Bilärdä «Cälät» Forumınıñ öçençe smenası tögällände ← kire kaytirga

Bilärdä X Xalıkara «Cälät» yaşlär uku-ukıtu forumınıñ öçençe smenası – SELET BILER FORUM tämamlandı. Forumga Sälätneñ cäyge profille smenalarına saylap alunı ütkän sälätle balalar häm yaşlär cıelgan ide. SELET BILER FORUM-nıñ azakkı könendä smenaga näticälär yasaldı häm ciñüçe alannar büläklände.

Kiçne «Palatka, uçak häm gitara» dip atalgan kontsert belän däwam ittelär. Säxnädä sälkeşlär, äydamannar häm oeştıru komitetı wäkilläre çıgış yasadı. Soñınnan maxsus çakırılgan didjeylar katnaşında open-air ütte.

Forumda barlıgı Sälätneñ 8 profille alanı katnaştı: «Sälät – Rauşan» (Laeş rayonı, «Yoldızlı» bazası), «Sälät – Ruxiyat» (Kama Tamagı rayonı, «Argamak» IPÜÜ), «Sälät – Bilär kalası (Bilär, «Fänsar» FMÜ), «Sälät – Batır» (Krutuşka bistäse, «Baytik» BSA), «Sälät – Aznakay» (Aznakay şähäre, «Solnışko» BSÜ), «Sälät – Tulpar» (Başkortstan Respublikası, Tuymazı rayonı, «Babay utarı» kompleksı), «Sälät – Yar Çallı» (Yar Çallı şähäre, «Bumajnik» SSÜ), «Sälät – Saba» (Saba rayonı, Ikşermä awılı, «Ikşermä kadet mäktäp-internatı»).

Bıel smena soft skills ölkäsendäge aldıngı täcribälärne öyränügä yunälderelä, uñışka ireşüdä möhim bulgan, hönäri üseşne näticäle itä torgan sotsial künekmälärgä bagışlana. Kritik fiker yörtü, añlılık, stresska tüzemlelek, emotsional intellekt, ixlas aralaşu häm üz-üzeñä ışanıç kebek temalar buença treninglar uzdı.

Kouç häm biznes-trener Elwina Babaewa katnaşuçılarga üz-üzeñä ışanıç däräcäsen arttıru, şäxes tärbiyaläü häm stressnı ciñü turında söyläde, üz kiñäşlären birde.

«Üz ideyasenä härwakıt tugrılılı kalgan berläşmälär – bik siräk küreneş. «Sälät» Forumı isä ellar bue üz däräcäsen saklıy. Alay gına da tügel, smenalarnı ütkärü sıyfatın daimi yaxşırta, kamilläşterä, – dip söyli Elwina Babaewa. – «Sezgä Sälättä närsä oşıy?» – dip soraganda, balalar härwakıt: «Moxit!» dip cawap kaytaralar. Alarnıñ Sälätne şulay yugarı bäyaläülären işetkäç, başkalarnıñ da monda kiläse häm şul moxitne küräse, tatıp karıysı kilä başlıy!»

Alannar futbol, woleybol, stritbol, şaxmat, su polosı buença yarışlarda köç sınaştı. «Sälät-Ruxiyat» komandası futbol häm şaxmatta berençelekne yauladı. Woleybol buença çempionatta «Sälät-Rauşan», ä stritbolda «Sälät-Yar Çallı» komandaları ciñüçe dip tanıldı.

Smena katnaşuçıları öçen kızıklı mädäni programma äzerlängän. Alannar üzläreneñ prezentatsiyalären täkdim itte, xorlar yarışında katnaştı, «Äydä, ŞayaRT» KWN ligası belän berlektä äzerlängän «Comedy Biler» şouında şayanlık häm tapkırlıkta köç sınaştı.

«Iñ yaxşı biyu», «Iñ yaxşı prezentatsiya» nominatsiyasendä häm xorlar yarışında berençelek – «Sälät-Ruxiyattä». Iñ şayan alan dip «Sälät-Rauşan» sälkeşläre tanıldı.

Smenada «Närsä? Kayda? Kayçan?» intellektual uenı ütte. Çaranı maxsus kunak – uennıñ telewizion wersiyasendäge superblitsta ciñü yaulagan keşe, bällür yabalak iyase – Nikolay Krapil alıp bardı. «Närsä? Kayda? Kayçan?»nıñ kubogın «Sälät-Bilär kalası» yauladı.

Şulay uk SELET BILER FORUM-ga Sälätneñ çişmä başında toruçılarnıñ berse – Rädis Käbirow ta çakırulı ide.

«Min üzem älege forumnı Nurixan Fättaxnıñ «Sızgıra torgan uklar» romanındagı özek belän çagıştırırga yaratam. Bezneñ borıngı babalar da törle kabiläläre belän cıelıp, üzara fikerläşep, urtak mäsälälärne xäl itä, alga taba plannar kora torgan bulgan. Bilärgä kilgän saen romandagı şul mizgelne küz aldına kiteräm. Monda da törle yunäleştä ütä torgan alannar ber-bersen kürep, aralaşıp, yarışıp, çın duslar bulıp aerılışalar. Sälätneñ töp maksatı da şul bit!» – di Rädis Käbirow.

Forumda ekologiya yunäleşe – EkoSälät eşläp kilä: territoriyadä cämägat bakçası, plastiknı utilläşterü zonası, çüpne aerıp cıyu sisteması oeştırılgan. Uku-ukıtu programması kısalarında ekologiya belgeçläre balalar öçen lektsiya häm master-klasslar ütkärde.

Smena däwamında «SeletLive» turıdan-turı efirlar studiyase eşläde. Här könne forum cirlegennän translyatsiyalär oeştırıldı. Studiya komandası alannarnı täkdim itü kiçäse, «Comedy Biler» şouı, icadi kontserttan maxsus çıgarılışlar äzerläde. Translyatsiyalärne Sälätneñ Instagram, WKontakte häm YouTubetagı räsmi akkauntlarında kararga mömkin.