Teatr utları cannı cılıta! ← kire kaytirga
2 aprel könne Şärık klubında «Yaş yöräklär» teatr laboratoriyase «Luiza…» mäxäbbät tarixı dip isemlängän yomgaklau spektaklenä teatr sängaten söyuçelärne cıydı. Älege premera tamaşaçılarnı şagıyr Xäsän Tufan häm aktrisa Luiza Saliaskarowanıñ mäxäbbät tarixı belän tanıştırdı, tanılgan şäxeslärneñ küñel közgesenä säyaxät kılırga çakırdı. Spektaklgä sälätlelär teatr laboratoriyaseneñ däreslärendä 5 ay däwamında nıklı äzerlek alıp bardı: küpsanlı repetitsiyalär, kostyumnar, dekoratsiyalär äzerläü, rollärne üzläşterü, akterlık ostalıgı ostaxanäläre, ut häm muzıka elementların uylau…
Tamaşaçılar akterlarnıñ samimilegenä, ixlaslıgına, üz rollären çın mägnäsendä üzläre aşa ütkärep, osta uynaularına, geroylarnıñ xis-kiçereşlären tögäl citkerä alularına, spektaklneñ kuelışına, här elementınıñ centekle uylanıluına soklanıp tañ kaldılar.
«Luiza…» mäxäbbät tarixı spektakleneñ rejisserı, «Yaş yöräklär» teatr laboratoriyaseneñ ostazı Rail Xarisow:
— Spektaklneñ ideyase yalgış kına ber muzıkal klipta «Kaysıgıznıñ kulı cılı..» şigıreneñ teträndergeç yulların kürüdän tudı. Min şuşı köçle süzlär talantlı şagıyr Xäsän Tufannıkı ikänen isemä töşerüem buldı, Şärık klubınıñ kitapxanäsenä barıp, alarnıñ Luiza Saliaskarowa belän köçle mäxäbbät tarixın kitaplardan öyränep, şuşı tarixka nigezlänep stsenariy tözi başladım. Luiza iseme nindider mäxäbbät, ışanıç, ömet, neçkä yomşak xislärne belderä sıman. Minem öçen, mäxäbbät teması üzençälekle, neçkä, cılı, yomşak, töp tema bulıp tora. Bar närsäneñ başlangıçı – mäxäbbät. Töp maksatıbız da – yaş buınga sınaularga, awırlıklarga bireşmiçä, mäxäbbäten, ışanıçın saklauçı köçle şäxeslär belän tanıştıru, çın mäxäbbätneñ nindi buluına töşenderü, şul xisneñ maturlıgın, köçen kürsätü ide. Xäzerge zamanda yaşlärneñ bu mäsälälärgä karata fikerläre üzgärde, şuña kürä alarga bu tarixnı kürsätü aeruça möhim ide. Şuşı soklandırgıç tarixnı säxnäläşterergä yardäm itkän härkemgä räxmätemne belderäm!
«Luiza…» mäxäbbät tarixı spektakleneñ töp rolen başkaruçı, «Yaş yöräklär» teatr laboratoriyaseneñ katnaşuçısı Färidä Miñnebaewa:
— Teatr säxnäsenä berençe tapkır çıgışım – häm şunda uk töp rol! Älbättä, min bik dulkınlandım, üz-üzemä: «Min buldıra alırmınmı?», «Döres uynıymmı?», «Repliklarımnı döres itep äytä alammı?» – digän soraular birdem. Tekstnı yatlau awır bulmadı, ämma obrazga çın-çınlap kerep uynau ciñel tügel ide. Min böten köçemne saldım. Şuña ışanam: bu – minem teatr dönyasına berençe adımım gına!
Minemçä, bu spektakldä iñ unikal närsä – komanda. Barlık akterlar häm rejisser berdäm eşläde. Bez ber-berebezgä yardäm ittek, kiñäşlär birdek häm fikerlärebez belän urtaklaştık. Şulay uk, bezneñ rejisserıbız Rail abıynıñ ideyalärenä tuktalmıyça bulmıy – anıñ kreatiwlıgı mine ilhamlandırdı. Barlık muzıkal kompozitsiyalärne saylap alu, här etyudnı centekläp uylau – bu zur igtibarga laek. Mondıy komanda bulmasa, spektakl, mögaen, mondıy tere häm emotsional bulmas ide.
