ul «Sälät» cäyge profille smenaların gamälgä aşıru öçen citäkçelär komandasın äzerläügä häm formalaştıruga yunälderelgän. Alannıñ eşçänlege iñ berençe başcitäklärdän başlana, şuña kürä alar el saen kwalifikatsiyalären kütärep, komanda cıyu häm anıñ belän eşläü üzençäleklärenä, näticäle kommunikatsiya serlärenä öyränälär, normatiw-xokukıy baza nigezendä eşläü kagıydälären kamilläşterälär.

«Media mäktäbe» alannar eşçänlegen häm anda bulaçak çaralarnı berençelärdän bulıp yaktırtuçı media belgeçläre äzerläde. Mäktäpneñ uku-ukıtu programması katnaşuçılarına kiräkle belem häm ostalıklarnı birügä nigezlängän. Alar tanılgan ostazlar belän oçraştı, mawıktırgıç ostaxanälärdä katnaştı häm media dönyasınıñ serlärenä töşende, alarnı gamäldä kullanırga öyrände. Monıñ öçen şuşı ölkädä eşläüçe belgeçlär cälep itelde. Bu smena katnaşuçıları äytüençä, alarga iñ oşaganı wideokontent yasau, tekstlar yazu, wizual belän eşläü kebek gamäli däreslär bulgan. Mäktäp nibarı öç kön däwam itte, şuña kürä bulaçak media ostaları ber minutnı da buşka uzdırmadı, xätta kiçke yakta da teoretik häm gamäli materiallar öyrändelär alar.